کوردستان ئەی دیلی دەستی داگیرکەران ڕۆڵەکانت وەک پێشەوا لە ڕێی ڕزگاریی تۆ دا تا ئەو چرکەیەش لە دار ئەدرێن و ئەکوژرێن و خوێنیان لێ ئەچۆڕێ
و بەڵام ڕووسوور و سەربەرزانە و توند و تۆڵ و بەھێز و ورە بەورە ئەبەخشن و سرودی ئەی ڕەقیب و کوردستان بژی و من پێشمەرگەی کوردستانم دەڵێنەوە.
کوردستان ئەی دایکی جێنۆسایدبووی دێرسیم وکۆبانێ وئەفرین و سەردەشت و ھەڵەبجەو شنگارم .
کوردستان ئەی ڕووگەم ، ئەی کەژاوەی کۆرپەی کورد ئەی پیرۆزترین ئامێزی تێدا ئارام وەبووم. لە ھەرکوێیەک بم .بە چاوی پڕ لە فرمێسکەوە و داخێکی ھەردەم پڕ لە پەرۆشەوە ماچت ئەکەم و دەڵێمەوە کە ئەم گۆی زەوییە بازنەیەکی لەت کراوە و ئەو لەتەش کوردستانە لە بەر تەماحی دەمڕاستەکانی ئەم دنیایە ،تا ئێستا پەیوەند نەکراوەتەوە، بۆیە بە بێ کوردستان گۆی زەوی بە کەم ئەندام دەزانم و کوردستانیش بە پێچەوانەوە ھەروا دەبینم.کەوابوو وانەی تۆ کە ئازادی و سەربەستی و کەرامەتی مرۆڤایەتییە ھەمووکاتێ لە کەلامە پیرۆزەکانتن بۆ من .