دانیشتنی حیزبەکان لە گەڵ کۆماری ئیسلامی و بێدەنگیان؟

پێشمەرگەکان: ماوەیەکە هەواڵی دانیشتنی حیزبەکانی رۆژهەڵاتی کوردستان لە سوسیال مێدیاکان دەنگی داوەتەوە و بۆ زۆر کەس بۆتە پرسیار ، تا ئێستا حیزبەکانیش لێی بێدەنگن و نە رەدی دەکەنەوە نە تەئید.

زۆربەی کاتەکان وابووە هەر کات حیزبەکان خۆیان لێ بێدەنگ کرد بە مانای راستی هەواڵەکە دێت و دەنا لە مێژ بوو هاواریان بەرز ببووە کە هەواڵەکان راست نین.  گۆیا وتووێژەکە ئاخرین جار لە 28ی 6 ی 2019 بووە بە هەڕەشە کردنی کۆماری ئیسلامی لە حیزبەکان کۆتایی هاتووە و  پێیان وتوون لایەنگری لە ئەمریکا بکەن لێتان دەدەین.

هەر ماوەیەک لە مەوبەر کاک خالید عەزیزی وتی: من وتوومە ئەم دەستەم  (دەستی راست) بەرز ناکەمەوە، نەم وتووە ئەم دەستەم (دەستی چەپ) ئێمە وتووێژ رەد ناکەینەوە. کاک مستەفا هیجریش ماوەیەکی زۆرە بێدەنگی هەڵبژاردوە و  ئەو ساڵیش تا ئێستا خەبەرێک لە راسانی حدکا نیە.

 

هەر لەم بارەوە کاک هەڵمەت مەعروفی ئەمجۆرەی نووسیوە:

هەندێک سەرچاوە باس لە هەبوونی دانوستان لە نێوان حیزبەکانی ڕۆژهەڵات و نوێنەرەکانی ڕژیمی ئێران لە ناو بینای ڕێکخرای “ئێن ئۆ ئار ئی ئێف” واتا، ناوەندی جیهانی بۆ چارەسەر کردنی کێشە جیهانیەکان لە نۆروێژ دەکەن.

ئەو سەرچاوانە دەڵین: کۆبوونەوەکە لە نزیک کاتژمێر 18:00 بە کاتی ئوروپای ناوەندی 2019/06/28 لە نووسینگەی سەرەکیی ئەو ڕێکخراوە نۆروێژیە دەستی پێکردووە.

دەگوترێ: حەسەن شەڕەفی، ڕەزا کەعبی، ئەبووبەکر مودەڕسی و خالید عەزیزی لەو دانوستانەدا بەشدارن.

وەک ئەو سەرچاوانە باس دەکەن، ئەوە چوارەمین کۆبوونەوەیە کە لە نێوان ئەو دوو لایەنەدا بەڕێوە دەچێ.

لە کۆبوونەوەی یەکەم تا سێیەم، کۆمەڵەی زەحمەتکێشان ئاگادار نەبووە و دواتر لەگەڵ کەوتووە.

دەگوترێ: کۆبوونەوەی یەکەم تەنیا لە نێوان سکرتێری سێ حیزبی حدکا، حدک و کۆمەڵەی شۆڕشگێڕ و نوێنەرەکانی ڕژیمی ئێران بەڕێوە چووە.

لە کۆبوونەوەکانی تر ئەو کەسانە بەشدار بوون:

خالید عزیزی

مستەفا مەولوودی

قادر وریا

ئازاد عەزیزی

حەسەن شەڕەفی

مستەفا هیجری

ئەبووبەکر مودەڕیسی

کاکۆ عەلیار

عەبدوڵا موهتەدی

دەگوترێ لە کۆبوونەوەی سێیەم ڕژیم بە حیزبەکانی گوتووە: “ئێوە ئێرانین، خۆشتان نکوڵیتان لەوە نەکردووە، هەر میلەتێک کە لە ژێر گوشاری دەرەکی دابێ ناچێ هاوکاری لەگەڵ دژبەرانی وڵاتەکەی بکا و ئەگەر ئێوە ئەوە بکەن ئەوا بۆ ئێمە هێڵی سوورە، ئێمە لە ئێراق و هەرێمیش توانایی ئەوەمان هەیە لێتان بدەین. بەڵێ کێشەی کورد هەیە بەڵام ئێستا و لە ژێر ئەو هەموو گوشارە، چارەسەر نابێ و کاتی نیە، ئەگینا دواتر وەک ئێرانی لەگەڵ یەکتری دادەنیشین و کێشەکە چارەسەر دەکەن.” واتا ڕژیم نەک بەڵێنی پێ نەداون بەڵکوو هەڕەشەی لێکردوون.

ئەوەی کە حیزبە کوردیەکانی ڕۆژهەڵات چیان گوتووە، هیچ ڕوون نیە بەڵام ڕوونە کە ڕژیم لە ترسی هێرشی ئەمریکا و هاوکاریی کورد لەگەڵ ئەمریکا ئەو دانوستانەی پێکهێناوە..

ڕێکخراوی “ئێن ئۆ ئار ئی ئێف” واتا، ناوەندی جیهانی بۆ چارەسەر کردنی کێشە جیهانیەکان” پێشتر نێوبژیوانی بۆ تامیلەکان کردووە و ئەزموونێکی شکست خواردووی لەو بوارەوە هەیە.

ڕەخنەی بەشێکی بەرچاو لە چالاکانی سیاسی بریتیە لە دوو خاڵ:

یەک: لە ئێستادا هەر چەشنە دانوستانێک لە نێوان کورد و ڕژیم بە واتای سووتانی کارتی کورد لەلای ئەمریکایە.

دوو: دانوستانەکان شاراوەن و حیزبەکان هیچ بۆ ڕای گشتی نادرکێنن.

تا ئێستا حیزبەکان نە ئەو دانوستانەیان ڕەت کردۆتەوە و نە پشتڕاستیان کردۆتەوە.

—-

من هەڵمەت وەک ڕۆژنامەنووس بەدواداچوونی زۆرم بۆ ئەو باسە کردووە و تا ئاستێک دەتوانم بڵێم هەواڵەکە ڕاستە بەڵام لە کۆی باسەکە تا ڕادەیەک نادڵنیام.

….

هەر لەم بارەوەش کاک ئەحمەد شێربەگی دەنووسێ:

ده‌نگۆی ئه‌وه ‌بڵاو بۆته‌وه‌ گۆیا دوو دێمۆكرات و جووته‌ی كۆمه‌ڵه‌‌ به‌یه‌كه‌وه ‌خه‌ریكی وتووێژ له‌ گه‌ڵ كۆماری ئیسلامین.

ئه‌م وتووێژه‌ له‌ كوێ كراوه ‌و له‌ گه‌ڵ كێ كراوه‌و لایه‌نی سێهه‌م كه‌‌ ده‌ستپێشخه‌ری ئه‌م وتووێژه‌ بوه‌ كامه‌یه‌ كه‌س نازانێ، تا هه‌نووكه‌ش هیچ لایه‌نێك ئه‌مه‌ی پشتڕاست نه‌كردۆته‌وه‌.

ئه‌م شێوازی وتووێژكردنه‌ ‌‌سه‌رده‌می ڕێبه‌ری مه‌زن دوكتور قاسملوومان ده‌خاته‌وه‌ بیر كه‌ له‌ ده‌ره‌وه‌ی حیزب هه‌موو كه‌س به‌ وتووێژ‌ی نێوان حیزب و كۆماری ئیسلامی ده‌زانێ جگه‌ له‌ ئه‌ندامانی حیزب.‌ دواییش دیتمان وتوّیژی به‌ نهێنی و له‌ پشتی ده‌رگای داخراو چ كاره‌ساتێكی قه‌ره‌بوو نه‌كراوی لێكه‌وته‌وه‌.

ئه‌وه‌ی باش ده‌زانین كه‌ تاقه‌ ڕێگای چاره‌ی دۆزی كورد هه‌ر دانووستان و وتووێژه‌. كورد به‌ خه‌باتی چه‌كداریی و به‌ هێزه‌وه‌ ته‌نیا ده‌توانێ هه‌لومه‌رجی وتووێژ بخوڵقێنێ وبە ده‌سه‌ڵاتی ناوه‌ند بكێشێته‌ پای میزی وتووێژ. به‌ڵام له‌م ساته‌ وه‌خته دا كه‌ ناوچه‌ی‌ ڕۆژهه‌ڵاتی ناڤین تووشی هاتووه و‌ ڕێژیمی ئاخوندی له‌ سه‌رووی هه‌موو كێشه‌كانی ئه‌م ناوچه‌یه‌یه ئایا ئێستا ‌دۆخێكی گونجاوه‌ كورد له‌ گه‌ڵ سیستمێك بكه‌وێته‌ دانووستان كه‌ پایه‌كانی له‌رزۆك بووه‌ و سێبه‌ری نه‌مان وه‌ك مۆته‌كه‌ به‌سه‌ری كشاوه‌؟

به‌ چ پێوه‌رێك ده‌توانرێ ده‌ستبه‌ری ئه‌و مافانه‌ بكردرێ له ڕێژیمێك كه‌ قه‌یران هه‌موو جه‌سته‌ی داگرتوه‌ و بێ سوباته‌و ئه‌گه‌ری ڕووخانی هه‌یه‌؟

ئایا خواسته‌كانی كورد هه‌مان ئه‌و خواستانه‌ ده‌بن ‌ كه‌ هه‌یئه‌تی نوێنه‌رایه‌تیی كورد له‌ دوای هاتنه‌ سه‌ر كاری كۆماری ئیسلامی هێنایانه‌ گۆڕێ؟ یان داواكان ته‌نیا له‌ ڕه‌چاوكردنی مادده‌كانی ١٥ و ١٩ی ڕه‌شنووسی یاسای بنه‌ڕه‌تیی ئێران دا كورت ده‌كرێته‌وه‌؟

ئایا ڕێژیمی دژه‌ كوردی ئیسلامی به‌ڕاستیی بڕوای به‌وه‌ هه‌یه‌ دان به‌ مافه‌كانی كورد دابێنێ؟ ئه‌ی بۆچی نیزیك به‌ چل ساڵه‌ خۆی له‌ومافانه‌ بواردوه‌؟

ئه‌گه‌ر‌ وتووێژ ده‌كه‌ن، چ وه‌ڵامێكتان هه‌یه‌ بۆ ئه‌مریكا وه‌ك سه‌ره‌كیترین لایه‌نی كێشه‌ له‌ گه‌ڵ كۆماری ئیسلامی؟

ئایا نوێنه‌رانی كورد توانایی ئه‌مه‌یان هه‌یه‌ ئه‌و پارسه‌نگه‌ له‌ نێوان خۆیان وئه‌مریكا وكۆماری ئیسلامی دا ڕابگرن؟

ڕێبه‌رانی كورد به‌ خوێندنه‌وه‌یه‌كی سه‌ره‌تایی له مێژووی خوێناوی كورد ‌ده‌بێ له‌ گه‌ڵ ئه‌ندامانی حیزبه‌كانیان و له‌ گه‌ڵ خه‌ڵكی كوردستان به‌رچاو و ڕوون بن ، خه‌ڵكی كوردستان ده‌بێ ئاگاداری هه‌موو ئه‌و كه‌ین و به‌ینانه بێ كه‌ ڕێبه‌رانی كورد ده‌یكه‌ن، له‌به‌ر ئه‌وه‌ی دانووستان له‌ سه‌ر چاره‌نووس وداهاتووی ئه‌وانه‌.

وتووێژ له‌ پشتی ده‌رگا داخراوه‌كان ئه‌زموونی تاڵمان ده‌خه‌نه‌وه‌ بیر.

….

  

حیزبه‌ کورده‌کانی ڕۆژهه‌ڵات و وتووێژ

ئه‌نوه‌ر ئه‌لیاسی

به‌ بڕوای من، کۆماری ئیسلامی ئێران، هیچ کات باوه‌ڕی به‌ وتوووێژ نییه‌ و ته‌نیا کات ده‌کوژێ و ده‌یه‌وێت له‌م دۆخه‌ی ئێستا تێی که‌وتووه‌، خۆی بپارێزێ و ده‌رباز کات، چوون کۆماری ئیسلامی ئێران، له‌ ئه‌زه‌له‌وه‌ ڕژیمێکی دیکتاتۆر و خوێن مژه‌و هیچ باوه‌ڕێکی به‌ ماڤه‌کانی مرۆڤوو ئازادی نییه‌.

هه‌ندێک له‌ که‌سایه‌تییه‌ حیزبییه‌‌کانی ڕۆژهه‌ڵاتی کوردستان، پێیان وایه‌ ئێستا وتووێژ له‌باره ‌و پێویسته‌ کورد له‌م هه‌لوومه‌رجه‌ که‌ڵک وه‌رگرێ و هه‌نگاو هه‌نگاو بچێته‌ پێشه‌وه‌، بۆ گه‌یشتن به‌ ئامانجه‌کان به‌ڵام ئه‌وان بێ ئاگان له‌وه‌ی، نه‌ وه‌ک (قاسملوو) ژیروو وردبینن، نه‌ک وه‌ک ئه‌و پێگه‌یان له‌ ناوخۆ و له‌ ده‌ره‌وه‌ به‌ هێزە و‌ نه‌ ڕژیمی ئێرانیش وه‌ک ئه‌وکات بێ هێزه‌، من نازانم ئه‌مانه‌ بۆچی دوای کڵاوی با بردوو که‌توون، گریمان له‌ سه‌ره‌تاوه‌ هه‌ندێک مافیاندا به‌ڵام دوای حه‌فته‌یک که‌ باره‌که‌یان بار کرد، وه‌ک(خومه‌ینی) ده‌ڵێن (ما ازادی دادیم ولی اونها سوواستفاده‌ کردند).

تۆ ده‌بێت ئه‌وه‌ بزانیت له‌ ژێر چه‌تری ئه‌و ڕژیمه‌، به‌ بچووکترین خه‌ونت ناگه‌یت، تۆ ده‌بێت بزانیت، گه‌ڕانه‌وه‌ بۆ ژێر چه‌تری کۆماری ئیسلامی، یه‌عنی لاوازی و له‌ ناوچوونی تۆ، ده‌بێت ئه‌وه‌ بزانیت، له‌ (ڕه‌فسه‌نجانی و  مووسه‌وی که‌ڕووبی) خۆشه‌ویستر نیت و نابێت.

به‌ داخه‌وه‌ ڕاستییه‌‌کی تاڵ هه‌یه‌، پێویسته‌ هه‌موومان بیزانین، کورد و دووبه‌ره‌کی هه‌رگیز له‌ یه‌ک نابڕێن، حیزبه‌کان ئاماده‌ن له‌ گه‌ڵ ڕژیمێک دانیشن گفتووگوو بکه‌ن، که‌ چل ساڵه‌ به‌ شێوازی جۆراوجۆر ده‌یانچه‌وسێنێته‌وه ‌و سته‌میان  لێ ده‌کات، به‌ڵام له‌ ته‌ک یه‌ک دانانیشن بۆ چاره‌سه‌ر کردنی گرفت و ئاڵۆزێکان، که‌ هه‌مووشیان یه‌ک ئامانج و یه‌ک ڕێگاو یه‌ک خه‌ونیان هه‌یه.

بابەتی پەیوەندی دار

عومەر ئیلخانی زادە دەنگۆی دانیشتن رەد دەکاتەوە