به‌شدارییه‌ك به‌بێ‌ نان، عارف قوربانی

له‌م یه‌ك دوو رۆژه‌ باس و خواس گه‌رمن له‌سه‌ر ئه‌وه‌ی راسپێردراوی شیعه‌كان بۆ پێكهێنانی حكوومه‌ته‌كه‌ی به‌غدا، به‌ڵێنی ئه‌وه‌ی داوه‌ له‌ مووچه‌ی شه‌ش مانگی راگیراوی خه‌ڵكی كوردستان، به‌شی دوو مانگمان بداته‌وه‌.

به‌ڵام دوێنی سه‌رۆكوه‌زیرانی هه‌رێمی كوردستان ئه‌و قسه ‌و باسانه‌ی به‌ بێ‌ بنه‌ما له‌قه‌ڵه‌مدا و گوتی هیچ ئومێدێك نییه‌ كه‌ “عه‌بادی” بڕیار له‌سه‌ر ناردنی بوودجه‌ی هه‌رێمی كوردستان بدات.

وه‌فدی دانوستانكاری هه‌رێمیش، كه‌ ماوه‌ی هه‌فته‌یه‌ك زیاتره‌ له‌ به‌غدا ده‌ستیان به‌ كۆبوونه‌وه‌كانیان كردووه‌، هه‌ڵوێستی راسپێردراوی حكوومه‌تیان به‌و جۆره‌ خسه‌ڕوو كه‌ ئه‌ویش گوتوویه‌تی له‌چوارچێوه‌ی ده‌ستووردا ده‌بێت ئه‌و پرسانه‌ چاره‌سه‌ر بن، ئه‌مه‌ش جارێكی تر كورد ده‌باته‌وه‌ سه‌ر هه‌مان ئه‌و قه‌وانه‌ی مالیكی لێی ده‌دا.

كورد و سوننه‌كان رێگه‌ی جۆراوجۆر و فشاری زۆریان به‌كاربرد بۆ گۆڕینی “مالیكی” كه‌ پێیان وابوو به‌شی زۆری كێشه‌كان په‌یوه‌سته‌ به‌ عه‌قڵیه‌تی تاكڕه‌وانه‌ی حوكمڕانیی مالیكییه‌وه‌، به‌ڵام ئاسۆیه‌كی روون نییه‌ له‌وه‌ی “عه‌بادی” له‌چیدا جیاوازیی ده‌بێت له‌گه‌ڵ مالیكی.

به‌تایبه‌ت له‌ هه‌لومه‌رجێكی وه‌ك ئێستایا، كه‌ هێشتا نه‌یتوانیووه‌ كابینه‌ی حكوومه‌ته‌كه‌ی پێكبهێنێت و زۆر پێویستی به‌ به‌شداریی كورد هه‌یه‌ له‌ به‌شداری و له‌ متمانه‌پێدانی، كه‌چی ئاماده‌ نییه‌ ته‌نانه‌ت به‌ڵێنی زاره‌كیش بدات له‌ كۆی كێشه‌ هه‌ڵه‌پسێردراوه‌كانی نێوان هه‌ولێر و به‌غدا، لانی كه‌م ته‌نها به‌ڵێنی گه‌ڕانه‌وه‌ی قووتی خه‌ڵك بدات، كه‌ شیعه‌كان شه‌ش مانگه‌ بڕیوویانه‌.

كورد چاوه‌ڕێی زۆری ده‌كرد ئه‌گه‌ر بتوانرێت مالیكی له‌سه‌ر كار لابدرێت، به‌دیله‌كه‌ی مالیكی هه‌ركه‌سێك بێت په‌ند له‌ هه‌ڵه‌كانی پێشخۆی وه‌رده‌گرێت و به‌شی زۆری كێشه‌كانی نێوان كورد و عه‌ره‌ب هه‌نگاوی كرداریی بۆ چاره‌سه‌ریان ده‌گیرێته‌به‌ر. به‌ڵام ئاماژه‌ سه‌ره‌تاییه‌كان ئه‌وه‌مان پێده‌ڵێن كه‌ ئه‌و ئومێده‌ خه‌ونی شاعیرانه‌یه‌.

هه‌ر له‌سه‌ره‌تاوه‌ پێمان ده‌ڵێن كه‌ به‌شداریتان، نه‌ك نابێته‌ مایه‌ی چاره‌سه‌ری كێشه‌كانی كه‌ركوك و 140، نه‌ك نابێته‌ مایه‌ی چاره‌سه‌ری كێشه‌ی پێشمه‌رگه‌ و پێدانی ئیستیحقاقه‌ ده‌ستوورییه‌كانی، نه‌ك ناكرێت چاوه‌ڕوانی قه‌ره‌بووی تاوانه‌كانی جینۆساید بین، ته‌نانه‌ت به‌شداریمان نابێته‌ مایه‌ی پێدانه‌وه‌ی قووتی خه‌ڵكیش. ئه‌مه‌ خه‌یاڵكردنی من نییه‌، ئه‌مه‌ تۆمه‌تی ناڕه‌وا نییه‌ بیده‌ینه‌ پاڵ شیعه‌ ده‌ستڕۆیشتووه‌كانی به‌غدا. به‌ڵكو ئه‌وه‌ سه‌ره‌تای لێكگه‌یشتنی نێوان ئه‌وان و وه‌فدی دانوستانكاری كورده‌ له‌ به‌غدا.

لێره‌وه‌ بۆ مێژوو پرسیارێك دروست ده‌بێت، ئه‌رێ كورد له‌پای چی ئه‌و متمانه‌یه‌ی دا به‌ شیعه‌كان بۆ پێكهێنانی حكوومه‌ت، له‌ به‌رانبه‌ر چی “عه‌بادی”ی راسپارد.؟ چی به‌ڵێنێكی نووسراوی لێوه‌رگرت بۆ چاره‌سه‌ری كێشه‌كانی كورد و لانی كه‌م گه‌ڕانه‌وه‌ی نانی میلله‌ته‌كه‌مان.

چی ده‌بوو ئه‌گه‌ر بۆ یه‌كجار كورد ببوایه‌ته‌ هۆكاری دروستكردنی ئه‌زمه‌یه‌ك له‌ عێراق و سه‌رۆككۆمار، كه‌ پشكی نه‌ته‌وه‌ییی كورده‌، ده‌سه‌ڵاتی ده‌ستووریی هه‌یه‌ له‌ دیاریكردنی كاره‌كته‌ری راسپێردراو بۆ پێكهێنانی حكوومه‌ت، به‌بێ‌ مه‌رجی پێشوه‌خته‌ راینه‌سپاردایا.؟

ئایا كاتی ئه‌وه‌ نه‌هاتووه‌ بیرێكی وردتر بكه‌ینه‌وه‌ له‌وه‌ی ئه‌گه‌ر به‌شداریكردنێكمان له‌ حكوومه‌تی شیعه‌كان له‌ به‌غدا نه‌بێته‌ مایه‌ی ته‌نها پێدانی مووچه‌ به‌ فه‌رمانبه‌ره‌كانمان، نه‌كردنی باشتر نییه‌.؟ چی ده‌چنینه‌وه‌ له‌وه‌ی به‌شداریی پێكهێنانی حكوومه‌تی به‌غدا بكه‌ین.؟ له‌كاتێكدا كێشه‌كانی ئێمه‌ و مافه‌كانی كورد له‌ مووچه ‌و بوودجه‌ گه‌وره‌ترن، به‌ڵام ئه‌وان كه‌ ئاماده‌ نه‌بن ئه‌و به‌شه‌ كه‌مه‌ی مافه‌كه‌مان بده‌نه‌وه‌، خۆگێلكردن و خۆ هه‌ڵخه‌ڵه‌تاندنه‌ چاوه‌ڕوانی زیاتریان لێبكه‌ین.

ده‌بێت نیه‌تی حوكمڕانانی قۆناغی داهاتووی به‌غدا ببه‌ستینه‌وه‌ به‌و ده‌ستپێكه‌ بچووكه‌وه‌ و، هیچ شه‌رمی ناوێت، داوا بكرێت بوودجه‌ی شه‌ش مانگی راگیراوی هه‌رێم پێشوه‌خته‌ بنێرن تا له‌گه‌ڵتان كۆبینه‌وه‌، كه‌ پێویست بوو ئه‌وه‌ مه‌رجی سه‌رۆككۆمار بووایه‌ بۆ دیاریكردنی كاندیدی راسپێردراو. ئه‌گه‌ر یه‌كه‌م هه‌نگاو ئه‌م خواسته‌ بچووكه‌مان پێنه‌یه‌ته‌دی، ئه‌وه‌ به‌دڵنیاییه‌وه‌ ده‌بێت بۆ چوارساڵی داهاتوو هه‌موومان بڵێین هه‌زار ره‌حمه‌ت له‌ “مالیكی”.

 

 

سەرچاوە: هەولێر