جووت حەوت ، هەوراز

ـ قاوەخانەیەك لەو بەرمان هەیە كە خاوەنەكەی دەڵێ هەر لە بنەڕەتەوە لە سەر بنەمای بیری نەتەوایەتی و بۆ خزمەتكردن بەو ڕێبازە دامەزراوە، هەڵبەت ماوەیەك حوجرەی قەقێیان بوو، ماوەیەكیش چەقەخانەی حەزرەتی ماركس و ئایەتوڵڵا ئێنگلس بووە

دواتریش بوو بە تەكیەی شێخ ئەولەسەن، ئێستاش كە سەردەمی پۆست مۆدێرنە و بیستوویانە لە تیۆریخانەی شاخ، نیسكاوی نەزری دەدەن، بۆ دەستكەوتنی پاروویەك نیسكاو دۆ و دۆشاویان تێكەڵ كردووە و قۆڵیان لە داڕشتنەوەی سەرلەنوێی مێژووی خۆیان هەڵماڵیوە یان بە واتایەكی دیكە شانیان لە قازانی نیسك شل كردووە و ئیستا مەخۆ، كەی بخۆ؟

هەڵبەت دەڵێن ئێمە لە مزگەوت و مەیكەدە و تەكیە و كابارە و دیوەخان و دیسكۆ،شاعیرگوتەنی دەردمان هەر دەردی كورد بووە و بە ئێسك و رەگ و ئێسقانەوە نەتەوەیی بووینە و هەین، هەر بۆیە ئەگەرچی قاوەخانەكەمان كردۆتە جومعەبازاڕی نوێژخانەی زانكۆی تاران، یان بە دەستێك «كاپیتاڵ»ی ماركسمان هەڵگرتووە و بە دەستی دیكە زەرگمان وەشاندووە، یان لە مەنجەڵێكدا فاسۆلیای تەڵقینی مردوومان لەگەڵ پیتزای فەلسەفەی ئانارشیزم و ماتریالیزمی دیالێكتیك پێكەوە كوڵاندووە، یان لە بەر پووڵێكی ڕەش، مەجلیسی شینگێڕیمان كردووە بە زەماوەندی یەك بووك و هەزار زاوا، بەڵام خسڵەتی نەتەوەیی بوونمان لە دەست نەداوە و بۆ كوردمان كردووە و هەموو تاك و لایەنێكی كوردی تا بینەقاقا چەقیوەتە نێو قەرزی كوردایەتیی ئێمە و هەر كەسێكیش گومان لە نەتەوەیی بوونمان بكات، لە سەرەولێژیی قەبردا دەست لە یەخەی ناكەینەوە و لە كۆڵی نابینەوە.

ـ عەلی لاریجانی، سەرۆكی مەجلیس و برای سەرۆكی دەزگای قەزایی و سەرۆكی ستادی مافی مرۆڤ و دوو سێ سەرۆكی دیكەی كۆماری ئیسلامی، ڕایگەیاندووە كە دەیهەوێ حیزب پێك بهێنێ، چوونكە بەو قەناعەتە گەیشتووە كە پێكهێنانی حیزب لە ئێراندا كارێكی باشە.

هەڵبەت كاتێك كە لاریجانییەك لە لاریجانییەكان بە كارێك دەڵێ «باش، مەبەست ئەوەیە كە نانی تێدایە. بەڵام ئەوە بۆ وڵاتانی دیكەیە كە بۆ گەیشتن بە نان یا دەسەڵات دەبێ حیزب پێك بهێنی، نەك بۆ ئێران.

لە ئێراندا بۆ گەیشتن بە دەسەڵات پێویست ناكات خۆت لە سەرئێشەی حیزب و حیزبایەتی بدەی، بەڵكوو وەك باوكی لاریجانییەكان تەنیا دەبێ منداڵی زۆرت هبێت كە پێویستی بە وەرگرتنی مۆڵەتی وەزارەتی ناوخۆ و وەلیی فەقیهیش نییە و هەركامەیان دەبنە سەرۆكی دەسەڵاتێكی نێو حكوومەت.

ئەگەر تۆزێك زیاتر زەحمەتی بە خۆی دابا، بۆ نموونە ئێستا ناوی سەركۆماریش حەسەن لاریجانی بوو، ناوی وەلی فەیهیش ئایەتوڵڵا سەید عەلی خامنەیی لاریجانی بوو، یان تەنانەت ناوی سەرۆك وەزیرانی عێراقیش حەیدەر لاریجانی بوو.

ـ مەلا فەرەیدوون ڕوحانی ناسراو بە پرێزیدینت حەسەن، گوتوویە: «سەردەمی توندوتیژی و سەپاندنی دۆخی ئەمنیەتی بە سەر چووە».
پێتان وایە مەلا فەرەیدوون چۆن بەو مەسەلە گرینگەی زانیوە؟

1ـ « بەرەوسەر چوونی» ئاماری ئیعدامەكان لە سەردەمی «بەسەرچوونی وندوتیژیدا»

2ـ پرژاندنی تیزاو لە نێو چاوی كچانی خەڵك.

3- چەقۆ وەشاندن لە ژنی خەڵك بە مەبەستی ئەمر بە مەعرووف

4 ـ دەستدرێژیی بەكۆمەڵی 9 پیاو بۆ سەر دوو كچ لە سیرجان.

5ـ دەركەوتنی ئەوی كە زۆربەی ئەو كارانە لە لایەن برادەرانی بەسیجەوە ئەنجام دراون، بەڵام مەرج نیە بەسیج پێی گوتبن.

ـ سەید ئەحمەد عەلەمول هودا، پێشنوێژی هەینیی مەشهەد گوتوویە: «ڕێبەری ئینقلاب بۆ خۆی یەكێك لە ئەولیای خوایەمادەی 188ی یاسای بنەڕەتیش ئەمەی پشتڕاست كردۆتەوە».

یەكەم:ئەوەی كە باس لە وەلی دەكات مادەی 57ی دەستوورە نەك 188

دووهەم:ئەوەی كە باس لە وەلی فەقیه دەكات، مادەی 110ی دەستوورە نەك 188

سێهەم: یاسای بنەڕەتیی ڕێژیم لە بنەڕەتدا 177 مادەیە، نەك 188

 چوارەم: یاسای بنەڕەتی كیلۆی بە چەندە؟

سەرچاوە: ماڵپەری کوردستان میدیا