نە خوێن دەبەخشن نە پارە، محەمەد حاجى کەریم

داعش هەڕەشە لە هەمووان دەكات، كەچی باری گران بەتەنیا خراوەتە سەر شانی پێشمەرگە، وەك ئەوەی پاراستنی ئەو وڵاتە تەنیا ئەركی ئەو بێت.

ئەگەر بارودۆخەكە وەك خۆی ببینین، لەوە تێدەگەین پێشمەرگە بە تەنیا شەڕی هێزێكی ئەوەندە دڕندە دەكات، ئەگەر بۆی بلوێت تەڕ و وشك، گەورەو بچووك، موسوڵمان و نا موسوڵمان، پێكەوە دەسوتێنێ و شتێك لەسەر ئەو خاكە ناهێڵێتەوە بۆنی ژیانی لێبێت.

راستە هەموومان، ئەگەر بە دەنگێكی كزیشەوە بێت قسە دەكەین، دەستمان لەسەر دڵمانە و سەركەوتنی پێشمەرگە دڵخۆشمان دەكات، لێ زۆربەمان لە ئاست ئەو مەترسییە گەورەیەدا، دەستەوەستان دانیشتووین.

 پرسیار ئەوەیە، ئایا تەنیا قسەی زل و ستایشی پێشمەرگە بەسە؟ بە بڕوای من میللەت بە قورساییەكی زۆرەوە ئامادەیی قوربانیدانی تێدا نییە. وەك هەستی پێدەكرێ، بێ هەڵوێستی باڵی بەسەر زۆرینەدا كێشاوە، لە نێویشیاندا خەڵكی نوخبە و زەنگین و خاوەن پڕۆژە زەبەلاحەكان. وەك ئەوەی دەبێ هەر خەڵكی هەژار و بەشمەینەت پارێزەری وڵات و سووتەمەنی شەڕ بێ و ئەوانی دیكەش بۆ ئەوە خوڵقابن بە كەماڵی ئیسراحەت بژین.

راستە پێشمەرگە ئازایانە شەڕ دەكا و باكی بە مردن نییە، هەروەك چۆن تا ئێستا نزیكەی هەزار پێشمەرگە گیانیان بەختكردووە و نزیكەی چوار هەزاری تریش بریندارن، ئەمەش لوتكەی قوربانیدانە.

 پێشمەرگە لەگەڵ ئەوەی بارێكی گرانی لەسەر شانە، خۆی و خێزانەكەشی ژیانێكی سەخت دەرباز دەكەن، لێ هێشتا خاوەن ورە و ئیرادەیەكی بەهێزە و لە بەخشین ناكەوێ، ئەو خەمی میللەتی كردووەتە خەمی خۆی و لە پێناوی ئاسوودەیی گەلەكەی ناخەوێ و پشوو نادات.

لێ ئەوەی جێی داخ و هەڵوەستەیە، ئێمە ئەو راستیە نابینین و ئەوەی بە پێشمەرگەی دەبەخشین، لە قسە و دروشمی بریقەدار زیاتر شتێك نییە.  هەڵەیەكی گەورەیە، هەموو ئەركی پاراستنی ئەو وڵاتە بە پێشمەرگە بسپێرین و پێمانوابێ تەنیا پێدا هەڵدان و نزاو پاڕانەوەمان بۆ سەلامەتیی گیانیان بەسە و هەموو شتێك تەواوە.

بەگژداچوونەوەی هێزێكی تاریكپەرستی وەك داعش، تەنیا شەڕی نێو سەنگەرەكان نییە، یان رووبەڕووبوونەوەی ئەو مەترسییە گەورەیە تەنیا ئەركی پێشمەرگە نییە. ئەو شەڕە بۆ لە رەگدەرهێنانی نەتەوەیەك هەڵگیرساوە، بۆیە ناكرێ لە جوغزێكی بەرتەسكدا سەیری بكرێ و تەنیا چەند هەزار كەسێك رۆڵی بەرگری ببینن و عەوامیش لە دوورەوە سەیری بكاو چاوەڕوان بێ كەی ئاگرەكە دادەمركێتەوە.

بەداخەوە ئەوەی لەم رووەوە لەسەر ئەرزی واقیع دەبینرێت، جێی نیگەرانییەكی گەورەیە، ئەوانەی ئەمڕۆ ئامادەن بۆ گیانبەختكردن، هەمان ئەو كەسانەن كە لە رۆژگارە چارەنووسسازەكاندا قوربانییان داوە. یان كوڕ و نەوەی ئەوانەن كە دوێنێ سووتەمەنی بوون، بەڵام لە قۆناغی خێرو دەستكەوتدا لە هەموو شتێك بێبەش كران.

دڵنیام ئەوانەی ئەمڕۆش لەڕیزی پێشەوەی سەنگەرەكانی بەرگریدان و بوونەتە داینەمۆی پاراستنی ئەو وڵاتە، لە سبەی رۆژیشدا، ژیانیان لە ژیانی تێكۆشەرانی دوێنی باشتر نابێ. مەگەر ئەوانە بەرەكەی بخۆن كە لە دووری دوورەوەی بەرەكانی شەڕو لە شاشەی تیڤییەكانەوە، سنگیان دەردەپەڕێنن و وەك سەروەریی گەورە پێماندەفرۆشنەوە.

رەنگە زێدەڕۆییم نەكردبێ ئەگەر بڵێم ئەم شەڕە خێری بۆ زۆر كەس دەبێ، بەو مانایەی شەرعیەتی درێژەدان بە گەندەڵی بۆ زۆر بەرپرس و بازرگانی گەورە مسۆگەر دەكات. سبەی كێ ئەوەندە بوێر دەبێ، بەرامبەر سەرەڕۆیی و كەڵەگایی هەندێك بەرپرس و منداڵە وردكەی دەوروبەریان، ورتەی بێ و بێژێت ئەوی تۆ دەیكەیت هەڵەو نایاساییە؟ ئاخر بە بڕوای ئەو، لەبەر ئەوەی شەڕی داعشی كردووە، ئەوەندە هەقی بەسەرمانەوە هەیە، لە سەرووی یاساوە بێت و هەموو دەرگاكانی بە روودا كراوە بن. هەروەك ئێستاش بەو لۆژیكە لێدەخوڕن.

زۆرن ئەوانەی لە هیچەوە دەوڵەمەندبوون و سەریان ناوەتە جەستەی ماندووی ئەو وڵاتە، ئەمڕۆ نەك هەر شەڕی داعش ناكەن و هیچ رۆڵ و ئامادەییەكیان لەم قۆناخە هەستیارەدا نییە، بگرە ئێستەش هەر بە دوای دەستكەوتی زیاترەوەن. ئەوان نە خوێن دەبەخشن نە پارە، بەوەش ناوەستن و چاوەڕوانن، میللەت ئافەرین و دەستخۆشانەیان لێبكات.

پێشمەرگە دیوی نەرێنی رەوشەكە باش دەخوێنێتەوە و هیچی لێ شاراوە نییە، بەڵام چونكە خەمی ئەو تەنیا خەمی وڵات و ئاسوودەیی هاونیشتمانیانە، سوورە لەسەر باوەڕی بەهێزی نەتەوەیی و نیشتمانی خۆی و لەو بڕیارەی داویەتی پاشگەز نابێتەوە.

بەشداربوونی هەمووان لە پرۆسەی كۆتاییهێنان بەو دۆخە پڕ مەترسییە، ئەگەر لە ئاستێكی سنوورداریش بێ، ئەركێكەو دەرفەتی خۆدزینەوەی تێدا نییە. شەڕە سەختەكە هەڵوێستێكی روون و یەكلاكەرەوە لە هەموولایەك دەخوازێ و بێ وەڵامیمان لە ئاستیدا، پێكەوە دەمانسوتێنێ.

ئەو پرسیارەی پێویستە بەردەوام بكرێت، ئەگەر سەرمایەدارانی ئێمە، بەرپرس و بازرگانە گەورەكان، بە تایبەت ئەوانەی لە پڕێ بوونەتە كوڕێ، لەو رەوشە چارەنووسسازەدا بێ هەڵوێست بن و هیچ دەستپێشخەری و بەشدارییەكی بە كردەوەیان لێ نەبینرێت، ئەی دەبێ كەی كەڵكیان هەبێ؟ پرسیارێكە و پێموایە وەڵامەكەی لای هەمووان روونەوە و شەرحی ناوێ.

 

سەرچاوە: روداو