ئەگەر پەكەكە چەك دانێت, رێباز كوردۆ

1- ئەگەر پەكەكە چەك دانێ گەلی كورد لە باكوری كوردستان لە پاش چەندین دەیە وسەدە بە ئاشتی و ئازادی دەژی و دایكان چی دیكە جەرگیان ناسووتێ و كچان و كوڕان هەتیو نابن و ژنان بێوەژن نابن و شەڕی ماڵوێرانكەر كۆتایی پێ دێت.

2-

ئەگەر پەكەكە چەك دانێ چی دیكە كەسایەتی تاكی كورد لە باكوری كوردستان كەسایەتێكی سەربازی و ئایدۆلۆژیك نابێ و تاكی كورد دەوتوانێ بە واتای تەواوی وشە وەك مرۆڤ بژی رەهندەكانی دیكەی ژیانی مرۆڤێكی ئاسایی تێدا دەبوژێتەوە و چی دیكە تەنیا مرۆڤێك نابێ جگە لە شەڕ و تەقەی فیشەك وشاخ وكوشت و بڕ چی دیكە نەزانێ وەك مرۆڤێكی ئاسایی هەمو بەشەكانی ژیانی گەشە دەكاتەوە.تاكی كورد بۆ هەتاهەتایە لە شەڕی دو ئایدۆلۆژی ئاپۆئیزم و عوسمانیزم دێتە دەر

3-

ئەگەر پەكەكە چەك دانێ تاكی كورد لە باكور ئەگە خواستەكەی جێ بە جێ نەكرا هەڵنایە بو قەندیل و بۆ ئەوەی مافی بستێنی فێر دەبێ لە جیاتی چەك فێری كاری یاسایی و ئیداری بێ بۆ وێنە لە سەر بەتاڵ كرانەوەی قەباڵەی خانوو,دوكان,ماڵ, بەڵگەی خوێندنی زانكۆ,دانەمەزراندن, دەست بۆ چەك نابا فێر دەبێ بە دیالۆگی یاسایی خواستەكەی جێ بە جێ بكا نەك بە چەك.كورد وتەنەی كەم جیكڵدانە نابێ كەسێكی مەدەنی و گوێگر دەبێ.

4- ئەگەر پەكەكە چەك دانێ لایەنەكانی كەلتوری و ئابوری و كۆمەڵایەتی تاكی كورد لە باكور و لەوبەشانەی كە پەكەكە جەماوەری هەیە گەشە دەكات ئەوەش بۆ كۆمەڵگایەكی گەشە سەندو بەردی بناغەیە كە پێی دەوترێ گەشەی ئینسانی.ئیدی لە ژێر ئایدۆلۆژی ئاپۆئیزم تاك رەهند نابێ كە تەنیا شەڕ دەزانێ و شەڕ دەناسێ و لە كاری سەربازی بەولاوە چی دیكەی نەبیستبێ.

5-

ئەگەر پەكەكە چەك دانێ توركیا بیانوی پێ نامێنێ بە هۆی پەكەكەوە لە قەندیل باشوری كوردستان بوردومانی ئاسمانی بكا هەڕەشەی هێرشی زەوینی بكاو بە تۆپخانە ماڵ و ماڵاتی خەڵكی باشور قڕ كات.سنورەكان دەكرێنەوە و لە جیاتی گریلای دەست بەچەك بازرگانان لە سنورەكانەوە ئاودیوی عێراق و توركیا دەبن و گەشەی ئابوری سنورەكانیش دەگرێتەوە. باش دەزانین كە سنوری باشور باكور دەڕوازەی ئەوروپایە و چەندە خێر و بێری لێ دەكەوێتەوە بۆ كوردی ماڵوێران.

6-

ئەگەر پەكەكە چەك دانێ چی دیكە لە باشوری كوردستان یەكێتی نیشتمانی كە ئێستا بە هۆی قەیرانی رێبەری بێ سەرەوبەریی رووی تێكردوە لاوازیی خۆی بە هاوپەیمانی سەربازی لەگەڵ پەكەكە لە دژی بارزانی و پارتی ناشارێتەوە بەتایبەتی لە شنگال و یەكێتی ناچارە بۆخۆی سیاسەت بكا تا دیسان متمانەی خەڵك بە دەست بێنێ و خەڵك بۆ لای خۆی راكێشێ. كێشەكانی خۆی رەوانەی كەس و لایەنی دیكە ناكات لە دەرونناسی دا بەوە دەڵێن فەرافكەنی یانی تۆ لاوازی خۆت بخەیتە ئەستۆی شتی دیكە و بیشاریەوە. یەكێتی چی دیكە شەڕی خۆی لەگەڵ پارتی بە پەكەكە ناكات

7-

ئەگەر پەكەكە چەك دانێ رۆژهەڵاتی كوردستان و بزوتنەوەی رەواكەی دەبوژێتەوە و لە سەر لاقی خۆی ڕادەوستێ حزبەكان لە هەیمەنەی پەكەكە ناترسێن كە جێگای ئەوان پڕكاتەوە و پەژاكیش كە پارتێكی مەجعولی دەستی پەكەكەیە نەك خواستی راستەقینەی خەڵك و لە هەناوی خەڵك دەرنەقوڵیوە هەڵدەوەشێ ورێگا بۆ نزیكبونەوەی حزبەكانی رۆژهڵات خۆش دەبێ وپەژاك نامێنێ كە بە سەرباز كوشتن و ترس بڵاوكردنەوە كاری حزبەكان تێك دا.

8

ئەگەر پەكەكە چەك دانێ لە رۆژهەڵاتی كوردستان دا ئەو خەڵكەی لە ژێر ئایدۆلۆژی ئاپۆئیزم نیشتمانی خۆیان لە بیر كردبووو خزمەتیان بە پارتێك و ئایدۆلۆژیایەك دەكرد كە هیچی بۆ رۆژهەڵات بە دیاری نەهێناوە و ناهێنێ وگەریلاكانی رۆژهەڵاتی دەبرد لە باكور و رۆژئاوا بە شەڕی دەدان و كێشەی رۆژهەڵات و كەلتور و مێژووی رۆژهەڵات وخەباتی رۆژهەڵاتی پێ لە بیر بردبوونەوە, نامێنی وئیدی ئەوان ناچارن یان بچنە توركیا كە توركیا بێ گومان ناسنامەیان پێ نادا یان دەبێ بێنەوە ئێران و دانیشن یان دەبێ بچنە ئەوروپا یان خەباتێكی دیكە بۆ رۆژهەڵات بگرنە بەر و خەمی ستەمی رۆژهەڵات بخۆن و هێزێكی زۆریشن و دەتوانن تینێكی دیكە بە بزوتنەوەی رۆژهەڵات بدەن و چی دیكە هێزی خۆیان بۆ پارچەكانی دیكە خەرج نەكەن- تاماڵ بیهەوێ بە مزگەوت حەرامە-

9-

ئەگەر پەكەكە چەك دانێ دوایین ئایدۆلۆژی سەدەی بیستەمی كورد كە ناسیۆنالیزمێكی ئارمانگەرا و بەرچاوتەنگی كورمانجی بوو تەواو دەبێ و كورد فێر دەبێ بە بێ ئایدۆلۆژی خەبات بكا,سیاسەت بكا گوێ بۆ قسەی كەسانی دیكە بگرێ , وانەزانێ هەر قسە و بیری ئەو راستە و ئەوانی دیكە هەڵەن؛ كزن, نازانن. ئیتر كورد بە تایبەتی لایەنگرانی ئاپۆئیزم فێر دەبن مەدەنیانە و پلۆرالیزمانە خەبات بكەن سیاسەت بكەن.

10

ئەگەر پەكەكە چەك دانێ كۆماری ئیسلامی ئێران بیانوی نامێنێ بە هۆی پژاكەوە كۆڵبەران و كاسبكارەكانی كوردی سەر سنورەكان بكوژێ و لە سێدارەیان دا- هەڵبەت كۆماری ئیسلامی دڕندە دەمێنێ و زیندانی سیاسیشی دەمێنێ بە ڵام بە بیانوی تیرۆریست ناتوانێ كەس بكوژێت چونكە پاش 36 ساڵ كۆماری ئیسلامی نەیتوانیوە بە دیموكڕات و كۆمەڵە كە دوژمنینی بڵێ تیرۆریست پێیان دەڵێ دژی ئینقلاب. چۆن بە ڕاستی باش دەزانێ ئەوان پرنسیپەكانی شەڕ دەپارێزن و خەڵك ناكوژن و ناتۆقێنن ئەوان نایانهەوێ بیانوو بدەن بە كۆماری ئیسلامی كوردستان زۆرتر میلیتاریزە بكا بەڵام تا ئێستا پەژاك وای كردوە.

11

ئەگەر پەكەكە چەك دانێ ژنی كورد لە بیری فێمێنیزمی ئاپۆئیزمی رزگاری دەبێ و دەتوانێ جیهان لە دەلاقەیەكی دیكەوە تماشا كا. دەتوانێ بخوێنی رەوشنبیربێ چالاك بێ بەڵام چەك هەڵنەگرێ.ژن بێ نەك چەك لە شان و بە جلی پیاوان وەك پیاوان بیربكاتەوە و قسەبكا ژنایەتی خۆی بكوژێ. لە جیهانی پێشەكەوتوی ئەمریكا و ئەوروپا دا ژنان چالاكن بەڵام نابنە پیاو و ژنایەتی خۆیان ناكوژن لەو پەڕی چالاكی و رەوشنبیریش دان. پەكەكە و ئاپۆئیزم ژنی رزگار نەكردوە بە داخەوە كردویە بە پیاو و بەراستی لە پاش چەك دانان زۆر ئەستەمە بۆ ئەو كچە گەریلایانە لەگەڵ جیهانی ژنان دیسان ئاشت ببنەوە ئیدی ژیانی ئاسایی بۆ ئەوان ناخۆش دەبێ دوور نییە زۆریان خۆ بكوژن

12

ئەگەر پەكەكە چەك دانێ رۆژئاوای كوردستان لە پاش سەركەوتن بە سەر تیرۆریستانی داعشی توركیایی شەڕی براكوژی ناكەن و ئەزمونی باشور دوپات ناكەنەوە بە هێزی دیالۆگ و مەنتق و ئەرگۆمێنت یەكڕا دەدوێن نەك چەك ئەوەی ئێستا دەیبینین یەپەگە بە هۆی هێزی سەربازی توانیویەتی ئەنەكەسە سەركوت كا و خۆی تاكە هێز بێ.

13

ئەگەر پەكەكە چەك دانێ تاكی كوردی باكور و لایەنگری ئاپۆئیزم فێر دەبێ جیهانی ئەمڕۆ جیهانی كاریزماكان نییە بە قسەی كام بەختیار عەلی جیهانی مەدەنیە لە جیاتی یەك دەنگ و رەنگ و بیر هەمو جۆرە دەنگ و رەنگ و بیرێك بۆی هەیە لە مەیدان بێ و خەبات بكا. لایەنگرانی ئاپۆئیزم فێر دەبن كە رێبەرەكەیان لە جیاتی ئەوان بیر نەكاتەوە لە جیاتی ئەوان نەنوسێ لە جیاتی ئەوان نەخوێنێتەوە لە جیاتی ئەوان بڕیار نەدا.فێر دەبن ئەوانیش مرۆڤن و ئاپۆش مرۆڤە دەكرێ ئاپۆش هەڵە بكا. بۆیە بۆخۆیان بیر دەكەنەوە, دەنوسن, دەخوێنن, و بڕیار بۆ چارەنوسی ژیانی خۆیان بدەن. ئێمە دەزانن ئاپۆ وەم ئایین ژیانی تاكی و تایبەتی مرۆڤی كوردی دیاری كردوە كەسێكی ئاپۆئیزم دەبێ وەك ئایین دەكاریان بێنێ لە وردترین شت تا درشت ترین شت ئاپۆئیزم ژیانی تاكی كوردی تەنیوە.

14

ئەگەر پەكەكە چەك دانێ ئیدی ئاپۆ لە جیاتی 45 میلیۆن كەس بیرناكاتەوە و ئەو عەقلی گشتی و روناكیدەر و رێشاندەر نییە تا بڕیاریان بۆ بدا لە فلانە پارچە وا بكەن لە فیسارە پارچە وا بكەن . ئاپۆ هونەر بكا دەتوانێ لە مەیدانی عەمەل دا گەلی باكور بەختەوەر كا چ بگا بە 4 پارچەی كوردستان؟ كورد لە پارچەكانی دیكە پلانی تایبەت بەو وڵاتەی هەیە كە تیایدا دەژی .ئاپۆ نوسخەیەكی بۆ 4 پارچەی جیاواز نوسیوە. وەك ئەوە وایە كەسێك شێرپەنجە و كەسێك هەڵامەت و كەسێك دڵەكوتە و كەسێك سەر ئێشەی هەبێ بە هەموان بڵەی ئیستامینافۆن بخۆن چاك دەبن.

15

ئەگەر پەكەكە چەك دانێ و هاتەگۆڕەپانی سیاسی دەردەكەوێ كە پاش چەند ساڵ ئایدۆلۆژی بڵاوكردنەوە و بە خۆدا هەڵگوتن كە ئێمە تێگەیشتوین و حزبەكانی دیكە كۆنەپەرستن تێنەگەیشتون چۆن كاری عەمەلی سیاسی دەكا.بڵەی پەكەكە ئەوەندە لێهاتوو نەبێ لە جێ بەجێ كردنی خواستی عەمەلی كوردان كە گەلی باكور دەنگ بە ئاكەپە بدەن؟ كاری سیاسی عەمەلی لەگەڵ قسەی زەلام و ئایدۆلۆژی بڵاوكردنەوە جیاوازە زۆر حزب بوونە كە هاتونەتە گۆڕەپانی كاری عەمەلی خەڵك پشتی تێ كردون. چون كورد وتەنی قونی ڕەش و سپی دەردەكەوێ ئەو كات.

ئەگەر پەكەكە چەك دانێ كۆنگرەی نەتەوەیی كورد ناڵێم ساز دەبێ بەڵام لە سازبوونی نزیك دەبێتەوە.چۆن لەمپەڕی سەرەكی لە بەردەم سازنەبوونی هێزی چەكداری پەكەكە و پارتی و یەكێتی و لە پاشان حزبەكانی رۆژهەڵات بووە.چۆن بەچەك قسەیان كردوە پێیان وابوە هێزەكەیان چەكە نەك بیری ناسیۆنالیستی و بەرژەوەندی گەلی كورد.ئیدی پەكەكە چەكی نامێنی بە چەك قسەی خۆی بە سەر هەمو كەس و پارتێك دا بسەپێنێ. لە باشوریش هەنگاوی باش لە ئارادا پێشمەرگە سەر بە حزب نەبێ كاك مەسعود فەرمانی داوە و پاڕلمانیش بڕیاری داوە ولە نێو یەكێتی و پارتیش دا كەسە باشەكانیان بەوە رازین. ئیدی ئەو كات بیری قەوی ئەرگۆمێنتی قەوی و بیری خرمەت و نەتەوەی كورد دەیباتەوە نەك چەك و گەریلای زۆر.

17

ئەگەر پەكەكە چەك دانێ حیزبەكانی جەماوەریی رۆژهەڵات وەكو دێموكڕات و كۆمەڵە دەستیان ئاوەڵا دەبێ بۆ سیاسەت بۆ خەبات بۆ بەرنامە دانان.چۆن باش دەزانین لە سەردەمی ئیسلاح تەڵەبانی ئێران پەكەكە دەستی لە دەستی كۆماری ئیسلامی نا سنورەكانی بۆ داخست و نەیهێشت پێشمەرگەی دیموكڕات و كۆمەڵە بچنەوە ناو خەڵك و خاكی خۆیان. ئەو جار رۆژهەڵات میحوەری ڕمێنی دەبێ. چی دیكە گەنجانی رۆژهەڵاتی خۆیان ناپسێنن بۆ ئەوەی پارچەیەكی دیكە رزگار بكەن كە پارچەكەی خۆیان پڕە لە ستەمی نەتەوەیی.هاوخەمی نیشتمانی و پشتیوانی مەعنەوی شتێكە خۆ بەكوشت دان بۆ شوێنێك كە شوێنەكەی خۆت زۆر زیاتری پێویستە شتێكی ترە. هێز و گوڕ و تینی خۆیان بۆ ئامانجەكانی رۆژهەڵات خەرج دەكەن و كێشەی كوردی رۆژهەڵات بە تۆبزی پەكەكە لە بیر ناكەن.پەكەكە تا وێستا ویستۆیە گەنجی رۆژهەڵات و باشور بۆ روداوی باكور و رۆژئاوا بێنە مەیدان و سەر شەقام روداوەكانی باكور وقسەی ئاپۆ پێ و شوێن بگرن و پێی حەساس بن بەڵام رۆژهەڵات بڤەیە. بەداخەوە لە ژێر كاریگەری ئاپۆئیزم گەنجی خوێندكاری وامان هەیە تەواوی گوندودۆڵ و شارەكانی باكور و توركیا دەناسێ و ناویان دەبا. مێژووی توركیای سەرلەبەری لەبەرە كورمانجی فێر بووە تەنانەت كچان و كوڕانی هەوڕامانی و كرماشانی و لوڕیشی هان داوە كورمانجی فێر بن چۆن زمانی گوفتمانی ئاپۆئیزمە.بەڵام هەر ئەو گەنجانە دێڕێكیان لە سەر مێژووی رۆژهەڵات و نەهامەتیەكانی نەخوێندۆتەوە و زمانی سۆرانی نازانن بینوسن بیخوێنن. شار و دۆڵ و گوندەكانی رۆژهەڵات نازانن مێژووی رۆژهەڵات و خەباتەكەی نازانن.مێژووی ئێران هەر پێشكەشی خۆیان. ئیدی ئەو بەرجەستە سازیەی كە پەكەكە دەیكرد و ناسیۆنالیزمی بەرچاوتەنگانەی كورمانجی وەڕێ خستبوو نامێنێ.

18

ئەگەر پەكەكە چەك دانێ رۆژهەڵاتی كوردستان لە حاڵەتی (واكونەشی)كاردانەوەیی دەردێت. پەكەكە تا ئێستا ویستویە رۆژهەڵات گوێ ڕایەڵی ئەو بێ بۆ روداوەكانی باكور واكونەش وكاردانەوەی هەبێ. میدیا و نوسەر و بلاڤۆكی پەكەكە هەر ئەو بیرەیان بڵاوكردۆتەوە. پەكەكە وایكردبوو كە گەنجی رۆژهەڵات بۆ كێشەكانی ئەو بنوسن بۆ بیری ئەو بنوسن بۆ بیری ئەو بخوێنن بۆ ئایدۆلۆژی ئەو تێكۆشن و تەبلیغات بكەن. واتە رۆژهەڵات سەربەخۆ نەبێ لە بڕیار دان و دۆزینەوەی كێشەكانی دەبێ پەكەكە بڵێ كێشەی رۆژهەڵات چییە و چ نییە؟دوایین نمونەی مانی بەندكراوانی سیاسی ورمێ بوو كە ئەگەر ئەو مانە لە باكور با بێ گومان پەكەكە وای دەكرد بە زۆری جەماوەرەكەی بێنە سەر شەقامەكانی مهاباد و سنە و ورمێ و تەنانەت خۆیان بە كوشتیش بدەن. بەڵام چۆن بەندكراوی ئەو نەبوون بە كێشەی خۆی نەزانی. پەكەكە حەزی نەدەكرد كورد لە ماڵی خۆی لە رۆژهەڵات خاوەن بڕیار و سیاسەت و ستراتیژی بێ. قسە دەبا قسەی ئەو با.ئیدی ئەوەش تەواو دەبێ رۆژهەڵات بۆ خۆی بڕیار دەدا چ كێشەیە بۆ كورد لەو پارچەیە و چ نا؟ بۆ چ بێتە سەر شەقام و بۆ چ نا؟ بەڵام نابێ وا بیر بكەین ئێمە نامانهەوێ پشتیوانی سیاسی و مەعنەوی لە پارچەكانی دیكە بكەین. پشتیوانی دەكەین مەعنەوی نەك گیان و سەر و ماڵ و خۆ بەكوشت دان. جارێ ماڵ لازمیەتی بە مزگەوت حەرامە.چۆن خزمەتی رۆژهەڵاتیەكان بە باكور چ دەردی لە رۆژهەڵاتی سارێژ نەكردوە و ستەمی نەتەوەیی هەر وەك خۆیتی.

19

ئەگەر پەكەكە چەك دانێ لە زانكۆكانی رۆژهەڵات و باشور گەنجان رۆژنامە و بلاڤۆك دەرناكەن هەر كێشەی باكور بیری ئاپۆ لە چاپ دەن چۆن وڵاتە داگیركەرەكەی خۆیان واتە ئێران چی لە دەست نایە و نایكا مافی گەلی باكور لە توركیا بستێنێ.لە تاران بلاڤۆكی وا هەبوە خوێندكاران دەریانكردوە باس لە مێژووی توركیا و پەكەكە و كێشەی كورد لە باكور كراوە و داوای مافی ئەوانی كردوە باشە كاكە كۆماری فاشیستی ئیسلامی چ بكا بۆ ئەو كێشانە؟ ئیدی خوێندكاری رۆژهەڵاتی باسی رۆژهەڵات دەكا باسی قەدەغەبوونی خوێندنی زمانی كوردی لە ئێران دەكا باسی كێشەی كورد لە ئێران دەكا یان تەنانەت بۆ ئەوە بیر دەكاتەوە.تاوانی كۆماری ئیسلامی لە قاو دەدا باسی بزوتنەوەی سەربەخۆی خوێندكاری لە رۆژهەڵات دەكا. ئەگەر ئێران وڵامی بۆ ئەو چینە رەوشنبیرە نەبوو ناڕەزایی دەردەبڕن مان دەگرن بلەخەرە شتێكیان پێ دەكرێ.

ئیدی خوێندكاری رۆژهەڵات گوفتمانی ئاپۆئیزم چاوی تاریك ناكا دەرزی لە چاوی توركیا دا ببینێ گاسن لە چاوی ئێران دا نەبینێ. ئارمان شاری ناكوجا ئابادی ئاپۆ وەلادەنێ و خۆی بۆ شێت و شەیدا ناكا گوفتمانێكی ریالیزمانە و مافخوازنەی خۆی دەبێ. بۆ رۆژهەڵات دەنوسێ دەخوێنی و بیر دەكاتەوە. گوفتمانێك كە ناسیونالیزمەكەی لە چوارچێوەی شێوەزاری كورمانجی خاكی باكور و رۆژئاوا و میدیاكانی پەكەكە دانابێ. بەڵكۆ شوناسێكی مەدەنی و نەتەوەیی و مافخوازنەی دەبێ كە بازنەی تێكۆشانی رۆژهەڵات و سنە و كرماشان و مهاباد و ورمێیە نەك ئامەد.داوای مافی گەلی كورد دەكا بۆ هەر 4 پارچە بەڵام لە رۆژهەڵات تێدەكۆشێ و هێز بۆ ئەو خەرج دەكا

20

ئەگەر پەكەكە چەك دانێ باسكێكی بە هێزی هێڵی موقاوەمەتی ئێران لە ناوچەكە دا نامێنێ كە پەكەكەیە ئێران و پەكەكە و سووریا و حیزبوڵلآ لە كێشەكانی ئێستای رۆژهەڵاتی ناڤین دا هاوپەیمانن و دژی رۆژئاوان بە قسەی خۆیان دژی مودێرنیتەن و دەیان هەوی ناوچەكە بگەرێنەوە بۆ پێش سەرهەڵدانی سەرمایەداری و نەهێڵن رۆژئاوا لێرەكانە بمێنێ.ئیدی ئەوە نامێنێ كە پەكەكە لە سەر حیسابی گەلی كوردی رۆژهەڵات لەگەڵ ئێران رێككەوێ شتی لێ وەرگرێ چەكی لێ وەرگرێ گوشار بۆ هەرێمی كوردستانی عێراق بێنێ تا بە ئیمتیازەكانی خۆی بگا. ئیدی ئەو سیاسەتە قێزەونە واتە خەبات لە سەر حیسابی پارچەكانی دیكە تەواو دەبێ چۆن هەر پەكەكە ئێستا وا دەكا. پەكەكە هەر كات لەگەڵ ئێران سازاوە پەژاك ون بووە چۆتەوە توركیا هەر كا لەگەڵ ئێران دمەقڕەیان بووە پەژاك سەروكەلەی پەیدابووە و سەربازی بێ تاوانی كوشتوە و ئاژاوەی لە وڵات ناوە.ئیدی ئەوەش تەواو دەبێ.

21

ئەگەر پەكەكە چەك دانێ لە باكور لە ژێر هەیمەنەی چەكدارانەی پەكەكە كە وێژە و ئەدەبیات بە تەواوی لە ناو چووە دەبوژێتەوە و ئێمە دیسان شایەتی خانی و مەلای جزیری و … ببینەوە چۆن چەك ناهێڵی لە هیچ شوێمێك ئەدەبیات گەشە بكا.

22

ئەگەر پەكەكە چەك دانێ ئەو تاك حیزبیە لە باكور تەواو دەبێ و حیزبی دیكەش سەر هەڵدەدەن و دێنە مەیدان پەكەكە بە زۆری چەك نەیاری و رەخنەگری خۆی سەركوت كردوە لە باكور . ئیدی پلۆرالیسمی سیاسی لە باكور سەرهەڵدەدات وئەوەش یانی دیموكڕاسی.

 

 

رێباز كوردۆ- ماستەری سیاسەتی نێودەوڵەتی

2015/03/04