بۆ چی کتێبەکەی کاک مستەفا هیجری وەک خۆی ناخۆێننەوە؟ هیوا گوڵ محەممەدی

من کتێبی نسکۆ و دابڕان لە نوسینی کاک مستەفا هیجری سکرتیری  گشتی حیزبی دیموکراتی کوردستانی  ئێرانم خۆێندەوە کە پێک هاتوە لە دوو بەشی سەرەکی، واتە ئاماژەدان بەتێروری دوو سەرکردەی شهید، دوکتور قاسملو و دوکتور سەعید و هەروەها باسکردنی جیابونەوەکان لە حێزبی دیموکراتی کوردستانی ئێران لە 1980،1988 و 2006 دا.

 لەم رۆژانەدا باسکردنی ئەو کتێبە و هەڵۆیستی کاک مستەفا هیجری هەموو لاپەڕە کۆمەڵایەتیەکانی تەنیوەتەوە بەتایبەت لاپەڕەکانی فەیسبوکی   ئەندامانی حیزبی دیموکراتی کوردستانی ئێران و حیزبی دیموکراتی کوردستان.

 ئەوەندی چاوەدێری ئەو هەڵۆیستانەم کردوە ،بەداخەوە لە هەر دوو لاوە زیادەڕەوی زور دەبینم. ئەوانەی کە لایەنگری کاک مستەفان بە بێ ئەوەی بە تەواوەتی ناوەروکی کتێبەکەیان خۆێندبێتەوە دیفاع دەکەن و دەستیان ناوەتە بیناقاقای رەخنەگرانی کتێبەکە و لە لایەن دژبەرانی کاک مستەفاشەوە کە زیاتر هاوریانی حیزبی دیموکراتی کوردستانن زور بێ  بەزەییانە هێرش دەکەنە سەر کاک مستەفا و هەموو هۆکاری هێرشەکانیش دەگەڕیننەوە بۆ ئەوە کە ئەو کتێبە و ئەو هەڵۆیستەی کاک مستەفا هیجری کۆشکی هیوای یەکگرتنەوەی حیزبی روخاندوە.

 سەرەنج راکێش ئەوەیە کە کەسانێکی زور هەن لە بەرەی موخلیفیشدا کتێبەکەیان نەخۆێندوەتەوە و دیسان بە توندی هێرش دەکەنە سەر کاک مستەفا.

 من  لایەنگری لە کاک مستەفا ناکەم، بەڵام بە وردی کتێبەکەم خۆێندوەتەوە و لە نێزیکەوە کاک مستەفاش ئەناسم و شارەزاێیم لە کەسایەتی و هەڵۆێستی بەرێزیان دا هەیە و  ئەزانم کە مروڤێکی بێ پێچ و پەنایە و ئەوەی بڕوای پێێ نەبێ نایڵێ و هەر ئەوەشم لە ناوەروکی کتیبەکەدا بەدی کرد.

 دیارە کتێبەکەی کاک مستەفا هیجری خەسارناسی 3 دەیە تێکۆشانی حیزب لە خۆی دەگرێ کە دەبوو کاک مستەفا سەرەنجی پێ بدایە و هەموو قوناخەکان و سەردەم و گوڕانکاری و شێوەی خەبات و تێکۆشانی حێزبی شی بکردایەتەوە و ئەوجا باشتر ئەیتوانی مەبەستەکەی بە خۆێنەران بگەیەنێ و کاریگەری نێگەتیڤی  ئەو جیابونەوانە بێنێتە بەر باس.

 بەڵام سەرەڕای ئەوانەش، هەر چەندە کتێبەکە بە زوری ئەو شتانە لە خۆ دەگرێ کە باسکراون و کەم شتی نوێی تێدایە، جەسارەتی سەرکردەیەک نیشان ئەدا کە بە پەروشی ئەو کێشە بچوکە گەورانەوەیە کەوا بەردەوام زەرەر لە هێز و تاقەت و توانا و ئیعتیباری جوڵانەوەی گەلی کورد لە روژهەڵاتی کوردستان و حیزبی دیموکراتی کوردستانی ئێران ئەدات. بچوک چونکە جیابونەوەکان بنەمای فکری و جیاوازی ئیدئولۆژیکیان نەبوە و زیاتر لەسەر بنەما و بە گوێرەی بەرژەوەندی و سەلیقەی کەسەکان بووە و گەورە لەبەر ئەوە لێکدابڕانەکان بونەتە هۆی لاوازی خەبات و بەرخوەدانی شوڕشگێڕانەی سەنگەری پاراستنی ڕەوای کوردستان.

 ئەوەی من لە کتێبی نسکۆ و لێکدابڕان دا خۆێندمەوە، ئەوەیە کە کاک مستەفا هەوڵ ئەدات بە کراوەێی بڵێ کە: ئەگەر یەکگرتنەوە باشە، لێکدابڕان خراپە، کەواتە ئەگەر یەکگرتنەوە لە سەر بنەمای لێکدابڕان بنیات بنرێ ئەوا جیابونەوە وەک خۆی بمێنێتەوە باشترە.

 بە باوەڕی من جیاوازیەک لە نێوان جیابونەوەکانی 1980 و 1988 دا هەیە و دەبێ هەر کامەیان وەک خۆیان شی بکرێنەوە و قسەیان لەسەر بکرێ.

 جیابونەوەی 1980  دەکەوێتە خانەی خەیانەتەوە، چونکە ئەو لایەنەی لەو هەل و مەرجە ناسکە دا حیزبیان بەرەو هەڵدێر و لەت بون و تەسلیمیەت دەبرد چونە سەنگەری داگیرەکانی کۆماری ئیسلامی ئێران و باوەشی حێزبی تودەی گومانلێکراو، و دەبو لە کاتی خۆیدا حیزب لەوبارەوە بەدواداچون و وردکردنەوەی بەرفراوان و باشتری هەبوایە، بەڵام جیابونەوەی 1988 جیاوازترە و کادر و ئەندامانی جیا بوەوە لە سەنگەری بەرگری دا مانەوە، ئەگەر چی هۆکاری جیابونەوەکە و شێوەی جیابونەوەکە جێگای پرسیار و بەدواداچون و هەڵۆیست وەرگرتنە. ئەگەر لە کاتی خۆیدا ئەو جیابونەوەیە کە بو بە هۆی لەت بونی حیزب و لاوازی تەوانایی بەرەنگاربونەوەی داگیرکەرانی کوردستان و کاریگەری نەرێنی لەسەر روحی بەرەنگاری کۆمەڵانی خەڵکی روژهەڵاتی کوردستان دانا، بە دوادا چونێکی زانستی بۆ بکرایە و هۆکاری جیابونەوەکە و هەرەوها زەرورەتی یەکگرتنەوەکەی دەسنیشان بکرایە و دەرس لە کەم و کوڕیەکان وەربگیردرایە ئەوا ئەنجامێکی باشتر و سەرکەوتوانەتری دەبوو و لەوانە بو 2006ی بەدوا دا نەهاتایە.

 لە کتێبەکەی کاک مستەفا هیجریدابە وردی ئەو بۆچونە دیارە کە باس لەوە دەکا کە لە یەکگرتنەوەی کۆنگرەی 10 ی حیزب دا هەڵە و پەلە کردن هەبووە و خەسارناسی بۆ ئەو قوناخە نەکراوە و ئەوەش وایکردوە کە بە کردەوە حیزب نەبێتەوە بە یەک و بەرەکان هەر وەک خۆی مابویەوە و تەنیا ناوی حیزب یەک بو.

 لە جیابونەوەی 2006 دا هۆکارەکانی جیابونەوە بە تەواوەتی لەگەڵ 1988 دا جیاوازی هەیە، هەم لە باری هەڵۆیست و هەم لە باری کات و سەردەمەوە.

 دیارە من نامەوێ لێرەدا بچمە سەر بابەتی جیابونەوەکە و نامەوێ کەس و لایەنێک تاوانبار بکەم، بەڵام ئەو کات و ئێستاش لەسەر ئەو بڕوایەم کەوا ئەو جیابونەوەیە هەڵەیەکی مێژووێی بو و هیچکات جێگای پاساو هێناەوە نیە.

 دیارە بەداخەوە هەر زۆر زوو دەرکەوت ئامانج لە جیابونەوە جیاوازی فکر و ئەندێشە و سەلیقە و خەلاقیەت و ئیدئولوژی نەبوو و تەنیا پاراستنی بەرژەوەندی بچوکی دەسەڵاتخوازی زاڵ بو بەسەر ئاتموسفوری ئەو سەردەمەدا و زەرەی ئەو هەڵۆێستە هەڵەیەش هەموو لایەکی گرتەوە، بە بڕوای من لە جیابونەوەکان دا کەس قازانج ناکات و هەموو لایەک زەرەرمەندن.

 هەر چۆنێک بێت ئەو کتێبەی کاک مستەفا هیجری بە سەرەتایەک بۆ باسکردن لەسەر کێشەکانی ناو حیزبی دیموکراتی کوردستانی ئێران دەزانم کەوا لە ماوەی 55 ساڵی رابوردوو و لە کونگرەی دووهەمی حیزبەوە بەردەوام لە جەستەی حیزب دا وەک ئازارێکی چارە  بۆ نەکراو بوە و هێندێ جار و بە ‌هێندێ ڕیگا و ڕیبازی تایبەتەوە ماوەیەک “موسکەنی” پێدراوە و دواتر ئێشەکە سەری هەڵداوەتەوە و لە ئەنجامی ورد کردنەوە و پێداچونەوە و ڕەخنە گرتن و ئەنجام وەرگرتن لەو کتیبەوە ئەکرێ بە دوای دەرمانی چارەسەری بەردوام دا بگەڕێن.

 بە هەڵچون و ئێحساس و هێرش کردن و لە هەڵلا دان هیچ کێشەیەک چارەسەر ناکرێ و باوەڕ ناکەم ئەو کتێبە دەرگای لە بەردەم یەکگرتنەوەدا داخستبێ، وەک هێندێ کەس باسی دەکەن، بەڵکو بە پێچەوانەوە دەرگای لەبەردەم یەکگرتنەوەیەکی زانستی  و بە ئێش و ئازار بەڵام بەردەوام دا کردوەتەوە و ئەگەر بە وردی لە پەیامەکەی کاک مستەفا بگەین ئەوا ئەتوانین هەوڵی یەکگرتنەوەش چڕتر بکەینەوە.

 نێزیک دە ساڵە جیابونەوە هاتوەتە ئاراوە و لەو ماوەیەدا و بەردەوام و هەرخێرا دوای ئەو جیابونەوەیە هەوڵەکان بۆ یەکگرتنەوە دەستیان پێکردوە و ئەنجامیان نەبوە، کەچی کتێبەکەی کاک مستەفا وا یەک مانگە بڵاو بوەتەوە! کەواتە مروڤ دەبێ بە بەرپرسیارەتیەوە هەڵۆیست بگرێ و بچێتە بناوانی ناکۆیەکانەوە و دڵسۆزانە بڕیار بدات و ڕەخنە بگرێ و یارمەتیدەر بێ بە چارەسەرێکی بەردەوام نەک یەکگرتنەوەیەکی کاتی.

 هەموو ئەوانە بە لایەنگری و بە دژی کاک مستەفا هەڵۆیستیان هەیە دەبێ بیر لەوە بکەنەوە کە هەمویان یەک ئامانجیان هەیە و یەکگرتنەوەی حیزب بە باش دەزانن و خۆیان بە دیموکرات دەزانن، کەواتە بەو هەڵۆیستە توند و تیژانە و بەو هێرشانەی دەیکەنە سەر یەکتر، دیموکرات بونتان دەبەنە ژێر پرسیار و پەیامێکی مەترسیدار بە کۆمەڵگا ئەدەن و دڵسۆزانی خەبات و تێکۆشان دڵتەنگ دەکەن.

 باسکردنی دەردەکان وەک خۆی خراپ نیە، تێنەگیشتن لە ئاکامی دەرد و ڕیگە گرتن لە دوزینەوەی دەرمانی ساڕێژ کردنی دەردەکە هەڵەیە.

 من لە جیابونەوەی 2006 دا و لە ئێستاش دا لایەنگری هیچ لایەکیان ناکەم و نەمکردوە، بەڵام بەلامەوە گرینگە راستگۆیانە لە مەسەلەکە بڕوانین و بە باشی و وەک  خۆی کتێبەکەی کاک مستەفا هیجری بخۆینینەوە و شی بکەینەوە و ڕەخنەی لێبگرین. من لەو کتبەدا کێشەیەکی شەخسیم نەدیت ئەگەر چی ناوی چەند کەس هاتوە، بەڵام دەکرێ ئەو کەسانەش خۆیان وەڵامدەر بن و بە بەڵگە بەرەنگاری نوسینەکەی کاک مستەفا ببنەوە و ئەوانیش قسەی خۆیان بکەن.

هیوا گوڵ محەمەدی 20150406