1– یەکەمجار ئەو وێنەیەم بینی (کچێک بە دوو ئاڵاوە)، دوو رەنگی سوور و بەنەوش چاوی گرتم و بیرم لەوە کردەوە کە داخۆ ئەم خانمە کوردە زیاتر لەبیری سێتی لیباسەکانیدا بووە وەک چۆن بەکگراوندی سووری ئاڵای ”کۆماری تورکیای نوێی ئەردۆغانی” 
و رەنگی سپی مانگ و ئەستێرەکەی لەگەڵ سەر و ژێری جلەکانیدا هارموونییەکی رۆمانتیک و تاڕادەیەک دیموکراتیکی ساز کردووە، یان عەقڵییەتی کۆمەڵگاییەکی دیموکراتیکی لە پشتەوەیە کە چارەنووسی کورد و بکوژانی پێکەوە گرێ ئەدا و ئێمەش وەکوو ئوبژەی چاو نەکراوە و داماوی نێوان سێکوچکەی ”سەرۆک، ئیدیۆلۆژی، و هێزی میلیتاری” دەبوایە لەگەڵ زۆرێک لە هاوزمانەکانمان، چەپڵەی بۆ لێدەین و ناچار بین بە قبووڵکردنی ژینێکی نوێ لەگەڵ برا تورکەکانمان، وەک ئەو ئەزموونەی لە رۆژاوای کوردستاندا لە کۆمەڵگەی دیموکراتیک هەمانە و ئەگەرچی وەک کورد دەڵێ ”حەمەی مایی”*ش نەهاتووە بەڵام کورد و هۆزی ئەسەد پێکەوە ئاو دەخۆن، و کوردیش بۆ خۆیان کانتۆنان ئیدارە ئەکەن و شەڕڤانانیش کە شەرەفی چوارپارچەن وەک چۆن نەیانهێشت دێوەزمەی رەش کۆبانی بخات، هەنووکەش بستێ لەو خاکە نادەن بەدەستەوە.
2- دووهەمجار کە دیتمەوە بیرم کردەوە وتم ئەگەر لەباتیی ئاڵای تورکیای دیموکراتیک پەڕۆیەکی زەرد بووایە ئەوجار سێ رەنگی ”زەرد و سوور و وەنەوشە”** چاوی ئەگرتم و ئەمەش هارموونییەکی فۆلکلۆر و ناسیۆنالیستی و تاڕادەیەکیش شۆڤێنیستی ساز دەکرد. و ئەمەش نە ک جوان نیە بەڵکوو کارەساتیشە، لە بەر ئەوەی ئەو ئاڵا سوورە هی گەلی تورکی برا و پشتیوانە و لەگەڵ رۆحی ئینتەرناسیۆناڵی خۆماڵیدا زیاتر دەگونجێت. بەڵام ئێمە ئاڵای زەردمان بە دەوردا نیە جگە لە پارتی دیمۆکرات، کە بەهۆی ”نەوت و نەتەوە”وە بۆنی ناخۆشی ئیپریالیزمی لێدێت و تا لێی دوور بیت ئینسان تری و ئەودەمیش دیسان وەک ئۆبژەیەکی چاو دابەستراوی سێکوچکەی ”سەرۆک، ئیدیۆلۆژی، و هێزی میلیتاری” ئەوە هیچ کە نەماندەتوانی ئەو خانمە بەڕێزە چەپڵەبارانکەین، بەڵکوو بۆ سواق دانی روومەتوو جلوبەرگی ناشیرینی ”تف”مان کەم دەهات و پەنامان بۆ گەلێکی تری دۆست و برا دەبرد و بە دەمی ئەوانیش بڕێک ”تف”مان دەکرد تا هەم عەقڵیەتی دیموکراتیک پێتۆڵتر بێت و هەمیش ناشیرینییەکمان سڕیبێتەوە.
ئەنجام:
1- ئەو وێنەیە هەروا باشە و هەرجۆرە دەستێوەردانێکی بیدعەتە.
2- هەر کچێک ئاڵای زەرد بە دەسێکیەوە بوو جوان نیە با شاجوانی دنیاش بێت.
3- سێ کوچکەی ”سەرۆک، ئیدیۆلۆژی، و هێزی میلیتاری” زیاتر لە گەشەی عەقڵی رۆژاوایی و تیۆری کۆمەڵگای دیموکراتیکەوە نزیکە تا ستالینیسم و ئەوجاریش تووتالیتاریسم.
4-تیۆریی نگریسی ”دەوڵەت نەتەوە” ماندووی کردووین چوونکوو تورکیا و سووریا و بەتایبەت عێراق بەشێوەیەکی سروشتی و لە دەرنجامی رەوتی لە سەرخۆ و هێمنی مێژوودا بوون بە دەوڵەت نەتەوە و ئێمەش کێشەمان لەگەڵیان نیە، ئەوە نەبێ حەز ئەکەین قۆناخێکی تری هزری مرۆیی ئەزموون بکەین و بارامبەگیش لە هەڵەبجە تەڵاقی خستووە ”سایکس پیکۆ” درۆیە و بڕایەوە.
پەراوێز:
* ”حەمەی مایی” هەمان ”محمد مهدی”یە کە وەک لەئیسلامدا دەڵێن رۆژێک دێت و دنیا پڕ ئەبێ لە یەکسانی، کورد ئەڵێت کە مهدی هات ”مەڕ و گورگ پێکەوە ئاو دەخۆن.
** ”زەرد و سوور و وەنەوشە” ریتم و رێکیەتییەکەی نزیکە لە گەڵ ”زەرد و سوور و شەمامە”دا کە چیرۆکە شیعرێکی فۆلکلۆری مناڵانە.
سەرچاوە فەیسبۆکی نووسەر.