هاواڵێکی کۆنم پرسیارێکی لێکردم دوو توێی بوو ، چەند پرسیاریتری لە خۆیدا جێکردبۆوە ، واتە بەبارێکدا پرسیارو بە بارەکەی تریدا فڕو لاتاو ! 
پرسیارەکەی ئەوەبوو: ئەتۆ کە لە کورانی خەباتەکەتدا بەگەرمی داوای خودموختاریت دەکردو زۆریشی بۆ هەڵدەسوڕایو لەسەری سور بوی، چۆنە ئێستا لە نوسراوەو قسەکاننتدا بۆنی سەربەخۆییان لێدێی؟! حەزدەکەم هۆیەکەی بـزانـم ئەگەر لە بەرت زەحمەت نەبێی .
وڵام : برای بەڕێزم دەگەڵ ڕێزو سڵاو خۆشحاڵم دوای ئەو هەمو کاتە بەسەر چوە، منت بیر کەوتۆتەوە و بە شیاوی ئەوەت زانیوم بە زمانی بێزمانی و بەخشکەو پەنامەکی پـرێسکەی دڵتم لەلا بکەیەوە. براگیان: ئەوکات من لە ڕوبەرێکی بەرتەسکی دنیادا واتە ڕۆژ هەڵاتی کوردستان دەژیام. دەسەڵاتێکی ڕەشی داپڵۆسەر بەسەر زێدەکەمدا زاڵبو ، ئـەو دەسەڵاتە بـڕیاری نەهێشتنی کوردی لە کارنامەی کاری خۆیدا لـە ڕێزی پێشەوە دانـابو .هـەر ئـەو داوایەی ئێمەی بـەتاوانی نەبەخشراو دەزانیو بەلای ئەوەوە جەریمەی عوزما بـو، هەر لـەسەر ئـەوداوایەش فتوای جیهاد بەدژی کورد دەرکرابـو. هەر لـە پێناوی ئـەوداوایەی کە ڕەنگە مـنـو تـۆشو ئیدیکانەش بـەکەمی بزانین بەڵام گەلەکەمان دەیانو بگرە سەدان ڕۆڵەی لە پێناودا کردۆتە قوربانی . ئەو داوایەمان لە کاتێک دابو کە دەسەڵاتی زاڵ بەسەر زێدەکەمان ، نە بڕوای بە ئازادی هەبوو ، نەمافی نەتەوایـەتیو مرۆڤایەتی بۆ کورد قائیل بوو حوکمی ( مفسد فی ألأرض ، ومحارب باخودای ) بەسەر کـوردو شۆڕشگێڕانیدا دەر کردبو. وشەی پیرۆزی ( أللە أکبر) کە خوا فەرمویە { الی بـذ کرأللە طتمئن ألقلوب } بـبـو بـە سیکناڵی هاتنی مەرگو ماڵوێرانی . لـە ژێر سێبەری ئـەو دەسەڵاتـەدا داوای خودموختاری شاکارێک بـو کە هـەمو کەس نـەیدەتوانی قەرەی لە قەرەی بدا . باوەڕموایە لەوەها کەشو هەواو لـەژێر دەسەڵاتی ئـەو دێوەزمە خوێنڕێژەدا ، داوایەکی پڕ بەپێستو بـوێرانە بوو. جیا لـەوەش دنیای ئـەو سەردەم وەک ئێستا کراوەو بەیەکەوە گرێدراو نەبو. ڕەنگە تۆش قبوڵت بێی لەو عاسمانە تەسکەی ئەوکاتدا دۆزینەوەی ئەستێرەیەک کە زۆریش چوکە وشاراوەبێی کارێکی هاسان نەبوو.
برای خۆشە ویست : جیا لە ئەزمونی چەندین ساڵەم لە خەبات بۆ ئازادیو مافی نەتەوایەتیدا ، ئێستا ئەسپی تۆڕی سەرکێشی چارەنوس هەڵیداشتومو لەدنیایەکدا فڕێیداوم ،کە دەگەڵ دنیاکەی من بەقەدەر نێوانی عەرزو عاسمان جیاوازی هەیە . لێرە چاوو گوێیەکان کراوەترن ، دەربڕینی هەستو سۆزی دەرونو ، داوای ئازادیو مافی مرۆفو ، تێکۆشان بۆ ڕزگاریو سەربەخۆیی گەلانو خۆ بەڕێوەبردنو بەحەزی خۆت هەڵبژاردن ،بەبێی مەترسی لە گۆڕیدایە ، داواکردنو لیدوانیان نە تاوانەو نە یاساغکراوە کەرەسەو ئامرازی واش پەیدا بون ، دەتوانی چی لەم جیهانەدا ڕودەدا ببیسیو ببینیو دەنگی خۆشت بەم دنیایە ڕابگەێێنی . بێگومان منیش کە خۆم بە ڕۆڵەی گەلێکی نیشتمان داگیر کراوی لە هەمو مافێک بێبەشکراو دەزانم ئێستا وردترو دورتر دەڕوانم ، ئەوەی جاران نەمدەدیت لە بەرچاومە، ئەوەی نەمدەتوانی دەریبڕم بەبیێ تێبینی دەیڵێم، زۆر شتم نـەدەزانی فێری بـوم . مافی مرۆڤانەو شەرعیو قانونی خۆمە ،بۆ ڕزگاری نیشتمانو گەلەکەم ، بۆ وەرگرتنەوەی هەمو بەشە زەوتکراوەکانم، بۆ وەدەست هێنانەوەی کەڕامەتو شەڕافەتو بۆ سەڵماندنی ئەوە کە منیش مرۆیەکی کوردمو خاوەنی فەرنگو کلتورو زیدو زمانی تایبەت بەخۆمم ، بەهەمو شکلو شیوەیەکی مەنتیقیو گونجاو ،هەوڵ بدەم ، هاوار بکەم ، جینایەتی داگیر کەران لە قاو بدەم .مافی خۆمانە وەک هەمو گەلانی ئەم جیهانە خۆمان سەروەرو سەرداری خۆمان بین ، کلتورە تاڵانکراوەکەمان وەرگرینەوەو زیندوی کەینەوە. حەزم لێیە زێدەکەم ئـاوەدانو گەلەکەم سەربەستو ئـازاد ببینم . خۆم بـەبەر پرسیار دەزانم بە هەر شێوەیەکی کە لەدەستم دێی ، وڵامی هێرشو پەلاماری دوژمنانی داگیرکەر بدەمەوە . کام داوا بەقازانجی گەل دەزانم ئەوم بوێی ، کام شوێن دوایین مزڵمە بۆی بڕۆم.
براگیان : ئەزمونی (٤٠ ) ساڵ تێکۆشانم بە ئاشکراو بە نهێنیو بەشداری کردنم لـە خەباتی ڕەوادا پێم دەڵێێ : نەفرین لەو زاڵمو درۆزنو دوڕویانە بکەم کە زێدو کەڕامەتو کەسایەتی گەلـەکەیان پێشێل کردوم . نەفرین لەو بەڕواڵەت دۆستانە بکەم کە زۆر نـامرۆڤانە دوڕووییان کردوەو لە دڵپاکی ئێمە کەڵکی خراپیان وەرگرتوەو بەهەڵەیان بردوین . نەفرین لەوانە بکەم کەدەبو ڕاستیمان پێی بڵێن بەڵام نەیانکوتەوەو درۆیان دەگەڵ کردوین . نەفرین لەوانە بکەم کە بە ناهەقو لەسەر داوای مافێکی ڕەوا ،خوێنی ڕۆڵەکانی گەلەکەیان ڕشتوین . نەفرین لەوانە بکەم داێکانیان جەرگ سوتاوو باوکانیان پشتشکاوو خوشکانیان تازیەبار کردوین . نـەفرین لـە هەمو ئەوانە بکەم بیرو هزرمان تڕۆڕ دەکەنو فەرهەنگی بێگانەمان بەزۆر بەسەردا زاڵ دەکەن . نەفرین لەوانە بکەم کە دەبنە نۆکەری دوژمنو هاوکاریو سیخوڕیان بۆ دەکن.
بەڵێی : دۆستی ئازیز بۆم دەکەوتوە دوژمن گورگی خۆماڵی لە کۆزەکەمان خستوە ، ڕۆڵەی کوردی لە ژێرناوی ئایینو چیو چی هەڵخەڵەتاندوە ، فێری خەیانەتی کردون ، لـە خشتەی بـردون ئەوەی نابێی بیکەن پێیانی کردوە. بۆیە ئاگری دەرونم بەگوڕ داییسێو بڵێسەی ساندوە. دەرونم زامارەو ئۆقرەم لێهەڵگیراوە ، لەدەستی دوژمن وەزاڵە نـەهاتوم ، برینی جەرگم بە سەر نێزەی زمانی خۆمانە دەکولێنەوەو ڕۆژ دەگەڵ ڕۆژ نوێی دەکرێنەوە . لە بـرینی سەرە ڕمبان بـاکم نـیە، ژانی برینی زمانی هاو نەژادی خۆمانە ژیانی لێتاڵ کردوم . تەمەنم چۆتە سەرو تینو تاوی جارانم نەماوە. بەڵام باش بزانە لەسەر داوا ڕەواکەی گەلەکەم لە جاران سورترمو کۆڵمنەداوە. تۆش بزانە سەردەم سەردەمی ئازادیو سەربەخۆیی گەلانەو خودموختاریو شتی لـەو بـابەتە بـاویان نـەماوە. بەو قەناعەتە گەیشتوم ئەو خودموختاریەی ئێمە داوامان دەکردو، ئەو فدڕاڵیەی ئێستا لە ئارادایە تەجرەبەی ژیانو خەبات نیشانیداوین هیچیان دەرمانی دەردی ئـێمەی کورد نـیە . ئـەو نـەتـەوە دەسەڵات بەدەستانەی داگیر کەرانەی کوردستان لە نەمان یان ژێر چەپۆکەیی بـۆکورد هیچیتریان قبوڵنیە. ئەگەر چاوی لێنە قوچیێنینو ئیمان بەدرۆو دەلەسەی دوژمنان نەهێنین وەک ڕۆژ لەلامان عەیانە، کـە ڕزگاری نـیـشتمانو سەربەخۆیی گەلەکەمان تاکە دەرمانە. بەباوەڕی من لـە وە کەمتر کات زایەکردنو خۆ فریو دانو مانەوە لە ژێر دەستی زاڵمانە و سەرئەنجامیشی پە شیمانیە. ئەگەر وەک چۆن پێشەوای نەمر کۆماری ڕاگەیاندو ئاڵای سەربەخۆیی هەڵکرد ، ئێمەش بۆ ئەو ئامانجەو بەو هیوایە خەباتەکەمان درێژە پیداباو پێبدەین هەر ئەوەندە خوێنی جەستەی رۆڵەکانمان کە خاکی پیرۆزی کوردستانیان پیێ نخشێندراوە دەرژا . ئەوە ڕاستە ئامانجی ئێمە لە ئەسڵی خۆیدا ڕزگاریو سەربەخۆیی نیشتمانو گەل بوە ، بەڵام بەداخەوە خودموختاری بۆ هێدێکان جێگای ئەوانی گرتوە . ئێمەی کوردی ڕۆژهەڵاتی کوردستان دنیایەکمان ئەزمونی تاڵ دەگەڵ دوژمنەکەمان هەیە،چەندین ڕێبەرو سەرکردەی زاناو لێوەشاوە لە ڕێگای چارەسەری ئاشتیانە بونە قوربانیو لە کاتی وتووێژدا خەیانەتیان پیکراوەو سەریان دانـاوە . ئـەزمونی باشور لـە بەردەستمان دایـە کە ئـەو حکومەتـە لەرزۆکەی عیڕاق ، کە ئەگەر پشتیوانی ئێران نەبێی لە ناو زیاتر هیچی نەماوە ، دەگەڵ ئەوەش لە فرتو فێڵو کەندوکۆسپ دروستکردن بۆ حکومەتی هەرێم کاتێکیش ڕانەوەستاوە. هێندێکی وەک جەنابت کە ئەو پرسیارەم لێدەکەی وردە تیئۆری داتاشراوم بۆ دێننەوەو لەلایەک بەرگری لەخۆکردن بـەشەڕی چەکداری نـاودەبەنـو، لەلایەک بۆ هێندێک بەرژەوەندی تاکیو سیاسی مەشڕوعیەت دەدەن بە کۆماری ئیسلامیو هێزەکانی گۆرەپانی خەباتی رزگاریخوازانە تۆمەتبار دەکەن. بە ئاوی کوردی ئاشی داگیر کەر دەگێڕن. ناڕاستەو خـۆ ئەوەی کە ئاخوندەکان بە بەستراوە بـە ئەمو ئەومان نـاو دەبەن پشتڕاست دەکەنەوە . هێندێک حیسابی داوای مـافی نـەتەوەیەک دەبەستنەوە بەهێزی چەکدارو فرۆکەو بۆمبا ! ئەوە ڕاستە دوژمن لەو بوارەدا لـە شۆڕشگێڕان بە هێزترە ، بەڵام مێژو نیشانیداوە هەقانیەتی داواو ، ئیمانی پتەو بەڕەواییو غیرەتی شۆڕشگێرانە سەر ئـەنجام ئـەو هێزە بە ئامراز زۆرو بە ئیمانو بڕوا بێهێزانەی تێک شکاندوەو گەل بەسەر زاڵمدا سەرکەوتوە . خۆتۆ لە من باشتر دەزانی خوای مەزن فەرمویە { کم من فئة قلیلة غلبت فئة کثیرة } زۆر دەستەی کەمی خاوەن ورەو ئیمان زاڵبون بەسەر دەستەی زۆری بێی ورەو ئیمان. ئـەو خۆڕاگریو بـوێریەی خەباتکارانی ڕیگای ڕزگاری بەو کەمیەی خۆیانەوە دوژمنیان زراو تەرەک کردوە و بەچۆکیان داهێناوە. شای ئێران دەبو بەژاندارمی ڕۆژهەڵاتی ناوەڕاست. سەدام خەونی ئیمثراتۆری عەڕەبی دەدیت ، زۆریتریش ، هەمو هیوایان هێزی ڕواڵەتی بو ، خۆمان دیتمانن چیان بەسەر هاتو کێی سەرکەوت. بـۆیە منیش بە پشت ئەستور بون بەڕەوایی داواکەمانو ، بەرزیو بەهێزی مەعنەویاتی خەباتگێڕانو ، پشتیوانی ئاشکراو نەهێنی گەلەکەمان ، هـەر چەنـد ڕێگاکە سەختەو کەمـو کوڕی ناو خۆشمان سەرباریەتی ، بەڵام سەرکەوتن بەمسۆگەر دەبینم . بـە ئەرکی خۆشمی دەزانـم چـێـم لە جانتادایە هەڵیڕێژمو بیخەمە بەدەستی گەلو ، چیم لەتوانادایە کاری پێبکەم ، ئەگەر لەو ڕیگایە دا بشمرم شانازی پێوە دەکەم . برا گیان : داوای بەشی کەسمان نەکردوە ، وڵاتی کەسمان داگیر نەکردوە ، دەست درێژیمان بۆ ماڵو گیانی کەس نەکردوە ، هێرشمان بۆ ماڵو حاڵی کەس نەبردوە. لەماڵی خۆمان بەگیان لە گەلو زێدەکەمان بەگریمانکردوە ، ئەوەش مافێکی ڕەوایەو دینەکەی منو تۆش قبوڵیەتیو قەدەغەی نەکردوە . دڵنیابە نیازی خراپمان دەگەڵ کەس نیە ، ڕێبازێکمان گرتۆتە بەر ، بەڕەوای دەزانین . ئەگەر دینداریش نەبین ڕێزی تەواومان بۆ ئیدەو ئایینی کەسانیتر هەیە. من کە بڕوای ئاێینیشم هەیە داوای مافێکی ڕەوا لە هێچ بارێکەوە نەک بەدژی دینەکەمی نازانم، بڕوام وایە ئەوخەباتەش یەکێکە لە ئەرکە گرینگەکانی ئایینی کە لەسەر من واجکراوە. بۆختانو درۆی هەڵبەستراوی دژە ئایینیمان هەرگیز بەسەردا ناسەپێی چونکە پێشەوای نەمر قازی محممەد پێشەنگو ڕیبەرمانە.
برای بەڕێز : پرسیارەکانت وڵامی زۆر لەوە زیاتریان دەوێی ، ئەوەی سەری لە ئەدەبیات دەربچێ بەوڵامەکانی من دەزانێی چیت برسیوەو قبوڵیشی دەکا کە کورتو پوختم کوتوە . دیارە زۆر لەوەشیان زیاتر دەویست ، بەڵام دەزانم بەپێی ئەو ناسیاویەی لەسەر منت هەیە لێم تێدەگەی پێموایە بڕواشم پێدەکەی . خۆت باشدەزانی ، زانینو تێگەیشتنم چەندو چۆنە کە ئێستا زۆر زیادی کردوە . تۆش دەزانی هەمیشە بەقەدەر تێگەیشتنی خۆم سڵم لە کوتنی ڕاستیەکان نەکردوە ، دەشزانی لەو ڕێگایەشدا ژانە سەری زۆرم بۆ دروست بوە. بۆیە وا بەڕاشکاوی قسە دەکەم تا لەبارەگای خواو گەلدا شەرمەندە نەبمو یەقەم نەگرن بڵێن بۆ ڕاستیت نەکوتوە . داوای برایانەشم لەتۆو هەمو مامۆستاایانی ئایینی ئەوەیە لەو ڕاستە ڕێگایەی کە خوا بۆ ئیماندارانی کێشاوە لامەدەن . ئایەتو حەدیسەکان وەک خۆیان تەعبیرو تەفسیر بکەنو بایان مەدەن . بەدرۆ هەڵبەستنی دوژمنانو قسەو هەواڵی هەلنەسەنگێندراوو تاقیق لە سەر نەکراو بڕوا مەکەن . ڕاو بۆ چونو بریارو فتوای ئێوە دەگەڵ قسەی کەسانیتر جیاوازی هەیە. ئەگەر ڕاستتان نەکوتبێ نەک زیان بەخەڵک دەگەێینن بەڵکو خۆشتان قەرزداری خەڵکو خوا دەکەن . زیاتر سەرت ناهێشێنم تۆش وەک من باوەڕی ئایینیت هەیە دڵنیابە ئەو پڕوپاگەندە ژاراویەی لەلایەن دوژمنەکەمانو نۆکەرەکانی دەکرێن فڕیان بە ڕاستیەوە نیە ، نەشدیتراوە دوژمن بە بەرانبەرەکە ی هەڵبڵێو دوعای بەخێری بۆ بکا. ئەوە ی دەیڵینو دەیکەن سەیر نیە ، سەیر ئەوەیە هێندێک بڕوایان پێدەکەن ، هێندێکیش دەکەونە گومان لە حاڵێکدا هەردوکیان دەزانن درۆیە !! بـەهەر حـاڵ مـافەکە پیرۆزە ، ڕێگاکە سەختو هەڵدێرە . بەڵام ئەوەی لەسەر هەقە نەترسو بوێرە .
دوایین وتەم بۆ جەنابت : سەهۆڵ بەندان دەتوێنەوە گیاو دارو گوڵ دەڕوێنەوە
قورینگ کە چونەوە گەرمێن بـەهارێک دادێی دێنـەوە
تـەنگانە چەندیش قورس بن خـۆڕادەگریـن ، دەبڕێنەوە
بۆ تێگەیشتن لە قسەکەم (الم نشرح ) بیر بێنەوەو بخوێنەوە
برای دێرینت مەلا برایمی مەجید پور ٢٤ /٨ /٢٠١٦