ئێمەی گەلی کورد زێدەکەمان کەوتۆتە ڕۆژهەڵاتی ناوەڕاست ، چوار وڵاتی دژەکورد بە ڕاو ڕاوێژی زلهێزانی بەرژەوەند پەرستی جیهان نیشتمانەکەمانیان دابـەش و داگیر کردوە.
گەلەکەمان لە ژێر دەسەڵاتی دوژمناندا پەروەردەو ڕاهێندراوە. دەرەتانی وەدەست هێنانەوەو ئەستاندنەوەی زێدەکەی لێبڕاوە. دەگەڵ فەرهەنگ و کلتوری خۆی ئەگەر بێگانەش نەکرابێی ، ڕێگای پەرەپێدان و بەڕێوەبردنی پێنەدراوە. لە هەمو حاڵەتێکدا بۆ دابین کردنی بژیوی ژیان و تەنانەت خوێندەواری بە زۆر زمانی بێگانەی داگیر کەری پێخوێندراوە. هەرکات داوای مافی ڕەوای خۆی کردبێی بەرچەسپی نۆکەری بێگانە و دژی شۆڕش و کافرو لە دین دەرچوی لێدراوە. بەگشتی هەموو داگیرکەرەکان بڕوایان وایە کورد یان نابێ هەبێ، یان ئەگەر هەبێ دەبێ نۆکەر و ژێر چەپۆکە و چاو لەدەستی ئەوانبێ. ئەگەر لە هەل و مەرج و دەرفەتێکدا ڕواڵەتی دۆستانە و برایەتیان نیشان دابێ و بۆ فریودان باسیان لە مافێک بۆ کورد کردبێ، هەرگیز ڕاست نەبونە و بە شوێن دەرفەتی لەبار بۆ زەبرلیدانی کورد گەڕاون. مێژوو نیشانیداوە زمانی مەنتیق و سوڵح و ئاشتی و پەسندکردنی مافی ڕەوای کورد، هەر ڕواڵەتی و قەت بەکردەوە کاریان پێنەکراوە . لە سەدا نەوەدی وتووێژەکانی ئاشتی بە ڕژاندنی خوێنی نوێنەرانی کورد دوایی پێهێندراوە.
لە نێو ئەو هەموو بەند و زنجیرو تەون و بەست و فرتوفێڵ و پێلان گێڕیانەدا بەخۆشەیوە گەلی کورد کۆڵی نەداوەو وازی لەمافی ڕەوای نەهێناوە. بەبێ دڕدۆنگی و بە موتمانەوە دەڵێم: کورد جگە لە جاشوو خۆفرۆشەکان، هەگیز بۆ دوژمن چۆکی دانەداوە . هەر کە لە مێژوی ٢٧١٦ ساڵەیدا توانیویەتی بوون و مانی خۆی ڕابگرێ و بە مێژوی بسەلمێنێ، بەدڵنیایەوە دەسکەوتێکی گرینگ و شانازیەکی مەزنە کە بـۆ تاکە چرەکەیەکیش وازی لـە خەبات بـۆ ڕزگاری و وەدیهێنانەوەی مافی ڕەوای نەهێناوە و بە پێێ هەلـومەرج لەکات و ساتی لە باردا سەری هەڵداوە و ڕیگاکەی درێژە پیداوە، هەگیز وانەکەوتوە کە نەتوانێ هەستێتەوە ئەوە خۆی سەرکەوتنێکی گەورەیە تەنانەت دوژمنیش ناتوانێ نەیسەلمێنێ. ئەگەر بەو پێناسە پەڕ لە سەروەریەش تا ئێستا بە ئاواتی نیهاییمان نە گەیشتوین و لە کاروانی گەلانی رزگار بوو وەدوا کەوتوین، مانای ئەوەنیە بێهیزین و توانای خۆڕاگریمان نەماوە ، بەڵکو وەک لە پێشەوە کوتم ئەوە فەرهەنگی بەزۆر سەپاوی لە مێشک ئاخندراوی دەستی دوژمنانە وایکردوە ئێستاش وەک پێویست خۆمان نەناسینو بەسازی بێگانان کۆڕی جەماوەرەکەمـان گەرم دەکەین ، تا ئیستاش تئوری دنیایەک بەکار دێنین کە ئی ئێمە نیەو ، زانیستیانەش وەرمان نەگرتوە بۆیە بەپێچەوانە دەیسوڕێنین . ئێستاش لامانـوایـە دەبێی بـەوڕێگایەدا بڕۆین کە خەڵک نیشانمان دەدەن . بەداخەوە نە واقعیەتی کوردستانو کوردمان وەک پیویست دەرک کردوەو نەپڕۆسەی زانستیانەی هەڵقوڵاوی پێداویستی نیشتمانو گەل کە بتوانرێی لە کوردستان دابەزێندرێیو بۆ گەڵ بەڕیوە بچێو قوت بدرێێ لە بەردەستدایە. تائێستاش دەمانەوێی لە شەوو ڕۆژێکدا ببینە ئوروپا بەبێی ئەوەی چوکترین ئامادەگێمان بۆی هەبێی، ئێمە دەتوانین لەو شتەباشانەی ئەوان هەیانە لە لای خۆمان دەکریان بێنین ، بەڵام بەدڵینایەوە نابین بەوان. مەسەلەیەکی کوردی هەیە گۆیا کابرایەک حەزی لەوەبوە کوڕەکەی بخوێنێو ببێتە مەلا ، ئاغای ئاوایی ڕێگەی ناداو دەسەری دەکا دەبێی ماڵیشی لە گوندەکەی بڕوا. کابرا کە سورە لەسەر خوێندنی کوڕەکەی ماڵێ دەپێچێتەوەو دەستی کوڕەکەشی دەگرێو دەیباتە لای مەلا ،( دەڵێی مامۆستا بەقوربانت بم هەرچی زوتر ئەو کوڕەم بۆ بکە بەمەلاو دەبێی بشگاتە کۆچبارەکەم. ) ئێمە تائێستا نەکیانی سەربەخۆمان هەیەو نەکێشەی وڵاتەمان یەکلا بۆتەوەو نە بەدڵنیایی لە کەشو هەوایەکی ئازاددا تاکە ساتێک خەومان لێکەوتوە، کەچێ دەمانەوێێ لە پێشەوەی پێشکەوتوان بین! زۆر جار دەکوترێی ( ئێمە چیمان لە خەڵکیتر کەمترە ؟ ) بەڵێی دەڵێم زۆر شت ، گەلی هەروڵاتێک بە بیرو بۆچونی جیاوازەوە لـەسەر ئـەوشتانەی کە بـەرژەوەنـدی گشتین یـەک قسەو هەڵویستیان هەیە ، ئێمە لەسەر هەمو ئەوشتانەی بەرژەوەندی گشتین ناکۆکین . بۆ وێنە بەشی هەرە زۆری کوردستان تائەوڕۆش ئازاد نیە هیچ ، بەڵکو تێکۆشانی سیاسیش ئەگەر بەدڵی دەسەڵات نەبێی قەدەغەیە، کەچی ئێمە لە سەر ئیدەو ئایینو مەزهەبی جیاجیا لێک ترازاوینو بەردەوام بەدژی یەک قسە دەکەینو زۆر جاریش دەگژ یەک ڕادەچین. مـافی نـەتەوایەتیو ڕزگاری زێدەکەمان وەدوا خستوەو خەریکی شەڕی ئیدەو ئـایینو مەزەبین، بەرەبەر شەڕی ناوچەگەراییش پەرە پێدەدەینو وەک کورد دەڵێن : ئەگەر دوژمنمان ڕاونا خۆمان شەڕەگەڕەکێ دەکەین . ئێمە پڕۆسەی ئـازادیو دێـمۆکڕاسیمان بـەدەرس نەخوێندوەو بەکردەوەش لەوڵاتانی ڕۆژهەڵاتی ناوەڕاستدا کە ئێمەی تیدا دەژین هەرنەماندیوە. ئێمە دروشمی دێمۆکڕاسیو ئازادی دەدەینو لە کردەوەدا (دێمۆکڕاسی بۆ خەڵکو دیکتاتۆری بۆخۆمان داوا دەکەین !) چۆن دەتوانین پێش ئەوەی ئازادو سەر بەخۆ بین ئەو چەمکانە پیادە بکەین. بەداخەوە ئێمە هەر بەگەزی خەڵکی دەیپێوین هەربۆیە کورتی دێنێ . ئەگەر سەیری ڕۆژهەڵاتی ناوەراست بکەین دەبینین بەراستی بازارەکە شێواوە،لە هیچکام لەو ولاتانەدا هێمنیو ئارامی نەماوە . بڕوانە ئێراق ، سوریە ، یەمەن لوبنان و….و ئێران کە خۆی بـە دوڕگەی ئـارامدەزانێ بە جۆرێک لە ئاژاوەو ئاڵۆزی ئـەو وڵاتانـە تێوەگلاوە ، لەحاڵی دەست تێوەردان تێپەڕیوەو لـە کۆرانی شەڕدایـە ، ڕاوەستان یان دوایی هاتنی ئەوشەڕانە بەمانای هەڵدێرانو نەمانی ئەو ڕێژیمە تەواودەبێی. کۆماری ئیسلامی ئێستا شەڕی بەرگری لە خۆی لـەدەرەوەی ئیراندا دەکا، ئەگەر ڕۆژێک مەڵبەدەکە تۆزقاڵێک هێور بێتەوە خۆی لـەوان خراپتری لێقەڵماوە. راستەو خۆ بەشداری شەرەکانی کردوە، تا ئێستا سەدان کوشتەیداوەو هیچی بەهیچ نەکردوە. لەو ڕۆژهەڵاتی ناوەڕاستدا دەسەڵاتێکی حاکمی بەمانای وشە لە گٶڕێدا نەماوە هەرکەس سبەینێ زولەخەوهەستا لە گەرەکی خۆی دەبێتەحاکمو بڕیاری کوشتاری خەڵک دەردەکا. بەهێنانە گۆڕی ئایینو مەزەبە لێک جیاوازو دژ بـەیەکەکان خەڵکیان کردۆتە جێشتی مجێور، هەلواو مەزراویلکەیان لێکداوە. بەڕادەیەک مەڵبەندەکەیان شێواندوە ، باب ئاگای لە کوڕی نەماوە .هەمو هەر لیدەدەن ، دەکوژن ، دەسوتێنن وێراندەکەن ، ڕۆژ نیە دەیـان کەس نـەبنە قوربـانی ، کەچی هەمویـان هـەر تەپڵی ئازادیـو ڕزگاری گەل لێدەدەنـو شاراوەش نیە هەر گەلە ماڵوێرانـو کوڕ کوژاوو هیچ پێنەبـڕاوە !! لـە نێو گـۆڕەپانی سیاسیشدا هەمویان بـانگەوازی ئـاشتیو بـرایـەتیو یـەکگرتـویی دەکەنـو لـە مەیـدانی کردەوەشدا تـاکە ڕستەیەکیان لـەو قسانە لەبیر نەماوە.! هەمو دەزانن بازاڕەکە شێواوە، ئاوەکەی ڕۆژهەڵاتی ناوەڕاست گەلێک قوڕاوە. دەبا ئێمەی کورد بۆجارێکیش بێی لەو بازاڕە شێواوەدا دەست بـەسەرمافو بەرژەوەندەکانی خۆمان دابگرینو لـەو ئـاوە لێڵەش ماسیان بگرین . دەبا چیتر چاوەڕوانی قەزاو قەدەرو ڕوحمو بـەزەییو بـەڵێنیە بێبنەماکانی بێگانەو دوژمنان نەبین .وشەی ئازادیو دێمۆکڕاسیو مافی مرۆڤو و..پیرۆزو جێی ڕێزن ، بەڵام لەلای دەسەڵاتدارانی دوژمنی گەلی کورد، نەک پێرۆز نین بەڵکو قسەی زیادینو لەزاتی ئەواندا شتی لـەو بـابەتە هەر نیە و نـاتوانن بـۆ تـاکە جارێک بەڕێزەوە چاویان لێبکەن . ئێمەی کورد لە بەندیخانەیەکی فـراونـداین ، دەبێی بشزانین ئازادی ناو زیندان قسەیەکی بێبنەمایە. دەرفەتەکە ئێستا باش ڕەخساوە، دوژمنانی کورد لـە سیمی ئاخریانداوە ، پێشینانیش کوتویانە ؛هەمـو شتێک لابـاریکیدا دەپسێی ، بەڵام زوڵم هەر لە ئەستوریدا پساوە. دەبا قۆڵی هیمەتی لێهەڵماڵینو هێزێکی یەکگرتو پێک بێنینو واز لە بەرژەوەندی حیزبیو تاک بێنینو وەک تۆفانێکی خرۆشان زبـڵوزاڵی دوژمنان ڕامالێنو ئامانجی گەل وەدی بێنین . ئەوە ئەرکە مێژو خستویەتە سەر شانی ئێمە ، بێگومان ئەوڕۆو سبەو لەمێژوشدا لێی بەرپرسیارین .دەبا لەشەڕی سەرۆکبون واز بێنینو قبوڵ بکەین کە گەڵ سەرۆکەو ئەو خزمەتکار بۆ خۆی دیاریدەکاو کێی لە هەموان لیزانترو دڵسۆزترە وەک سەرۆکی خۆی دیاریدەکا. بە باوەڕی من بەرژەوەندی گەڵی کورد لەوەدایە لەهەردەرفەتێکی ڕەخساودا ئەوشوێنانەی بەکوردستانیان دەزانێ بیانگرێتەوەو بیانخاتەوە ژێر دەستی خۆی جادوایە کێی داوای لـە سەری هەیە بابچێی سکاڵا بکا. بۆ وێنە ئەگەر لەباشوری کوردستان ، کورد خـۆی کەرکوکی ئازاد کردبو بیخستبایە پاڵ هەولیرو سولەیمانی بێگومان لە زۆر تەونو بەندو فرتو فێڵیکی کەئەوڕو دەگەڵیان بەرەوڕون پارێزراو دەبو. ئێمەی کوردی ڕۆژهەڵات کێشەی لەوبابەتەمان زۆرە ، بۆیە دەبێی هەرلەئێستاوە بەرچاو ڕوونی بدەینە گەلەکەمانو دەگەڵ ڕاستیەکانی مێژو ئاشنایان بکەین . بۆ وێنە خەڵک تێبگا کە پارێزگای ورمێی کوردستانەو ناوێ ئازەبایجانی ڕۆژئاوایان لێناوە ، نەغەدەو ورمێیومیانـدواوو و… شاری زۆرینە کوردنو بەزۆر لەملاو ئەولا ئازەریان بۆ هێناوە. بەداخەوە دۆستانی ڕوکێشو دوژمنانی ڕاستە قینەی کورد کارێکیان کردوە ئەگەر ببێتە کوردستانیش شەڕی ناوخۆی تێداهەڵدەگیرسێ چونکە پیلانی تۆکمەی بـۆ داڕژاوە ، چەنـد ساڵـە کاری بـۆ کراوە. هەڵـەی سەرجەم حیزبەکانی بەشەداگیر کـراوەکانی کوردستان لـەوە دایە کە : پـاراستنی پڕنسیپەکانی حیزبەکانی خۆیان وەپێش بەرژەوەندی گشتی گەل دەخەن، بۆیەش لە ئاکامی دانیشتن بۆ یەکگرتنو هاوکاری ناتوانن بڕیارێکی کردەوەیی دەربکەن. ویژدانی گەل داوایان لێدەکا لە سەفێکی یەگرتودا ڕزگاری نیشتمانو گەل خاڵی یـەکەمو سەرەکی هەمویان بێیو هەلو مەرجێک بڕەخسێنن ولاتەکەیان ئازاد بکەنو ئەوجارە هەرکامەیان لە کوردستانی ئازاددا بۆ دابەزاندنی پڕۆسەو بـەرنـامەکانی خۆیان بەمەرجێک زیان بە بەرژەوەندی گشتی نەگەێێنێ تێبکۆشن. بەو هیوایە بەکردەوە وەفاداریمان بە نیشتمانو گەل بسەلمێنین .
براتان مەلابرایمی مەجیدپور
2017/02/28
.