مێژوو، هەم لە ڕووی سیاسی و هەم ئەدەبی و هەم کۆمەڵایەتییەوە، شایەتی بۆ پێشەنگ بوونی کوردی خۆرهەڵات هەم لە ئاستی کوردستان و هەمیش لە ئاستی ناوچەکەدا دەدات، 
مەزنترین شاعیران و نووسەرانی کورد لە ڕۆژهەڵات سەریان هەڵدا و سەرهەڵدەدەن، زۆرترین رێژەی پەرتووک و لێکۆڵینەوەی زانستی و ماڵپەڕ و چالاکی سیاسی، بەوپەڕی بێ دەرەتانییەوە، هەمدیسان لە ڕۆژهەڵات سەرهەڵدەدەن. خەباتی سیاسیی کوردی خۆرهەڵاتیش، مێژوو بە باشی تۆمار کردووە، سمایل ئاغای سمکۆ، ژ.ک و کۆمار و شۆڕشی مەلا خەلیل، شۆڕشی هەمزە ئاغای مەنگووڕ و شۆڕشی شێخ عوبەدووڵا نەهریش کە گەرچی لە ناوچەی نەهری لە باکوورەوە سەریهەڵدا، هەر لە ڕۆژهەڵات چەکەرەی گرت و گەشاوە، شۆڕشی بارزانیش قەرزداری ڕۆژهەڵاتە و لە شۆڕشی ئەیلیوولیشدا بەپێی بەڵگەکان و بە شایەتیی مێژوو، نزیک بە ٣ هەزار کوردی ڕۆژهەڵات بەشدار بووە، لە ئێستاشدا هەر خورت و لاوی ڕۆژهەڵاتە لە شنگال و کوبانی و موسڵ شەهید دەبێ و نرخی ئازادی دەدات یان میدیا و گۆڤارەکانی باشوور، دەنەخشێنن.
بەڵام لە ئێستادا، هەرچەند چەخماخەی ڕاسان تا ئێستاش هەر بە گڕە و دڵی لە لێدان نەکەوتووە و بگرە حیزبەکانی تریش پەیوەست بەو بەرگرییە چەکدارییە ڕەوایە بوون کە شەهید بوونی سێ پێشمەرگەی نەبەزی کۆمەڵەی شۆڕشگێڕ بەڵگەیەکە لەسەر ئەو ڕاستییە، بەڵام لە هەمان کاتیشدا، چەق بەستوویی و بێدەنگییەکی یەکجار نامۆ بە ڕووحیەی خەباتکارانەی ڕۆژهەڵاتی گڕ و خوێن، باڵی بەسەر چالاکانی سیاسی و مەدەنیی ڕۆژهەڵاتدا کێشاوە، بێدەنگییەک کە وێدەچی ڕۆژهەڵات بەرەو چەقین لەناو زەلکاوێکی خنکێنەردا ببات.
لە ماوەی یەک مانگی ڕابردوودا، چالاکانی سیاسی و کەمپەینەکان، سێ داواکارییان ڕوو لە خۆرهەڵات هێنایە ئاراوە کە بە پێچەوانەی ئەو کەمپەین و هەوڵانەی کە بۆ ئازادکردن و پشتیوانی لە بەڕێز محەمەدسدیق کەبوودوەند کرا، هیچ وڵامێکی ئەرێنییان وەرنەگرتەوە و کەمترین بایەخیشیان پێنەدرا.
یەکەم: بەشێک لە چالاکانی سیاسیی کورد داوایان کرد بۆ پشتیوانی لە کۆڵبەرانی کورد و پێشگرین لە کوشتاری بێ بەزەییانەیان لەلایەن هێزەکانی کۆماری سێدارەوە، گەردەلوولێکی تویتێری وەڕێبخرێت کە مخابن هیچ دەنگدانەوە و وڵامدانەوەی نەبوو، هەرچەند بۆ جاری دووهەمیش داوا کراوە بەڵام هەمدیسان کڕ و کپ مایەوە.
دووهەم: بەشێک لە چالاکانی سیاسی و مەدەنیی کورد، داوایان لە خەڵکی کوردستان کرد تا بەشداری لە کەمپەینی ”من کوردم، ئێران نیم” بکەن و بە جیهانی نیشان بدەن کە ئەوان کوردن نەک ئێرانی، کەچی ئەو داواکارییەش هەروا بێ هیوا و نەزۆک مایەوە، وەک ئەوەی هەموو کوردێک هاوار بکا، نا من ئێرانیم و کورد نیم.
سێیەم: بەشێک لە چالاکانی سیاسی و مەدەنیی کورد، داوایان کرد تا بە دژی چەواشەکارییەکانی بی بی سی فارسی، گەردەلوولێکی تویتێری وەگەڕ بخەن و ناوزڕاندنی شەهیدی کورد بە تیرۆریست مەحکووم بکەن، بەڵام دیسانیش هیچ بەدەنگەوەهاتنێکی بەدوادا نەهات، وەک ئەوەی هەموومان قەبووڵمان بێت، ئێمە و پێشمەرگە و شەهیدەکانمان تیرۆریستن.
لە ئێستاشدا، دوکتور هێرش قادری، نووسەر، توێژەر و چالاکی سیاسیی کورد، بە هۆکارێکی ناڕوون کە دەگوترێ بە هۆی دەربازبوونی نایاسایی لە سنوور بەرەو تورکیەیە، لەلایەن ئاسایشی هەرێمی کوردستان لە زاخۆوە دەستبەسەر کراوە، هەمدیسان کوردی ڕۆژهەڵات بێدەنگە.
نووسەری ئەو دێڕانە نایهەوێ هۆکاری دەستبەسەرکران، ڕەوابوون یان ناڕەوابوونی دەستبەسەرکرانی دوکتور هێرش، تاووتوێ بکات یان ئەوەی کە هیچ لایەنێک تاوانبار بکات، بەڵکوو بە سرنجدان بە ناسیاوبوون و کاریگەریی دوکتور هێرش و زەحمەتی لەمێژینەی ئەو ڕۆڵە بەنرخەی نیشتمان، مافی بێ ئەملاوئەولایەتی، بە ڕێزەوە ئازاد بکرێت و هەموو ئاسانکارییەکی بۆ بکردرێ، کورد وەک نەتەوەیەکی بندەست و ئازادیخواز، مافی گیراو و دیلە کوردکوژەکانیشی پاراستووە چ بگات بە ڕۆڵە بەئەمەگەکانی خۆی.
کوردی ڕۆژهەڵات خەریکە، لە بێدەنگی و بێ هەستی و خۆ بەدەروەست نەزانینێکی قووڵ و بێ واتا کە زۆرتر لە کۆمەڵگایەکی سەرمایەداریی تەژی لە دێموکراسی و ئازادی و بێ ئێش دەوەشێتەوە ڕۆ دەچێ و کەمترین خەمخۆری و یەکگرتوویی بە ڕووی کوردی ڕۆژهەڵاتەوە، هەر لە سیاسی و نووسەر و ڕۆژنامەنووسەوە بگرە تا کەسانی ئاساییەوە نابیندرێ و زۆرتر سەرقاڵی کێشە و شەڕەدەندووکی حیزبی و لاوەکین کە ئەوە دەتوانی خەساری زۆر قووڵی بۆ کورد بە گشتی و ڕۆژهەڵات بەتایبەتی بەدواوە بێ.