(غەزەلێکی نیشتیمانی بۆ کاروانی نەمران و پەیمانی سەربەستی)
”جوگرافیای برین و نیشتمان”
لە دوندی ئاگری سەرکێش، وارسانی ئەم خاکەین؛
لە زێدی نووح و زەردەشت، بە خوێنی خۆمان پەیوەندین.
لە مەترێزی شەدادی، لە سەیوانی قەرەباغ؛
لە ورمێی خانی لەپزێڕین و وانی کۆنە هاوباغ.
لە کانیی برینی کورد، ئاوی ژین و خوێنی یەکین؛
لە تاریکیی شەوی مێژوو، چرای ڕوون و نەمرانی خاکین.
شەنگال و کەرکووک و گەرمیان، بە داغی خۆیان ئاگادارین؛
هەر کوێ کوردێک بریندار بێت، لەگەڵی دەگریین و دڵدارین.
لە قامیشلۆ تا عەفرین، خەمباری ڕۆژئاوای نیشتمانین؛
لە دژی دیواری تەعریب و زوڵمی نەیاران، هەمیشە ڕووبەڕووین.
لە کۆبانیی قارەمانەوە تا کەناری دجلە و فڕات؛
بە زەبر و زەنگی سەردەم، هەر نەشکاو و خاکپەروەرین.
————
”کاروانی نەمران”
لە سەر گۆڕی مەزنی خانی، هەوێنی هەستی کورمانجی؛
لە بیری شێخی پیراندا، بە ڕێگای بەرەنگاریی دۆزەکە ڕۆیشتووین.
سەید ڕەزای دێرسیم، وارسی داغی ساڵی سی و هەشت؛
بە خوێنی دێرسیم و خاکی داغدار، تا هەتایە شاهیدین.
دێرسیم بووە گۆڕستان و چیاکان بوونە شاهیدی کارەسات؛
بەڵام لەو خاکە خوێناوییە، هەر دەنگی ئازادی دەهێنین.
لەسەر ڕێگای سەید عەبدوڵڵای نەهری، بە ڕێز و یاد سەربەرزین؛
لە شێخ عەبدولسەلامی بارزانی و سمکۆی شکاک، ڕێبازی بەرخودان دەگرین.
لە ئیحسان نوری پاشا، یادگاری ئاگری و بەرخودانی مێژووین؛
لە زیلانی خوێناوی، یادەوەریی قوربانیی گەلەکەمانین.
لە قازی محەممەد، پێشەوای نیشتمان، فێری سوێند و وەفا بووین؛
لە مەلا مستەفای بارزانی، مانای نەبەزین و خۆڕاگری ناسین.
لە مام جەلالی تاڵەبانی، وانەی یەکگرتن و دانایی وەرگرتووین؛
لە دوکتۆر قاسملوو و دوکتۆر شەرفکەندی، سوێندی ئازادی نوێ دەکەین.
لە هەژاری موکریانی و هێمنی شاعیر، دەنگی ئەدەب و زمانین؛
بە ڕووناکیی ئەو دوو ئەستێرە، پاسەوانی کوردی و نیشتمانین.
لە گشت شەهیدانی کوردستان، سڵاو و ڕێزی بێشمارین؛
ئەوان ئەگەر لێرە غەریبن، لە باغی نەمریدا چرای یاد و دیدارین.
————
”پەیمانی وارسان و سەربەستی”
ئەوا نامەی هەزار سوێند، لە دڵی جڤاکەوە دەنێرین؛
بە خوێنی پاکی شەهیدان، مێژووی خۆمان دەنووسین.
نە ژێردەستی دەمانخوازێ، نە زوڵم دەتوانێ بمانشکێنێ؛
چونکە لە دڵی چیاکانەوە، بە یەک دەنگ هەڵدەستین!
نە سێدارە دەمانترسێنێ، نە زیندان دەتوانێ بمانکۆڵێ؛
لە خاکی خوێناوی خۆمان، بە هیوای ڕۆژی ئازادی دەژین.
تێدەکۆشین و ڕادەپەڕین، لە دژی زوڵم و ژێردەستی؛
بۆ کوردی ڕەسەن و ئازا، ئاڵای سەربەستی هەڵدەبڕین.
لە زاگرۆس تا تۆرۆس، لە مێزۆپۆتامیا تا کەناری ڕووبار؛
هەر شوێنێک نیشانی مێژوومانە، بۆ ئێمە یادگار و دیار.
لە ئاگری سەرکێشەوە، تا دوورترین کەناری کوردستان؛
بە یەک دەنگ دەڵێین:
کوردستان لە دڵی ئێمەیە؛
ئێمە وارسانی ئەم خاکەین!
ڕەحیم نزهتزاده
