تایبه‌تمه‌ندییه‌ به‌رزه‌کانی مرۆڤ، حوسێن نازدار

*-  سروشت وبوونه‌وه‌ران وژیان پێوه‌ندییه‌کی گه‌وهه‌ری وپته‌و وچالاکیان پێکه‌وه‌ هه‌یه‌، ئه‌و پیوه‌ندییه‌ بۆ به‌رده‌وام بوونی ژیانی بوونه‌وه‌ران پێویسته‌،

بۆ پاراستنی ئه‌و پێوه‌ندییه‌ وگه‌شه‌و دره‌و شانه‌وه‌ی مرۆڤایه‌تی، پێویسته‌ مرۆڤ ماف وئه‌رک وتێکۆشانی مرۆڤانه‌ی هه‌بێت.

*-   تایبه‌تمه‌ندییه‌کانی مرۆڤ رێژه‌یین؛پێویستی ژیان،کاروئه‌زموون،ئازادی،کات،شوێن،ژینگه‌،که‌شوهه‌وا بنەماڵه، کۆمه‌ڵگا، کولتوور، په وه‌ر‌ده‌، زانست و تێکنۆلۆژی، ئایین، نه‌ریت، باروودۆخ، سیستمی‌ سیاسی، ئابوری کۆمه‌ڵایه‌تی، کاریگه‌ری گرینگیان له‌سه‌ر لایه‌نی ئه‌رێنی و نه‌رێنی تایبه‌تمه‌ندییه‌کانی مرۆڤ هه‌یه‌.

* – مرۆڤ بوونه‌وه‌رێکه‌ که ‌جه‌سته‌، مێشک، ئه‌قل، زمان، هۆش و ئه‌ندیشه‌ی له‌ب وونه‌وه‌رانی دیکه‌ پێگه‌یشتووتر و پێشکه‌وتووتره‌ و به ‌پێی پێویستی ژیان به‌ره‌به‌ره‌ گه‌شه‌ی کردوه‌ و بۆته‌ بوونه‌وه‌رێکی قسه‌که‌ر.

*- مرۆڤ به‌پێی سروشتی خۆی بوونه‌وه‌رێکی کۆمه‌ڵایه‌تی خودئاگا، سیاسی، ئازاد و ئه‌قڵمه‌نده‌، خاوه‌نی هه‌ست و سۆز و هۆش و ویژدانه‌، توانای گه‌شه‌کردنی هه‌یه‌، لایه‌نێکی که‌سایه‌تیه‌که‌ی ده‌که‌وێته‌ ژێر کاریگه‌ری “ئه‌قڵ و لۆژیک “لایه‌که‌ی دیکه‌ی ده‌که‌وێته‌ ژێر کاریگه‌ری”هه‌ست و سۆز”ه‌وه‌، ئه‌و تایبه‌تمه‌ندییانه‌ پێوه‌ندی زیندووییان له‌گه‌ڵ یه‌کتر هه‌یه ‌و پێکه‌وه که‌سایه‌تی مرۆڤ ته‌واو ده‌که‌ن.

 * –مرۆڤ به‌گوێره‌ی سروشتی خۆی بۆنه‌وه‌رێکی ئازاده‌؛ خاوه‌نی ڕه‌های جه‌سته‌ و روحی خۆیه‌تی ومافی ژیان و ئاسایش و سەر‌به‌خۆی بڕیاردان و ئازادی له‌ هه‌ڵبژاردنی جۆری بڕیار دانی هه‌یه‌، ئازادی له ‌سروشتی مرۆڤ دایه‌ و پێوه‌ندی به‌ خودی مرۆڤه‌وه‌ هه‌یه‌، مرۆڤ و ئازادی هاوزای یه‌کترن، مرۆڤ به‌درێژایی مێژووی مرۆڤایه‌تی خولیای ئازادی بووه‌، مرۆڤ ئازادترین بوونه‌وه‌ره‌که‌ له‌ هه‌موو بوونه‌وه‌رانی دیکه‌ زیاتر هه‌ست به‌ به‌ر پرسایه‌تیی ده‌کات.

* –مرۆڤ بوونه‌وه‌رێکی ئه‌قڵمه‌نده‌؛ ئه‌قڵ گرینگترین توانایه‌ که‌ مرۆڤ بۆ سه‌ربه‌خۆیی بوونی خۆی هه‌یه‌تی، ئه‌قڵ گه‌وهه‌ری یاسای ژیانی مرۆڤه‌ و چرایه‌که‌ بۆ رێنوێنی کردنی خواسته‌کان، واته رێنوێنی ده‌دا به ‌مرۆڤ که‌ چ بخوازێ وچ بڵێ و چ  بنووسێ و چۆن هه‌ڵسوکه‌وت بکات.  توانای ئه‌قڵی مرۆڤ  به‌رامبه‌ر به‌ زۆری و گه‌وره‌یی و جۆراوجۆری زانیارییه‌کان سنوورداره‌.

 *مرۆڤ ‌ به‌ گوێره‌ی سروشتی خۆی بوونه‌وه‌رێکی  خاوه‌ن ئه‌ندیشه‌یه‌؛ واته‌ خاوه‌نی بیر، بیرۆکه، بیرکردنه‌وه، گومان، ترس، خه‌م و نیگه‌رانی و هه‌روه‌ها خاوه‌نی روانگه‌، تێڕامان، تێڕوانین، تێبینی، پرسیار، ره‌خنه‌، پێشنیار، ڕاڤه‌، هه‌ڵسه‌نگاندن، هه‌ڵوێست و بڕیاره‌ .  

 *-له‌به‌ر ئه‌وه‌ی مرۆڤ هه‌م خاوه‌ن ئه‌قڵه‌ و هۆشه‌  و هه‌م بابه‌تی یاسایه‌ و هه‌م یاسادانه‌ره‌، به‌رده‌وام سنووره‌کانی یاسای سروشت ده‌به‌زێنێ، ته‌نانه‌ت ئه‌و یاسایانه‌ش ده‌گۆرێ که‌خۆی دایناون. 

  مرۆڤ له‌ سه‌ره‌تای” بوونیه‌وه‌”تا هه‌نووکه‌ قۆناغی جۆراو جۆری له‌ گۆڕان و گه‌شه‌کردن بڕیون، له‌ ئێستا و داهاتووشدا به‌ به‌رده‌وامی پێویستی به‌گه‌شه‌ و پێشکه‌و‌تن هه‌یه‌، له ‌جیهانی ئه‌مرۆدا به‌ هۆی پێشکه‌وه‌تنی خێرای تێکنۆلۆژی زانیاری و پێوه‌ندییه‌کان، گۆڕان و گه‌شه‌ی خێرا بۆته پێویستی ژیان و خولیای مرۆڤ.

حوسێن نازدار