پەرلەمانی بلژیک یاسای” کوشتن لە رووی بەزەییەوە” بۆ منداڵانی نەخۆشی بێ چارەسەر پەسند کرد .
لەوە پێشیش ئەو یاسایە لە بلژیک پەیرەو دەکرا بەڵام پەرلەمانی بلژیک بە ٥٠ دەنگی ئەرێ لە بەرانبەر ١٧ دەنگی نەخێری بۆ کوشتنی مناڵان لە رووی بەزەییشەوە پەسند کرد .
بە پێی ئەو خاڵە لە یاسای بلژیک ئەو منداڵانەی ئازارێکی زۆر دەچێژن و هیچ چارەسەریشیان نییە ، دەتوانن داوا لە پزیشکەکان بکەن تا کۆتایی بە ژیانیان بێنن .
بۆ جێبەجێ کردنی ئەو یاسایە ، پێویستە لە لایەن مەجلیسی زانایانیشەوە پەسند بکرێ و دەگوترێ :” پێ دەچی لە لایەن ئەوانیشەوە بە پەسند بگات ”.
حکوومەتی بلژیک ساڵی ٢٠٠٢ یاسای ” کوشتن لە رووی بەزەیی” بۆ کەسانی سەروو ١٨ ساڵ کە تووشی نەخۆشی چارەسەر نەکراو بوون ، پەسەند کردبوو .
لە ئەگەری پەسەند کردنی ئەم یاسا نوێیە ، بلژیک دەبێتە یەکەم وڵات کە بە بێ رەچاو کردنی تەمەن لە پێناو یارمەتیدانی نەخۆشی بێ چارەسەر ، کوشتن لە رووی بەزەیی جێبەجێ دەکات .
لەگەڵ هەموو ئەوانەشدا یاسا نوێکە چەند مەرجێکی تایبەت بە خۆی هەیە :
* نەخۆشەکان پێویستە بە تێگەیشتنەوە بریار بدەن و واتای کوشتن لە رووی بەزەییەوە تێبگەن .
* داواکاری ئەوان پێویستە لە لایەن گەورەکانیان و دەستەی پزیشکییەوە قبووڵ بکرێ .
* نەخۆش پێویستە چارەسەری نەبێ و هیچ جۆرە دەرمانێک بۆ کەم کردنەوەی ئێش و ئازار بوونی نەبێ .
ڕێکەوتی ١٦ی نەوامبر دوکتورەکانی بلژیک لە رێگەی نامەیێکەوە داوایان لە یاسادانانی ئەو وڵاتە کرد تا یاسای ” کوشتن لەرووی بەزەییەوە” بۆ مناڵان پەسند بکات .
ئەوان لە بەشێکی نامەکەیان نووسیویانە:” ئەزموون نیشانی داوە کاتێک نەخۆشی کەسێک زۆر بەڕچاوە و مەترسی گیان لەدەست دانی لێ دەر ئەکەوێ ، کەسانی خوار تەمەنی یاسایی بە خێرایی هەستی بیرکردنەوەیان گەشە دەکات و باشتر دەتوانن خواستەکانیان دەر ببرن .
سیناتۆر ژان ژاک دوگوش لە لایەنگرانی یاساکە دەڵێ :” بۆ چێشتنی ئازاری زۆر ئاستی هیچ تەمەنێک لەبار نییە ، بە تێگەیشتن لەمە پێویستە کە ئێمە چوارچێوەیەکی یاسایی دابرێژین تا ئەو دوکتورانەی کە رووبەرووی داخوازییەکی لەو جۆرە دەبنەوە ، توانای بریاردانی دروستیان هەبێ . هەروەها ئەو مناڵانەی ئازار دەچێژن پێویستە لە بریاردانی چارەنووسی خۆیان ئازاد بن”.
بەڵام دژبەرانی ئەم یاسایە دەڵێن کە مناڵان توانای دانی بریارێکی لەو جۆرەیان نییە .
ئالس وان هۆف لە حیزبی دێموکرات مەسیح دەڵێ :” مناڵان لە لایەن گەورەکانیان و دوکتورەکانەوە دەکەونە ژێر کاریگەرییەوە و کەواتە بە بڕوای ئێمە ، ئەوان( منداڵان) توانای بریاردان لە سەر بابەتێکی گرینگی وەک مردنیان نییە ”.
وەرگێردراو لە فارسییەوە بۆ کوردی: رەشید زەرواوی
سەرچاوەی بابەت : سایتی هەواڵدەری بەشی فارسی ” بی بی سی ”