لە ئینشعابەوە بۆ یەكگرتنەوە ، وتووێژ

لە ڕێكەوتی دامەزراندنی یەكەمین حیزبی سیاسی لە جیهاندا واتە ساڵی 1792ی زایینی تا یەكەمین جیابوونەوە لە نێو حێزبە سیاسییەكاندا لە ساڵی 1824ی زایینی لە ویلایە یەكگرتووەكانی ئامریكا و دروست بوونی یەكەمین حیزبی سیاسی لە ئێران لە ساڵەكانی 1920ی زایینی و یەكەمین حیزبی سیاسی لە كوردستانی ئێران واتە ساڵی 1945ی زایینی كە بەرهەمەكەی حیزبی دێموكراتی كوردستانی ئێرانی ئێستایە، مێژووی حیزبە سیاسییەكان لە سەرتاسەری جیهاندا هەوراز و نشێوی زۆری بە خۆیەوە بینیوە.

لە ڕاستیشدا حیزبی دێموكراتیش لەم هەوراز و نشێوانە بێبەش نەبووە و لە مێژووی 69 ساڵەی دامەزراندنی خۆیدا تووشی گەلێك قەیران و ئاڵۆزی بووە كە دەتوانین لەم قەیران و ئاڵۆزییانە هێما بكەین بۆ یەكەمین جیابوونەوەكان لەم حیزبە لە ساڵی 1980ی زایینی لە كونگرەی چوارەمی ئەم حیزبە و جیابوونەوەی تاقمی 7كەسی، ساڵی 1988ی زایینی و جیابوونەوەی گرووپێك كە ناوی ڕێبەرایەتیی شۆڕشگێریان لە خۆیان نا، شەهیدبوونی دوو سكرتێری ئەم حیزبە لە ساڵەكانی 1989 و 1992ی زایینی تا جیابوونەوەی كۆمەڵێك لە كادر و پێشمەرگەكانی ئەم حیزبە پاش كونگرەی 13 لە ساڵی 2004ی زایینی.

بابەتێك كە لەم ڕۆژانەدا بووەتە ڕۆژەڤی پرس و باسە پێوەندیدارەكان بە حیزبی دێموكراتی كوردستانی ئێرانەوە، پرسی یەكگرتنەوەی ئەو هاوڕێیانەیە لەگەڵ حیزبی دێموكراتی كوردستانی ئێراندا.

ڕۆژنامەی كوردستان بە بۆنەی 19ی بەفرانبار، ڕێكەوتی هاتنەوەی “ڕێبەڕایەتیی شۆڕشگێر” بۆ نێو ڕیزە تەشكیلاتییەكانی حیزبی دێموكراتی كوردستانی ئێران لە ساڵی 1375ی هەتاوی و گەرمبوونی باسی یەكگرتنەوە لە سەردەمی ئێستادا، وتووێژێكی لەگەڵ بەڕێز كاك موحەمەد نەزیف قادری، ئەندامی دەفتەری سیاسیی حیزبی دێموكراتی كوردستانی ئێران و سەرپەرستی گرووپی دانووستانكاری حیزب بۆ پرسی یەكگرتنەوە لەگەڵ هاوڕێیانی پێشوو پێك هێناوە تا لەم پێوەندییەدا دوایین زانیاری و وردەكارییەكان بخاتە بەر دیدی خوێنەرانی بەڕێزی ڕۆژنامەی كوردستان.

پ1: بەڕێز كاك موحەمەد نەزیف سەرەتا ئەگەر بكرێت بە كورتی باسی جیابوونەوەكانی ڕابردوو لە حیزبی دێموكرات و بەتایبەت ئەو هۆكارانەمان بۆ بكەن كە چی بوو بە هۆی ئەوەیكە پاش كونگرەی 13ی حیزبی دێموكرات، كۆمەڵێك لە كادر و پێشمەرگەكانی ئەم حێزبە لە ڕیزەكانی حیزب جیابوونەوە و ئینشعابیان كرد؟

و: بەو ئاوڕدانەوەی كە هێماتان بۆ كرد، لە مێژووی خەباتی حیزبە
سیاسییەكان بۆ بەدەستەوەگرتنی دەسەڵاتی سیاسی هەوراز و نشێوی زۆر بووە و ئەمەیش شتێكی سروشتییە. جیاوازيی بیروڕا و خوێندنەوەی جۆراجۆر لەسەر پرسە سیاسییەكان و جیاوازيی لە شێوەی بەڕێوەبردن و زۆر بابەتی دیكە هۆی ئەم جیابوونەوانەیە. ئەوەی جێی سەرنج و تێڕوانینە و لەلایەن ڕای گشتییەوە بە بایخەوە شرۆڤە دەكرێ ئەوەیە، ئایا دوایی هەر جیابوونەوەیەك ڕێكاری كۆتایی هێنان بە ناكۆكییەكان و ئاسایی كردنەوەی پێوەندییەكان لەبەر دەگیرێ كە نەبێتە كۆسپ لەسەر بەردەوام بوونی خەباتی ئەو لایەنە سیاسییە؟ ئەوەی دەگەڕێتەوە بۆ سەر جیابوونەوەكان لە حیزبی دێموكراتی كوردستانی ئێران هەم لایەنی فكریی هەیە و هەم لایەنی تكنینكی ـ وەك جیابوونەوەی ئەو كەسانەی لە كۆنگرەی چوارەمی حیزب كە بە تاقمی 7 كەسی ناسراون ـ ئەو هاوڕێیانە پێوەندییان بە حیزبی تودەی ئێرانەوە بوو، شێوەی بیركردنەوە و لێكدانەوەی سیاسی و چۆنیەتیی هێنانە بەرباسی داخوازییەكانی گەلی كوردیان لە چوارچێوەی جیهانبینی ئەو حیزبەدا بوو، بە گشتی باوەڕیان بەو شێوە خەباتە نەبوو كە لە كۆنگرەی چواردا جەختی لەسەر كرا. ڕەوتی ڕووداوەكانیش دەری خست كە سیاسەتەكانی حیزبی دێموكراتی كوردستانی ئێران دروست بوون و هەم حیزبی تودە و هەم ئەو كەسانە جیابوونەوە بە ئەو ئەنجامە گەیشتن كە بە لاڕێدا چووبوون.

جیابوونەوەی كونگرەی 8 زیاتر لایەنی تكنیكی بوو تا لایەنی فیكری. چون ئەو هاوڕێیانە كە لە كۆنگرەی 8ی حیزب جیابوونەوە بە ناوی ڕێبەرایەتیی شۆڕشگێر خۆیانیان ناساند، لە ڕاستیدا هیچ بنەمایەكی سیاسی و ڕێكخراەیی لە ئارادا نەبوو، كۆمیتەی ئامادەكاری ئەو كاتی كۆنگرەی 8 میكانیزمی هەڵبژاردنی ئەندامانی ڕێبەريی بە لەبەرچاوگرتنی بارودۆخی سیاسيی ئێران و بزووتنەوەی كورد شێوەكاری حیزبی دێموكراتی كوردستانی ئێرانى هێنایە بەر باس و خستیە بە نەزەری نۆێنەرانی كۆنگرە و لەلایەن كۆنگرەوە پەسەند كرا. ئەوان بەوە ڕازی نەبوون و جیابوونەوەی خۆیانیان ڕاگەیاند و لە حیزبی دێموكراتی كوردستانی ئێران دابڕان. هەروەك هێمام بۆ كرد ئەوان بە هەڵگرتنی ناوی حیزبی دێموكراتی كوردستانی ئێران (ڕێبەرایەتيی شۆڕشگێر) بۆ هاوكاری كردن لەگەڵ یەكتر وەك دوو حیزب، گیروگرفتێكی لێ كەوتەوە.

جیابوونەوەی ئەو هاوڕێیانە كە دوای كۆنگرەی 13ی حیزب جیابوونەوە و بە ناوی “حیزبی دێموكراتی كوردستان ـ ئێڕان” جیابوونەوەی خۆیان ڕاگەیاند، لە ڕاستیدا ئەم جیابوونەوە، نە لایەنی فیكريی بوو نە جیاوازی لە شێوەی گرتنی كۆنگرە و چۆنیەتيی بەڕێوەچوونی كۆنگرە، لەم كۆنگرەیەدا تەواوی ڕێوشوێنەكانی گرتنی بە پەسەندی كۆمیتەی ئامادەكاری كۆنگرە كە سكرتێری ئەوكاتی حیزب بەرپرسی بوو گەیشتووە. هەروەها كۆمیسیۆنی هەڵبژاردن بە جۆرێك چاوەدێريی بەسەر ئەو هەڵبژاردنەدا كرد، كە كەمترین كەموكووڕی پێوە دیار نەبوو و بە شێوەیەكی دێموكراتیك بەڕێوە چوو. بە گشتی هەم لە پەسەندكردنی هێڵە سیاسیيەكاندا و هەم لە دیاریكردنی یاسا و ڕێساكانی هەڵبژاردندا بڕیاری گشتيی كۆنگرەی لەگەڵ بوو. بەگشتی ئەم جیابوونەوە هیچ هۆیەكی نەبوو و پاساو هەڵگر نیە، سەرەڕای ئەوە، خودی جیابوونەوەكە زیان گەیاندن بە جووڵانەوەی كورد و یەكیەتیی تەشكیلاتی حیزبی دێموكراتی كوردستانی ئێران بوو. چون بە ناوێكەوە خۆیان ناساند كە دووپاتكردنەوەی ئەزموونی شكست خواردووی ئەو هاوڕێیانە بوو كە لە كۆنگرەی 8 جیابوونەوە. هەر دوای ڕاگەیاندنی بەیانییەی جیابوونەوەیان لە یەكەم دانیشتنمان لەگەڵیاندا، داوامان لێكردن واز لە جیابوونەوەكە بێنن چون ئێمە لەسەر ئەو بڕوایە بووین و ئێستاش هەین كە ئێمە هاوڕێ و هاوسەنگەرین و دەكرێ بە دیالۆگ و تەنانەت گرتنی كۆنگرەی پێشوەخت ئەو كەموكووڕیانەی چارەسەر بكەین بەڵام بە داخەوە قبوڵیان نەكرد. دوای ئەوە داوامان لێ كردن ئیستا كە هەر سوورن، لەسەر جیابوونەوە ناوێك هەڵبژێرن نەبێتە كۆسپ لەسەر ڕێگای دۆستایەتی و هاوكارییمان. بە داخەوە ئەمەیشیان قبوڵ نەكرد و هەر ئەو سیاسەتەی جیابوونەوەی كۆنگرەی 8یان گرتەوە بەر.

دوای جیابوونەوەیان، باسی یەكگرتنەوەیان هێنایە ئاراوە و لەلای دۆستانی حیزب جۆرێك قسەیان دەكرد كە ئەوە حیزبی دێموكراتی كوردستانی ئێرانە نایەوێ یەك بگرینەوە. لە حاڵێكدا پێش لە ڕاگەیاندنی جیابوونەوەیان ئێمە هەموو هەوڵی خۆمان دا، بنەماڵەی شەهیدان، مامۆستایانی ئایینی، كەسایەتییە سیاسی و زانستییەكان، پۆل پۆل دەهاتن و داوایان لێكردن ئەو كارە نەكەن. بەڵام بەداخەوە ئەوان بە هیچ هەوڵێكی دڵسۆزان و ئەوانەی بەپرۆشی حیزبەوە بوون گرنگییان نەدا. دوای جیابوونەوەیشیان باسی یەكگرتنەوەیان تەنیا بە مەبەستی پاكانە و پاساوهێنانەوە بۆ جیابوونەوەیان هێنایە ئاراوە. ئێمە پاش ئەو ڕەوشە نەخوازراوە، جارێكی دیكە بە ئەركی سیاسی و مێژوویی خۆمان هەڵساین و دەستپێشخەریەكی نوێمان دەست پێكرد و لە پلینیۆمی 14یەمی كۆنگرەی 14یەمی حیزب، ڕێبەریی حیزب بڕیاری ئاسایی كردنەوەی پێوەندییەكانی لەگەڵ ئەو هاوڕێیانە دا و دوای دەفتەری سیاسی هەیئەتی بۆ دیالۆگ لەگەڵیان دیاری كرد. پاش ڕاگۆڕینەوە بۆ دیدار و چاوپێكەوتنیان، یەكەمجار هەیئەتی ئێمە سەردانی كردن و پەیامی پلینیۆم و سیاسەتی حیزبیان لەگەڵ هەیئەتی ئەوان باس كرد. هەرچەند بە ڕەواڵەت پێشوازییان لەو سیاسەتەی حیزب كرد، بەڵام دوایی وەك ئەوەی ئێمە و خەڵكی كوردستان و دۆستانی كورد چاوەڕوانیان دەكڕد بە پیریەوە نەهاتن و خۆیان لە ئەسڵی مەسەلەكە كە هەوڵی یەكگرتنەوەی ڕیزەكانی حیزبی دێموكراتی كوردستانی ئێرانە بووارد و تەنانەت لە گەڵاڵەكەیشیاندا بە لایدا نەچوون.

پ2: بەسەرەنجدان بەو باسەی كە پێشكەشتان كرد، دەتوانن ئێستا باسی ئەوەمان بۆ بكەن كە چی ڕوویداوە كە پاش 7 ساڵ حیزبی دێموكراتی كوردستانی ئێران دەیهەوێ لەگەڵ ئەو هاوڕێیانە یەك بگرێتەوە؟ ئایا لەم پێوەندییەدا گۆڕانێك بەسەر ڕوانگە و بیروبۆچوونەكاندا هاتووە؟ (مەبەست ئەو ڕوانگە و بیروبۆچوونانەیە كە بوون بە هۆی ئینشعاب لە حیزبدا پاش كونگرەی 13)

و: هەڵدان بۆ چارەسەری تەنگ وچەڵەمەكان و هەڵگرتنی لەمپەڕەكانی سەر ڕێگای یەكگرتنەوە، ئەركی سیاسی و حیزبیی ئێمەیە. هەروەك باسم كرد بۆ ڕوونەدانی ئەو جیابوونەوەیە ڕێبەریی كۆنگرەی 13 هەموو ڕێوشوێنێكی گرتە بەر ئەوان قبوڵیان نەكرد. ئەگەر لێكدانەوە و هەڵسەنگاندنێكی واقیعبینانە لەسەر ئەو مەسەلەیە بكەین لە ڕوانگەی ئەو هاوڕێیانەدا، گۆڕان و ئاڵوگۆڕێكی بنەڕەتیی دوای ئەو جیابوونەوەیە بە نیسبەت حیزبەوە پێك نەهاتووە.

پ3: لایەنی بەرامبەر واتە هاوڕێیانی پێشوو، باس لەوە دەكەن كە بیڕۆكەی یەكگرتنەوەی حیزب یەكەمجار لە لای ئەوانەوە خراوەتە بەر باس و بە پێی ڕاگەیەندراوی فەرمیی خۆیان، ئەوان لە ساڵی 1391ی هەتاوی گەڵاڵەیەكیان بۆ یەكگرتنەوە ئامادە كردبوو كە بە سەرنجدان بە بارودۆخی ئەوكات ئەوان لە ساڵی 1392ی هەتاوییدا پێشكەشیان كردووە بە حیزبی دێموكرات، ئەم لێدوانە فەرمییەی ئەوان تا چەند ڕاستە و ئەگەر ڕاستە حیزبی دێموكراتی كوردستانی ئێران لەم پێوەندییەدا چ هەنگاوێكی هەڵگرتووە؟

و: ئەوە ئەساسی نیە. كەسێك ئەو هەوڵ وتێكۆشانە هەمە لایەنەی دۆستانی حیزب و خەڵكی كوردستان لەبەرچاو نەگرێ و ئینشعاب بكا و ئامادە نەبێ تا گرتنی كۆنگرەیەكی دیكە لە ڕیزەكانی حیزبی دێموكراتی كوردستانی ئێران بمێنێتەوە و درێژە بە خەباتی خۆی بدا و لە كۆنگرە هەوڵی تەشكیلاتیی خۆی بۆ گەیشتن بە مافە تەشكیلاتییەكانی بدا، چۆن خەڵك و كەسانی سیاسی ئەو قسەیەی لێ وەردەگرن؟ یەكەمجار ئێمە بۆ یەكگرتنەوەی ڕیزەكانی حیزبی دێموكراتی كوردستانی ئێران، لەسەر بنەمای سیاسی و تەشكیلاتیی یەكگرتنەوەی دوای كۆنگرەی 10 قسەمان كردووە. ئەوەیكە باسی دەكەن تەبیعەتی جیابوونەوەكان جیایە و كۆمەلێك قسە لەو بارەوە دەكەن ئێمە وتومانە و زۆر دۆستانە قسەمان لەسەر كردووە، خاڵی گەوهەریی ئەو ڕێككەوتننامەیە (گەڵاڵەی پێشنیاریی حیزب) ئەوەیە هەمووان لە دەوری حیزبی دێموكراتی كوردستانی ئێران كۆ دەكاتەوە و سیاسەتی جیابوونەوە ڕەت دەكاتەوە و كۆتایی بە ئەوە دێنێ كە ئەگەر هەر كەس یا گرووپێك بە ئەنجامی دڵخوازیان نەگەیشتن بە ناوی حیزبی دێموكراتەوە جیا ببنەوە. ئێمە وتومانە ئامادەین لەسەر خاڵە ئەرێنییەكانی دیالۆگ بكەین. ئەوان بە شێوەیی فەرمی قبوڵیان نەكرد، لە بەرامبەردا نووسراوەیەكیان بۆ ئێمە نارد ـ ناوی گەڵاڵەیان لەسەر داناوە ـ لە ڕوانگەی ئێمەوە ئەوە هەوڵدان بۆ یەكگرتنەوەی ڕیزەكانی حیزبی دێموكراتی كوردستانی ئێران نیە. لەو بەناو گەڵاڵەیەدا، بە جیابوونەوە ڕەوایی ئەدرێ و هێما بۆ جیابوونەوە لە حیزبی دێموكراتی كوردستانی ئێران نەكراوە. باس لە دوو حیزبی دێموكراتی كوردستان دەكا و یەكگرتنەوەی حیزبی دێموكراتی یەكگرتوو. قسە ئەوەیە، شوناسی حیزبی دێموكراتی كوردستانی ئێران، پڕۆسەیەكی سیاسییە لە حیزبی دێموكراتی كوردستانەوە هاتووە تا ئێستا ئەم پڕۆسەیە بە درێژایی مێژووی 68 ساڵەی خەباتی حیزب ڕەوایی لە كۆنگرەكانی وەرگرتووە، ئەوان كە لە دوایین كۆنگرەی هاوبەشمان (ك.13) تەواوی هێڵە سیاسییەكان و هێماكانی حیزبیان پەسەند كرد و دوای پێچەوانەی ئەو ڕەواییە هەڵویستیان گرتووە. هەر بۆیە بە شێوەی یاسایی و بە پێی بەرنامە و پێڕەوی حیزب، ناتوانن هەڵگری ئەو شوناسە بن.

پ4: ئایا حیزبی دێموكراتی كوردستانی ئێران وەك حیزبی دایك، خاوەنی گەڵاڵەیەك بووە یان هەیە بۆ یەكگرتنەوە لەگەڵ ئەو هاوڕێیانەی كە پاش كونگرەی 13 لە حیزب ئینشعابیان كردووە؟

و: پێشتر هێمام بۆ كردووە، ئێمە لەسەر بنەمای سیاسی و تەشكیلاتییەكانی یەكگرتنەوەی دوای كۆنگرەی 10 كە هەمووان لەسەری كۆك بووین پێداگری دەكەین.

پ5: ئەوان بە فەرمی باس لەوە دەكەن كە ئەو گەڵاڵەیە كە لە لایەن حیزبەوە دراوە بە ئەوان، ڕێك ئەو گەڵاڵەیە كە پێش لە ساڵی 1375 بۆ هاتنەوەی “ڕێبەرایەتیی شۆڕشگێر” ئامادە كراوە و لەو باوەڕەدان كە ئەو گەڵاڵەیە ناتوانێ گارەنتیكەری یەكڕیز مانەوەی حیزب بێت لە داهاتوودا، چون ئەوان لە ڕاگەیەنراوە فەرمییەكەیاندا كە بە ناوی “لە پەراوێزی گەڵاڵەی پێشنیاریی حیزبی دێموكراتی كوردستان بۆ یەكگرتنەوەی دێموكراتەكان” لە ماڵپەڕە فەرمییەكەیاندا بوونی هەیە، بە ڕاشكاوانە باس لەوە دەكەن نە حیزبی دێموكراتی كوردستان “ڕێبەرایەتیی شۆڕشگێری” ئەو كاتە و نە حیزبی دێموكراتی كوردستانی ئێران، حیزبی دێموكراتی كوردستانی ئێرانی ئەو كاتە. مەبەستیان لەم جۆرە ئاخاوتن و لێدوانە و وەڵامی ئێوە لەم پێوەندییەدا چیە؟

و: ئەوان چۆن ڕەوشی خۆیان و ڕێبەرایەتیی شۆڕشگێر هەڵدەسەنگێنن خوێندنەوەی خۆیانە. لە ڕوانگەی ئێمەوە ئەگەر هاوڕێیانی ڕێبەرایەتی شۆڕشگێر ڕەخنەیان لە میكانیزمی گرتنی كۆنگرەی 8 بوو كە پێچەوانەی ئیرادەی كۆنگرەی 8 بوو. خۆ ئەم هاوڕێیانە دوایی كۆنگرەی 13، جیابوونەوە ئەوەیشیان نیە. لە ڕاستیدا هیچ بیانوویەكیان بۆ ئەو جیابوونەوەیە نەبوو، حیزبی دێموكراتی كوردستانی ئێران هەر ئەو حیزبەیە كە هەیە و پێشتریش هەبووە و ئەڵبەت ئێستا بە جێگە و پێگەیەكی سیاسی و نەتەوەیی بەرچاوتر. ئەزموون و ئاكامی جیابوونەوەكانیش بۆ هەمووان ڕوون و ئاشكرایە و پێویستی بە تەفسیر كردن نیە.

پ6: هەندێك لەسەر ئەو بڕوایەن كە حیزبی دێموكراتی كوردستانی ئێران دەبووا گۆڕانكاریی بەسەر ئەو گەڵاڵەیەدا بهێنابایەت كە پاش كونگرەی 10 بۆ هاتنەوەی “ڕێبەرایەتیی شۆڕشگێر” ئامادەی كردووە و ئەم گەڵاڵەی وەڵامدەری ویست و داخوازییەكانی ئەم سەردەمە نییە. مەبەستی حیزبی دێموكرات لە خستنە ڕووی ئەم گەڵاڵەیە چیە؟ ئایا حیزب دەیهەوێ بە هەمان شێوەی ساڵی 1375 لەگەڵ ئەو هاوڕێیانە بجووڵێتەوە؟ یان ئەوەیكە بنەما تەشكیلاتییەكانی ئەم گەڵاڵەیە ئامانجی حیزبی دێموكراتە؟

و: ئێمە لەگەڵ ئەو هاوڕێیانە باسمان كردووە، ئەوان ئەو گەڵاڵە پێشنیاڕیەی ئێمە تاوتوێ بكەن و بە لەبەرچاو گرتنی لایەنەكانی، لە خوێندنەوەی خۆیان ئاگادارمان بكەنەوە و لەسەر شتە هاوبەشەكانی قسە دەكەین.

پ7: دەكرێت بە كورتی باسێك بكەن لە گەڵاڵەی پێشنیاریی ئەوان و بڵێن چ شتێكی نوێ لەو گەڵاڵەیەدا هەیە كە ئەوان بەو شێوەیە هەڵوێست دەگرن و پەرچەكردار لە خۆیان دەنوێنن؟

و: لە نووسراوەكەی ئەواندا باسی ئەوە ناكرێ ئەوان لە حیزبی دێموكراتی كوردستانی ئێران جیابوونەتەوە. باسی 2 حیزبی دێموكرات دەكەن. ڕەوایی بە جیابوونەوەیان ئەدەن. باسی یەكگرتنەوەی حیزبی دێموكراتی یەكگرتوو دەكەن و كۆمەڵێك شتی دیكە كە لە ڕاستیدا ئامانجیان یەكگرتنەوە بە مانای یەكگرتنەوەی ڕیزەكانی حیزبی دێموكراتی كوردستانی ئێران نیە كە كۆنگرەی 15ی ئێمە جەختی لەسەر كردەوە.

پ8: چ پێكناكۆكیەك هەیە لە نێوان ئەم دوو گەڵاڵەیەدا؟

و: گەڵاڵەی پێشنیاریی ئێمە، بنەمای سیاسی و تەشكیلاتی دەستەبەركردنی یەكیەتیی ڕیزەكانی حیزبی دێموكراتی كوردستانی ئێرانە. گەڵاڵەی ئەوان، باس لە حیزبی دێموكراتی یەكگرتوو دەكا، ڕوون نیە شوناسی ئەو حیزبی دێموكراتی یەكگرتوو چیە و لە كوێوە سەرچاوەی گرتووە و هەڵگری چ گوتارێكە؟ ئەمە لەگەڵ رەساڵەتی حیزبی دێموكراتی كوردستانی ئێران یەك ناگرێتەوە.

پ9: كەموكووڕیی گەڵاڵەكەی ئەوان لە ڕوانگەی ئێوەوە چییە و پێتان وایە دەكرێ بە وتووێژی زیاتر ڕوانگەكانتان لێك نزیك بكەنەوە بۆ گەیشتن بە گەڵاڵەیەكی هاوبەش؟

و: كەموكووڕیيەكانی گەڵاڵەی پێشنیاريی ئەوانم باس كرد. بوونی ئەم كەموكووڕییانە بەو مانایە نیە ئێمە كۆتایی بە دیالۆگمان بێنین، سیاسەتی ئێمە لە ڕۆشنایی بڕیاری كۆنگرەمان، بەردەوام بوونمان لە دیالۆگ و هاوكارییە لە چوارچێوەی ڕێوشوێنە سیاسییەكانمان و هیوادارم تێكۆشەرانی دێموكرات ئەم ڕەوتە بە چەشنێك درێژە پێ بدەن كە یەكگرتنەوەی بەدواوە بێ و لە خزمەتی ئامانجی گەلی كورد و یەكڕیزيی حیزبی دێموكراتی كوردستانی ئێراندا بێت و لەم پڕۆسەیەشدا براوە و دۆڕاو نیە. لە ڕوانگەی ئێمەوە تەنیا براوەی ئەم پڕۆسەیە حیزبی دێموكراتی كوردستانی ئێرانە و ئەویش لە خزمەت بەرژەوندییەكانی گەلی كورددایە.

زۆر سپاس بۆ ئەوەیكە بەشداری ئەم وتووێژە بوون لەگەڵ ڕۆژنامەی كوردستاندا

سپاس بۆ ئێوەش و پێكهێنانی ئەم وتووێژە. هیوادارم لە كارەكانتاندا سەركەوتوو بن و جارێكی دیكە سپاس بۆ ڕۆژنامەی كوردستان

 

وتووێژ: كوردستان

سەرچاوە: کوردستان میدیا