"an independent online kurdish website

بە دڵنیایەوە خەونی نەیاران و دژبەرانی حیزبی دێمۆکڕاتی کوردستانی ئێران لە ژێر گڵ دەنێین و بە خۆشیەوە ئەو ئیرادەیەش بە هێزە،

کە ئەزمووانێکی شکەست خواردووی تر تاقی ناکرێتەوە و بە یەکگرتوویی تەشکیلاتی و بە هێوری و هەڵوێستی نەرم و ڕوانینی ژیرانەدا دەتوانین بە سەر کێشەکاندا زاڵ بین.

وەفادارانی بە وەفای ڕێبازی دکتۆر قاسملووی نەمر هەرگیز کارێک ناکەن دوژمن و نەیارانی ئەو گەورە ڕێبەرەی پێ شاد و سەر مەست بن و چەپڵەی بە تاوات گەیشتن لێبدەن و پێیان وابێت هاوڕێیان دەرفەتی پێکەوە هەڵکردن و قسەکردنیان نەماوە، بەڵکوو تەشکیلاتی حیزب یەکگرتوویی دەوێ و کەس ناکەوێتەوە  شوێن ڕووداوێك کە زیان بە گەورەی و پێگە و نفوزی حدکا وەك هێزێکی کاریگەری ڕۆژهەڵاتی کوردستان بگەیەنێت.

کلیلی چارەسەری بابەتە نێو خۆیەکانی حیزبی بە تەنیا لە لای پێک هاتەی سیاسی و ڕێکخراوەی حیزبە و ئەو زەمینەیەش بە خۆشیەوە بۆ چارەسەرکردن بەتەواوی بەدی دەکرێ و هەموو لایەك لەسەر ئەوەی کۆکن کە حیزب هی هەمووانە و دەبێت بە هەمووشیان ئیدارە بکرێت. دەمێکە بەکردەوە حیزبی دێمۆکراتی کوردستانی ئێران ڕایگەیاندوە کە  هی خەڵکی کوردستان و بنەمالەی سەربەرزی شەهیدانە و هەر وەک هەمیشە لە سەرپێوەر و بنەما سیاسی و شۆڕشگێریەکانی خۆی بردەوام دەبێ و بەتەواوی ڕێزلە فرە ڕەهەندی و بیرکردنەوەی جیاواز دەگرێت، کەوە سروشتی پێك هاتەی سیاسی حیزبە.

حیزبی بوون و حیزبیانە بیرکردنەوە و هەڵوێست گرتن٫ لە بەرژەوەندی یەکگرتووی سیاسی و رێکخراوەیدا٫ بێگوومان جەوهەری گەشەکردن و بە هێزبوونی حدکایە و ئاستی وشاری سیاسی و کۆمەڵایەتی پێك هاتەی هاوڕێیانی دێمۆکرات نیشاندەدات.

کاتێک هێزێکی وەك حیزبی دێمۆکڕاتی کوردستانی ئێران دەوری لە ئێستادا بەرچاوتر دەبێت کە بە چاوێکی هەڵسەنگاندنی ڕەخنەگرانەوە٫ تاوتوی ئەو خاڵ و بابەتانە بکات کە گشتگیری تەواو بە خەباتی سیاسی و نەتەوەی بدات لە ڕۆژهەڵاتی کوردستاندا.

گەڕانەوە بۆ بنەما فیکری و ئەخلاقیە سیاسی تەشکیلاتیەکانی ڕێبەری مێژووی هاوچەرخی شۆڕشی نوێی ڕۆژهەڵاتی کوردستان، شەهید دکتۆر قاسملووی ڕێبەرمان زەروورەتێکی گرینگ و مێژوویە بۆ دەربازبوون لە کێشە نێوخۆیەکان.

ڕێنوێنی و ئامۆژگارییە سیاسی و تەشکیلاتیەکان کە ڕەنگدانەوەی هزری دکتۆر قاسملوون، لازمە بۆ جارێکیتریش داڕشتنەوەیان بۆبکرێتەوە و لە پێناوی یەکگرتووی و بەهێزتربوونی حدکادا کاریان پێ بکرێ.

حیزبی دێمۆکڕاتی کوردستانی ئێران لەسەر بنەمایەك دیزاینکراوە کە نەتیجەی ژیری و وشیاری فیکری دکتۆر قاسملوویە و ئەگەر بە وریایی ئەو ڕێڕەوە پەیڕەو نەکرێت، بێگوومان زەوی و ئاسمان لێمان تۆڕە دەبێت و رویان وەردەگێڕن و تەنانە گەلی کوردیش لێمان دەرەنجێت!؟

پێم خۆش نەبوو لە ئێستادا قسەی خێر و شەڕ لەسەر یەکبوونەوە بکەم و نەزەری خۆم بخەمە ڕوو، بەڵام بەشێك لە دۆستان ناچاریان کردم کە زیاتر لەو بارەوە بدوێم و تیشك بخەمە چەند لایەنێك کە ڕاستەو خۆی پەیوەندی نزیکیان بەو مەسەلەوە هەیە۰مەبەستی سەرەکیمان لە خستنەڕووی ئەو دێرە کە باسێکی فراوانی بە دوایخۆیدا هێناو کە تەنیا ئەو دێرەمان وەك ئاماژەکردنێك بە بارودۆخی یەکبوونەوەکردبوو! 

ئەوەی لێرەدا ئاماژەمان پێدابوو ڕاستیەکی ڕوونەو ناکرێت هیچ لایەك خۆیان لەو دێرە بێ بەری بزانن من دەڵێم “یەکگرتووی سیاسی و ڕێکخراوەی حیزبی دێمۆکڕاتی کوردستانی ئێران لەو دۆخە سیاسی و تەشکیلاتیەی بە هۆی هێندێك بارگرژی نێوخۆی تێیکەوتووە، بەلامەوە زۆر لە یەکگرتنەوەیەکی بێ بنەما و کرچ و کاڵ گرنیگترە و بە یەك دوو قسەی خۆش ئەو پرسە جەوهەریە چارەسەر ناکرێت و نیازی بە یەکڕیزی هەیە” .

چوونکی بارودۆخەکە بەجۆرێکی ئەو تۆنیە کە باس لە مەسەلەیەکی جەوهەری ئەو تۆ بکەین.  بێگوومان زۆر بیرکردنەوەی جیاواز هەن و هەر کەس بە گوێرەی سەلیقە و لێکدانەوەی تایبەتی لە هەمبەر ئەو باسەدا ئەدوێ و مافی خۆیەتی هەرچۆنێك لەو باسە بڕوانێ. حیزبی دێمۆکڕاتی کوردستانی ئێران باوەڕی قووڵی بە یەکیەتی  سیاسی و نەتەوەیی و یەکگرتنەوەیەك هەیە کە پێك هاتەی تەشکیلاتی هەر دووك لایەنی دێمۆکڕات لە دۆخێکی شیاودابن و ناکرێ لەکاتی لێك زویربوون و وێك هەڵنەکردندا وەك کارتی فشار پرسی یەکبوونەوە بێتە ئاراوە.

با دوور نەڕۆین کۆنگرەی ١٦ی حدکا بە زۆرینەی ڕەها دەنگی بە یەکبوونەوەدا و پاش کۆتای کۆنگرە و ڕێکسختنەوەی کاروباری ئیداری حیزب، وەڤدی تایبەت بۆ ئەو مەبەستە دیاریکراوە و کارەکەیان ئەنجامەکەی بەکوێ گەیشت، لانیکەم بۆ من ناڕوون بوو!

یەکیەتی سیاسی و نەتەوەی بێگوومان ئارەزووی هەرتاکێکی کوردە و بەهێزبوون و یەکڕێزی هێزە لێکترازاوەکان خزمەت بەو هێڵە نەتەوەیە دەگەیەنێت و ڕێبەری حیزبی دێمۆکراتی کوردستانی ئێران پێش ئەوەی ئەو بارودۆخە بێتەبەرەوە، بۆ ئەو مەبەستەکاریکردووە و دیسانیش هەوڵی خۆیدەدات۰ بەڵام ئەوە بزان و لێی تێ بگەن، ئەوە ڕێبەری ئەو دوو لایەنەن ئەو بابەتەیان بە ئەمڕۆ گەیاندوە و پێك هاتەی تەشکیلاتی هەر دووك لایەنی حیزب دنگی متمانەیان بۆ ئەو مەبەستە بە ڕێبەریان داوە و بەداخەوە ئەوانیش بە سەلیقە و ئاروزوویان کاریان کردوە.

کاتێک دەبینم بەشێك لە دۆستان بەو یەك دێرەی من دەنگیان بەرز دەکەنەوە بەلامەوە سەیرنیە٫ لەبەر ئەوەی ئێرەیان لە گەڵ شوێنی بڕیاری سیاسی و تەشکێلاتی لێکدابێت وپێیان وابێت لە تۆڕەکۆمەڵایەتیەکان ئەو پرسە چارەسەردەکرێت. یەکگرتنەوە چۆن دەکرێ بێتە بەرباس لە کاتێکدا کە دوولایەنی دێمۆکڕات لە دۆخێکی گونجاوی نێوخۆیدا نین و ئەو تەبایە بەدی ناکرێ لە هیچ لایەك و ئەگەر مەسەلەی کوتلە و ناهاوسەنگی ڕێکنەخرێ و هەرلایەك بەدوای بەشی خۆیدا بگرێت، بەدڵنیایەوە یەکبوونەوە دأوارتر دەبێت، هەر وەك کارەکەی بە ئەمڕۆ گەیاندووە!

ئەو مەسەلەیە بەقسەی خۆش و سەلیقەی تاك ناکرێ هیوای لە سەر هەڵ چنین و مەسەلە جەوهەری و میحوەریەکان بەلاوە نێین و بەدوای شتێك بکەوین کە لانیکەم بۆ ئەمڕۆ جێگای باس لەسەرکردن نابێت و  سەرەتا دەبێ دەفیکری یەکكرتووی سیاسی و تەشکیلاتی نێوخۆیدابین و ئەو پرس و مەسەلانەی تایبەتن بە یەکڕیزی کاریان لەسەر بکرێت.

باسێکی ئەو تۆ دەکرێ کاتێک بێتە بەرەوە کە بەر ئەنجامی ڕوانینێکی سالم و پێکەوە هەڵکردن بێ و زەمینەی شیاوی بۆ ڕەخسابێت و ناکۆکیە نێوخۆیەکان لەسەر ئەساسی رێفۆرمی رێکخراوەی چارەسەر کرابن و بە شوحاری حیزب هی هەمووان و هەموومان بۆ خەباتی سیاسی و نەتەوەی کار بکەینهەنگاو بۆ یەکبوونەوە بهاوێژین.

پاشان ئەگەر یەکبوونەوە زەمینەی تەواوی سیاسی و تەشکیلاتی بۆ پێك نەیەت و خاڵە ئەساسیەکان لە سەر بنەمایەکی ڕاست و دروست چارەسەر نەکرێن٫ ئەو یەکگرتنەوەیەش سوودی نابێ و بێگوومان هیچ ئەنجامێکی باشی لێ ناکەوێتەوە و بۆجارێکی تر ئەزموونی شکەست خواردووی یەکگرتنەوە تام دەکرێتەوە، چوونکی کاتێك یەکبوونەوەی پێشوو ڕویدا، ئەو زەمینەیە بە تەواوی لە نێو تەشکیلاتی حیزبدا پێك نەهاتبوو هەر بۆیەش نە تیجەکەمان لە کۆنگرەی ١٣ی حیزبدا بینی.  کەس نیە دژی یەکبوونەوە و بە هێزبوونی نێوماڵی کورد دابیت، بەڵام ئەگەر قەیرانە نیوخۆیەکان بەر لەو هەنگاوە پیرۆزە نەنرێن و بە فرە جەمسەریەوە تەکگرتنەوە بێتە ئاراوە، بە دڵنیایەوە بۆ جارێکی تر بەدژی یەك دەست بەکار دەبینەوە و هەرکەس هەوڵدەدات لایەنی هاوبەش و هاوپەیمانی بە هێز بکات. ئیدی ئەوکات زیانی زۆر گەورەتر بەرپێك هاتەی حیزب دەکەوێت.

ئەو دێرە لە نەزەری هێندێک لە دۆستان بە توند ئاژۆی و دژبەری ئەو پرسە لێکدانەوەی لەسەر کرا و لایەنی قووڵی مەسەلەکە وەك لازم  بەهەستیاریەوە سەیرنەکرا و ئیدی هەر ئەوە نەبێت، دەبێ یەکبگرینەوە. پاش ئاڵۆزیە ڕێکخراوەیەکان و ناتەبای سیاسی و تەشکیلاتی کە بۆ حدکا هاتۆتە گۆڕی ٫  ڕەنگە لەلایەن حدک وە  ئەو جار مەرج و بابەتی ئەو تۆ بێتە ئاراوە و ئاڵۆزیەکان زیاتر چەکەرە بکەن و ڕەنگە ڕێبەری حدک وەک پێشوو بێ مەرج و گەڵاڵەی خۆی نەبێت و وابزانێ حدکا لە قەیران دایە و لەو لایەنەی ناکۆکیەکان سوودی خۆی وەربگرێت.

ڕێز لە بۆ چوونی هەرلایە دەگرم و وەك ئەندامی حدکا لەو بارەوە بە مافی خۆمی دەزانم ڕوانینی جیاواز و بەتەواوی دژم هەبێت و تەنانەت سەبارەت بە پرسی یەکگرتنەوە٫ لانیکەم لە ئێستادا وەك بەشێك لە هاوڕێیانم سەیری مەسەلەکە نەکەم و ئەوەی بەلای منەوە، ئەولەویەتی هەیە یەکڕیزی حیزب، پاشان هێنانە بارباسی پرسی یەکگرتنەوە.

بەخۆشیەوە ئێستا پەیوەندیە سیاسیەکان لە نێوان هێزەکانی ڕۆژهەڵاتی کوردستاندا لەو پەری باشیدایە و بەدڵنیایەوە ئەوەش جۆرێکی باشی یەکیەتی سیاسی و پێکەوەکارکردنە بە دژی حکوومەتی ئاخوندی ئێران.

پاشان بڕیاری یەکبوونەووە لە دوو کۆنگرەدا دراوە و دیتمان چ ئاکامێکی هەبووە و بەکوێ گەیشتووە.  ئەو قسە و دڵ نەوایی تۆڕەکۆمەڵایەتیەکان کە دەکرێن،  باوەڕ بکەن سوودێکی نابێ و تەنیا لێرەدا لە ئاستی زۆر زۆر بەرەوژووردا یەکدی مەحکووم دەکەین و بەتەواوی لە مەسەلە ئەساسی و جەوهەریەکان دوور دەکەوینەوە.

مرۆڤی ژیری سیاسی و نەتەوەی لە خەباتی سیاسیدا نابێ خۆی بکاتە پەیژەی ئامانج و بەرژەوەندی ئەم و ئەو و تەنیا لە تۆرەکۆمەڵایەتیەکان بۆ خۆدرخستن٫ دەسخۆشی بۆ ڕاست و چەك  بنووسێ و هەتا زۆر لە نێوەرۆکی ئەو مەتنەی ژێریان ئیمزاکردووە، ڕەنگە هەستی پێنەکەن کە دژی حیزبەکەی خۆیانە.

باشە بەڕاستی لە ئێوە دەپرسم٫ بە چەند دانە لە لایك و کۆمێنتی سەر دیواری فەیسبووك  یەکگرتنەوە دەکرێ ؟  یان بەهەوڵ و تێکۆشانی تەشکیلاتی و بە ڕێگای کۆنفڕانس و کۆنگرەدا و پاشان ئەوە ڕێبەریە دەبێت بڕیار و ڕاسپاردەی پێك هاتەی خۆی لە بەرچاو بگرێ!!

جا لەوەش جالبتر ئەوەیە کۆنگرەی هەر دوو لایەنی دێمۆکرات ئەو بڕیارەی داوە لەسەر یەکبوونەوە و تا ئێستا دەبوو یەکما گرتبایەوە و پێکەوە لە حیزبێکی یەکگرتوودا کارمان کردبایە، بەڵام بەراستی ئەوەکراوە یان هەرکەس بیر لە بەرژەوەندی تایبەتی خۆ دەکاتەوەو لە کاتێكدا مەسەلە نەتەوەیەکان دەردەکەون کە دەگەینە لوتکەی لێکترازان.

ئێستا لە کوێی ئەو باسەین٫ بۆیە بیرکردنەوەی شیاو و روانینی گونجاو دەتوانێ خزمەت بەو ڕێبازە بگەیەنێت نەوەك قسە و نووکەقەڵەمی ئێرە و جا بە شێکیش بە دوو ڕووی سیاسی و بە مەیلی خۆیان زار دەکەنەوە.

ڕێبەری حیزبی دێمۆکڕاتی کوردستانی ئێران بەر لە هەر شتێك دەبێت دەفیکری یەکڕیزی و پاشان بەیەکەوە و بەیەکگرتووی هەنگاو بەرەو گۆڕانکاری و ڕیفۆرمی نێوخۆی بنێن و کەش و هەوایەکی ئەو تۆ بێتە ئاراوە کە هەموولایەك هەست بە بوون و پێگەی سیاسی و تەشکیلاتی خۆی بکات و غەمی گەورەمان ئەوەبێ ئەو حیزبەی کە وەك هێزێکی گەورە و دیاری مەیدانی خەباتی سیاسی و نەتەوەی بە دژی دەسەڵاتی تاران دەرکەوتووە، بەرەو لاوازی نەبەین.

خەڵکی کوردستان و تێکۆشەرانی ڕێگای ئازادی و ڕزگاری سیاسی و نەتەوەی بەو دۆخەی نێو حدکا ڕازنین وهیوای گشت لایەك و بەتایبەت تەشکیلاتی حیزب تەبای و پێکەوە کارکردنە لە پێناوی ڕزگاری نیشتیمانیدا.

محەممەد سلێمانی

15.05.2020

نویتـرین هەواڵ و بابەت


فارسی