رێی دێموکرات وەک پردی سیڕاتێ وایە!

کۆنفڕانسەکانی تەشکیلاتەکانی حیزب بۆ هەڵبژاردنی نوێنەرانی کۆنگرەی ١٥ی حیزب لە کوردستان و دەرەوە کۆتاییان پێ هاتوە. بەوپێیە کۆنگرەی ١٥ی حیزب نزیک بۆتەوە. لەو پێوەندیەدا سەرکەوتنی  کۆنگرەی ١٥ی حیزب  لە جێبەجێ کردنی ئەرکە نیشتیمانی و نەتەوەییەکانیدا، لە جێبەجێ کردنی کارەکانی دا، بە ئاوات دەخوازم.
 ڕاستە ئێمە هەر چوار ساڵ جارێک کۆنگرە دەگرین، بەڵام بە پێی قاعیدە کۆنگرەی هەر حیزبێکی سیاسی بۆ چوار مەبەست پێکدێ.

 یەکەم ئەوە کە حیزب کۆنگرە وەک مانۆڕ و خۆپێشاندانێکی سیاسی و تەشکیلاتی بۆ نیشاندانی حزووری تەشکیلاتی و سیاسی و جەماوەریی خۆی بەکاردێنێ.
 دووهەم ئەوە کە حیزب کۆنگرەی خۆی وەک ئیستگەیەکی پشودان و بەخۆداچوونەوە،وەک وێستگەیەکی ماتۆڕ تەعمیرکردنەوە، بۆ خۆخڕکردنەوە، خۆسازماندانەوە،خۆتەییارکردنەوە،بەخۆداچونەوەو تین و تاقەت وەرگرتنەوە،  بەکاردێنێ. واتە حیزب لە کۆنگرەدا کارنامەی چەند ساڵی ڕابردووی خۆی دەخاتە بەر زەڕەبینی ویژدانی مونسیفانەی تێکۆشەرانی خۆی و  لایەنە ئەرێنی و بە هێزەکانی کاروتێکۆشانی خۆی دەستنیشاندەکاو سەرلەنوێ پێ لە سەر درێژەپێدانیان دادەگرێتەوە.

 لەلایەکی دیکەش قامک دەخاتە سەر ئەو لایەن و  بابەتانەش کە حیزب کەمتر تێیاندا سەرکەوتوبوە. هۆیەکانی ئەو سەرنەکەوتنەش  دەدۆزێتەوە و دەرمانیان بۆ دەنوسێ.
 ئەو مەسەلانەی مامۆستای زەمان و ڕۆژگار و تەجروبەش دەریخستوە کە ئیدی بۆ ئەوە نابێت حیزب هیچی دیکە ئینێرژیان لەسەردانێ،کۆنگرە دەسنیشانیان دەکا و ئەگەر پێویست بێ، لە جێگای ئەوان ئەڵترناتیوی دیکە دێنێتە کایەوە.

جاری واشە کۆنگرەی حیزب بۆ وەڵام دانەوە بە وەزعێکی تازە پێکدێ.  وەزعێک کە بۆ حیزب هاتۆتە پێش.  بۆ نموونە ئاڵوگۆڕی بەرچاو لە وەزعی سیاسی ناوچەکەدا خەریکە ڕوودەداو حیزب ناچارە خۆی لە گەڵ ئەوئاڵووگۆڕانە رێکخا یا  خۆی بۆ بەپیرچونیانەوە ئامادەبکات.
جاری واشە کۆنگرەی حیزب بۆ ئەوە دەبەسترێ تا گیروگرفتێک چارەسەرکا کە حیزب لەگەڵی دەستەویەخەیە .
  کۆنگرەی ١٥ی  دێموکڕاتەکانی کوردستانی ئێران، دەبێ هەمووی ئەو مەبەستانە بکاتە سەرلەوحەی کاروتێکۆشانی خۆی.

کۆنگرەی ١٥  پێش هەموو شتێک دەبێ مانۆرێکی گەورەی سیاسی و تەشکیلاتی بێت و ببێتە ئاوێنەیەک کە قودرەت و گەورەیی و کاریگەریی حیزب بۆ دونیای دەوروبەوری حیزب دەرخا. حزووری سەنگین و بەهێزی حیزب لە مەیدانی خەباتدا  جارێکیدیکەش بە کۆمەڵانی خەڵکی کوردستان و دۆستان و دڵسۆزانی حیزب و تەنانەت ناحەزان و دوژمنانی حیزبیش نیشانبدات.
لەلایەکی دیکەش کۆنگرە دەبێ هەموو لایەنەکانی کارنامەی تێکۆشانی حیزب لەو چوارساڵەی ڕابردوودا بخاتە بەرباس و  بە وردی و بە ئینسافەوە هەڵیان سەنگێنی.

لە پێشدا پێویستە  کۆنگرەکەمان نوختە بە هێز و درەوشاوەکانی کارنامەی تێکۆشانی حیزب ببینێ و لە پێوەندی دەگەڵ ئەواندا ئافەرین بە رێبەری بڵی و گوڵی شانازی  و ئیفتیخار بداتە حیزب و تێکۆشەرانی حیزب و لەسەر درێژەپێدانی سیاسەت و هەڵوێستە ئوسوڵیە سەرکەوتوەکان پێداگرێتەوە.
  بەڵام هەر ئەوە بەتەنیا بەسنیە. دەبێ ئازایەنەش، دلێرانەش، کەمووکوڕی و  گیروگرفت و نەقسەکانیش دەست نیشانکا و دەرمان و رێگاچارەیان بۆ بدۆزێتەوە.
لەو بارەوە چەند نوختە گرنگن کە دەبێ لە بیریان نەکەین.

 یەکەم ئەوە کە لە حیزبی دێموکراتدا هیچ مەنتیقەیەکی موحەڕڕەمەمان نیە. واتە هیچ جێگاو ئۆرگان و شوێنێک نیە کە بۆمان نەبێت باسی بکەین. جاران لە کوردستان  هەندێ جێگا  پێیان دەوترا مەنتیقەی موحەڕڕەمە. ئەو ناوچانە کەس حەقی نەبوو پێ یاندا  بڕوات.  کۆنگرە گەورەترین ئۆرگانی حیزبە و سەڵاحیەتدارترین شوێنی حیزبە بۆ  هێنانە گۆڕێ باس و مەسەلە حیزبی و تەشکیلاتیەکان. لە نۆروێژ ئیدارەی پارێزگاری لە منداڵ واتە باڕەنە ڤێرنەیان هەیە کە خەڵک دەبێ دەگەڵی زۆر میهرەبان بن و هەرچی بیکات لێی قبووڵی بکەن.

لە هیندوستان گای موقەدەسیان هەن کە کەس ئیجازەی نیە لە گوڵێ کاڵتریان پێ بڵێ و سەردار و موختارن.  حیزبی دێموکڕاتی کوردستانی ئێران  حیزبێکی جەماوەری و خەباتگێرە. هەموو بەش و ئۆرگانەکانی لە حاڵی کاروخەبات و بەربەرەکانی دان. بەو پێیە لە مەیدانی خەباتدا کەمووکوڕیان  بۆ دێنە پێشێ، توشی هەڵە دەبن، دەسوێن، ماندوو دەبن.  یا تێپەڕینی زەمان  و سەختیەکانی مەیدانی خەبات دەری دەخەن کە ئەم یا ئەومیتۆدەی کار و سیاسەتمان درووستنەبووە و دەبێ بیگۆڕین.

بۆیە لە حیزبی دێموكراتدا نە مەنتیقەی موحەرەمەمان هەیە، نە نۆرویژین تا باڕنە ڤێرنەمان هەبێ و پێویست بێ دەگەڵی میهرەبان بین. نە هیندوستانیشین تا گای موقەدەسمان هەبن و نەتوانین لە گوڵ کاڵتریان پێ بڵێین و بیانکەینە سەردار و موختار. حەقمانە سەرتاسەری ئەو حیزبە لە سەرێ هاتاخوارێ، لە دەرەوە و ژوورەوە بدەینە بەر زەڕەبینی باس و ڕەخنە و لە هەرکوێ پێویست بێ و تەشخیسماندا، دەبێ بیدەینە بەر نەشتەرگەری و چەقۆ یا تیشکی لیزەری عەمەلی جەراحی.

خاڵێکی دیکە کە پێویستە لە کاتی هەڵسەنگاندنی سیاسەت و هەلوێست و ئۆرگان و کەسایەتی و کادر و تێکۆشەرانی حیزبدا لەبەرچاوی بگرین،  ئەوەیە کە لە قەزاوەت و هەڵسەنگاندندا ئینساف و عەداڵەت و واقعبینی و ئەخلاق و ویژدانی حیزبی و خەباتگیرانە بەکاربێنین.  ئەوەش بەوە دەکرێ کەلەلایەک هەر کەس و سیاسەت و هەلوێست و ئۆرگان و کەسایەتیەکی حیزبی لەو کۆنتێکستەدا هەڵسەنگێنین کە کارو خەباتی تێدادەکا. واتە ئەو وەزعە کە ئەوی تێدایە.

فاکتۆری زەمان و مەکان و ئەو مەوقعیەتە کە تێیداین، ڕەنگی خۆیان لە ڕووداوەکان دەدەن و کەس ناتوانێ لە دەرەوەی  زەمان و مەکان بێت. هەر زەمان و مەکانێکیش ئەگەر دەرفەت و شانس و ئیمکانی تایبەتیت دەخەنە بەردەست،  لە لایەکی دیکەشەوە مەحدوودیەت و کەندوکۆسپ و  دەردەسەری و فاکتۆری نالەباریشت دەدەنێ کە وەک نەیاری تۆ کاردەکەن.
مەسەلەیەکی دیکەش گرنگە. ئەویش ئەوەیە کە هەرکەسایەتی و تێکۆشەر و ئورگانێکی حیزبی دەبێ بە گوێرەی ئەو ئەرکانە هەڵسەنگێنرێن کە لەسەر شانی بوون.

پێوانە بۆ هەڵسەنگاندن دەبێ ئەرکەدیاری کراوەکان و ئەو ئامانجانەبن  کە لەو بڕگە زەمانیەدا کارمان بۆکردوون. چ ئەرکێکت بەمن سپاردوە؟ بۆ جێبەجێ کردنی ئەو ئەرکە چەندەت سەرمایەو و سەرچاوەی وەک هێزی مادی و ئینسانی و وەخت و  ئیمکاناتی دیکە لە ئیختیارناوم. خۆ تۆ ناتوانی  بەوە تاوانبارم کەی کە فڵان یا فیسارە کارەم نەکردوە، لەوەختێکدا ئەوکارە  بە هەزار دەلیل لە توانای من دانیە هیچ، بەڵکوو هەر ئیمکانی نیە لەو هەل و مەرجەدا جێ بە جێ بێ.

لە لایەکی دیکەشەوە هەڵسەنگاندن دەبێ بۆ چوونە پێش بێ. من  قوتابیەکانم بە گوێرەی ئەو دەرسانە هەڵدەسەنگێنم کە پێم گووتوون و پێم سپاردوون حازریان کەن. بۆیەش هەڵیان دەسەنگێنم تا ڕێگای چوونە پێش و هەڵدان و گەشەکردنیان بخەمە بەرپێ نەک بە پێچەوانەوە. مەبەست لە هەڵسەنگاندنی ئۆرگان و تێکۆشەرانی حیزب و کارنامە و کاروکردەوەکانیشیان لەوە زیاتر نیە. مەبەست لە هەڵسەنگاندنەوەی حیزب و کارنامەی حیزب بەگشتی و هی ئۆرگان و تێکۆشەرانی حیزب  لە کۆنگرەدا ئەوەیە کە حیزبەکەمان و تێکۆشەرانی حیزبەکەمان بە رێگای پڕ لە شانازی خەباتدا دیسانیش هەربەرینە پێش.

 مەبەست ئەوەیە قەت لە خۆمان غافڵ نەبین و قەتیش لە خۆمان ڕازی نەبین.

خاڵێکی دیکەش کە  لەوبارەوە دەبێ باسبکرێ، ئەوەیە کە لە کاتی باس کردن لە سەر مەسەلە جۆراوجۆرەکاندا پێویستە ڕیتۆریکی مۆدێڕن بەکاربەرین و ئەدەبی سیاسی لە خۆمان نیشاندەین. یانی بە زمانی سیاسەت و دیپلۆماسی  بدوێین.  کۆمپێۆتێر زمان و تێرمینۆلۆژی تایبەت بەخۆی هەیە. ئەدەبیات و سینەما و توجارەت و  بانکداری و پێداگۆگی و ساختمان سازی و فەلسەفە هتد… هەموویان زمانی خۆیان هەیە. 

حیزبایەتی و سیاسەت و خەباتیش تێرمینۆلۆژی و رێتۆرێکی تایبەت بەخۆیان هەیە و کۆنگرەی حیزب کە بەرزترین ئۆرگانی حیزبە دەبێ لەو زمانە کەڵک وەرگرێ کە لە هەموو دونیا سیاسەت و دیپلۆماسی پێدەکرێ.  ئەدەبیاتی چاڵەمەیدانی لە لایەک و ڕێتۆریکی مەدح و سەنا و پێهەڵاگوتن و یان  جوێن و تەوهین و تەحقیر و سوکایەتی پێککردن لە لایەکی دیکەوە، لە کۆنگرەی ١٥ی حیزبی ئێمە ناوەشێنەوە.
وەک لەسەرێ باسمان کرد هەندێک جار حیزب کۆنگرە بۆ ئەوە دەگرێ تا خۆی بۆ ڕووبەڕووبوونەوە لە گەڵ وەزعێکی تازە تەییار و ئامادەبکات. ئیستا ناوچەی ڕۆژهەڵاتی نێوەڕاست لە بەردەم وەزعێکی تازەدایە. بەهاری ناوچە دەستی پێکردوە و جارێ هیشتاش هەر لە سەرەتاکانی خۆیدایە. ئەو ئاڵوگۆڕانە دەگەنە ئێران و کوردستانی ئێرانیش. حیزبی ئێمە وەک پاڕامیترێکی جدی لەسەر وەزعی سیاسی ئێران و کوردستان، ئەکتەرێکی گەورە و کاریگەرە.

بە جێیە و پێویستیشە حیزب لەو کۆنگرەیەدا هەموو ئەو ئیحتیمالانەی کە ئەگەری هاتنەپێشیان هەیە بخاتە بەرباس و خۆی و جوڵانەوەی کوردستانیان بۆ ڕووبەرووبوونەوە لە گەڵیان ئامادەبکات.   بێ گوومان ئەوە لایەنێکی گرنگی کاری کۆنگرەکەمان دەبێ. لەو بارەوە حیزبی دێموکڕات دەبێ هەندێک سیاسەت و بەرنامەی تایبەت داڕێژێ کە شیاوی مەوقعیەتی حیزب بن و حیزب وا تەییارکەن کە بتوانێ لەو دەورە پڕ لە کارەساتەدا کە ئەوەتا لە پێشمان دایە و هەرڕاست پاش کۆنگرە دەست پێدەکا،ڕۆڵی پێشڕەوی خۆی بگێڕێ.

 یەکجاری دیکەش ئەوە دەڵێمەوە. چەڕخی بیستەممان لەدەست دا. قەرنی بیست و یەکەم نابێ لە دەستبدەین. دیسان ئێران و ناوچە لە بەردەم گەردەلوولی گەورەی ئاڵووگۆری سیاسی دان. ئەوجار کورد دەبێ بەشی خۆی لەو کیکە، کە بەدەستەوەگرتنی مافی دیاریکردنی چارەنوسی خۆیەتی هەم لە ئاستی ناوچەکەدا و هەم لە ئاستی ئێراندا،  وەدەست بێنی. بۆیە پێویستە کۆنگرەکەمان جارێکی دیکە لەو  وەزعە تازەدا، حیزب و ڕۆڵی حیزب پێناسەکاتەوە، سیاسەتە ئیئتلافیەکانی حیزب هەڵسەنگێنێتەوە.

دۆستان و دوژمنانی میللەتی کورد لەو قۆناخەدا بخاتەوە بەر زەڕەبین و توانا و ئیمکاناتەکانیان سەرلەنوێ هەڵسەنگێنێتەوە. ڕێبازی سیاسی و ستراتیژیکی حیزب داڕێژێتەوە و حیزب بۆ بەپیروەچونی ڕووداوەکان تەییاربکات.  ڕێبەریەک هەڵبژێرێ کە بتوانێ  زەرادخانە وڕیئاکتۆرەکانی ئینێرژیبەخشی نێو تەشکیلاتی خۆی و بزووتنەوە دەکاربکا و قودرەتێکیش بە  حیزب بدا  کە ببێتە سیاسەتساز و ڕووداوخوڵقێن و دەستپێشخەر و ئیبتیکاربەدەستی نێو مەیدانی سیاسەتی کوردی لە کوردستانی ئێران.
مەبەستێکی دیکە کە وەک وتمان لە مەبەستەکانی بەرێوەبردنی کۆنگرە بۆ حیزب ئەوەیە کە تێکۆشێ گیروگرفتێک چارەسەرکات کە بۆ حیزب هاتۆتەپێش یا لە سەر رێگای تێکۆشانی حیزب کەندوکۆسپی سازکردوون.
لە کەس شاراوەنیە کە حیزبی ئێمە لەگەڵ گیروگرفتێکی لەو چەشنە بەرەوڕوویە. چەندساڵ لەمەوبەر  بەشێک لە تێکۆشەرانی حیزب ریزی خۆیان لە تەشکیلاتی حیزب جیاکردوە. دەپێشدا دەبێت ئەوە بلێین کە هەورەبروسکە لە ئاسمانی ساودا ڕوونادا. ئێستا هەموومان و تەنانەت ئەو دۆستانەش تێگەیوین کە دەکرا ئەو کارەساتە ڕوونەدا. هەموومان گەیشتووینەتە ئەو قەناعەتە کە ئەو کردوەیە زیانی زۆری بە حیزب و بزووتنەوەی میللەتەکان گەیاندوە. هەمووشمان تێگەیوین کە هەرکاممان لە هاتنەگۆڕی ئەو وەزعەدا کەم و زۆر سەهممان هەبووە.

ئێستا لەوەش تێگەیوین کە درێژەدان بەو وەزعە بەو جۆرە نەک  هەر ئیمکانی نیە، تەنانەت زەرەرێکی گەورە لە حیزب و وەحدەتی تەشکیلاتی حیزب  لە دڕیژخایەندا دەدا و بزووتنەوەش لە گەڵ مەترسی جۆراوجۆر بەرەوروودەکات. تواناو ئینێرژیەکی زۆرمان  بە خونساکردنەوەی یەکتر لە بەردەبا.  کۆمەڵانی خەڵکیش لە گەڵ نائومێدی بەرەوڕودەکا.  وەختی هاتوە ئەو مەسەلە چارەسەرکرێ. هەم کۆمەڵانی خەڵکی کوردستان داوای حەرەکەتێکی لەو جۆرە لە حیزب  دەکەن و  هەم ئێستا بۆتە زەروورەتیش و بە بێ ئەوکارە و بەبێ هەنگاو هەڵێنانەوە لەو ڕێگایەدا کارمان لەنگدەبێ.

لە خۆڕانیە بەرێزو تێکۆشەر کاک مستەفای هیجری سکرتێری گشتی حیزب لە دواوتوێژ لە گەل رووداودا ، لەو بارەوە دەڵێ چارەسەرنەکردنی ئەو مەسەلەیە و هێشتنەوەی لەوەزیاتری زیانی گەورە و قەرەبوونەکراوەی بە دواوەدەبێ. کەواتە کۆنگرەی ١٥ی حیزب دەبێ بزماری ئاخر لە تابووتی ئەو دووبەرەکیە نەخوازراو و داسەپاوە بە سەر حیزب و تەشکیلاتی حیزبدا بدا. کۆنگرە پێویستە ڕێوشوێن  و ڕێگاچارەکانی چارەسەری ئەو ناکۆکیە بدۆزێتەوە و بیان کاتە سیاسەتی عەمەلی و ڕێبەری داهاتووی حیزب موتەعەهد و مولتەزیم بکا تا هەرچی زووتر  ئەو کۆسپە لە سەر رێگای تێکۆشانی حیزب دا لابا.
وەزعی ناوچەکە و ئیزۆلە بوونی کۆماری ئیسلامی لە ئاستی دونیاداو  ‌هەڵکردنی شنەبای ئازادی و دێموکڕاتیزاسیۆن لە ناوچەکەدا، ئەوە لە حیزبی ئێمە دەخوازن کە بۆ شوێندانان لە سەر ڕووداوەکان خۆی تەییاربکات. هەوەڵێن کاریش لەو ڕێگایەدا ئەوەیە کە وەحدەتی تەشکیلاتی بۆ حیزبەکەمان بگێرێنەوە تا حیزب بتوانێ ئەرکەکانی بەرێوەبەرێ.

بالەوەش نەترسین کێ جێگای کێ دەگرێتەوە. خەبات و حیزب و بزووتنەوە پێویستیان بە هەموومان و سەدان و هەزاران و دەیان هەزار تێکۆشەری دیکە هەیە. ڕاستیەکەی ئەوەیە نەک هەر زۆرنین ، زۆریش کەمین و دەبێ بەسەدان و دەیان هەزار کەسی دیکەش لە ڕیزی ئەو حیزب و خەباتەدا سازماندەین و مۆبیلیزە بکەین.  حیزبی دێموکڕات جێگای خەبات و تێکۆشان و مایەلەخۆدانان و فیداکاری و گیانبازیە.

هەرکەس بتوانێ و کوڕی مەیدانی خەبات بێ و مایە لە سەروماڵ و گیان و ووجودی خۆی دانێ و لە گەڵ خەبات بڕواتەپێش جێگای شیاوی خۆی هەیە و لە تەشکیلاتدا جێگای شیاوی خۆی دەکاتەوە. لە حیزبی ئێمەدا  قائیدە ئەوەنیە کەس جێگای کەس بگرێتەوە. لە حیزبی مەدا قاعیدە وایە کە هەرکەس جێگای خۆی دەکاتەوە.  ئێستا و داهاتووش هەروادەبێت.
کەواتە  یەکێک لە گرنگ ترین ئەرکەکانی کۆنگرەی ١٥  ی حیزب بە گوێرەی ڕاسپاردەکانی کۆنفڕانسەکانی نێو تەشکیلاتیش چارەسەرکردنی یەکجاری ئەو مەسەلەدەبێت.

ئێمە دێموکڕاتەکانی کوردستانی ئێران لە کاتێکدا کۆنگرەی ١٥ی خۆمان دەگرین کە حیزبەکەمان خەریکە پێدەنێتە حەوتەمین دەهەی تەمەنی خۆی. ئەو تاریخە دوورودرێژە، کە پڕاوپڕە لە قوربانی دان و ڕەنج و فیداکاری و مایەلەخۆدانان و گیانبازی و ڕەنج و تراژیدی، لەلایەک شانازی و ڕووسووری زۆری داوە پێمان و لە لایەکی دیکەش  حیزبەکەمان و خۆمانی  پوختەکردوە و بە پلەی کەمالی گەیاندووین. مەولەوی دەڵێ ڕەنج و تڕاژیدی مرۆڤ بە پوختەیی و کەماڵ دەگەیەنن. ئەوە ئیحساسی غروورێکی بەجێمان تێدا پێکدێنی.

بەڵام لەلایەکی دیکەشەوە  ئەرک و مەسئولیتەتێکی گرانمان دەخاتە سەرشان. ئاخر پوختەگی و بە کەماڵ گەیشتن، بەرپرسایەتیش دەگەڵ خۆی دێنێ. هەر بۆیە دەبێ لە ئاستی ئەو بەرپرسایەتیە دابین کە مێژوو خستوویەتیەتە سەرشانمان و وەڵامدەری چاوڕوانیەکانی میللەت لە خۆمان و کۆنگرەکەمان بین.
حیزبی دێموکڕات بە پێی ئەو نەخش و رۆڵە گەورە کە لە بزووتنەوەدا هەیبووە و هەیەتی، خەڵکی کوردستان لە هەرهێزێکی سیاسی دیکەی کوردستانی زۆرتر هیواو هومێدی خۆیان پێ بەستووە. ئەو حیزبە بۆتە موڵکی خەڵکی کوردستان و تەجەسومی ئاوات و ئامانجەکانی میللەتی کورد. هەربۆیەشە ‌هێندە جێگای ئیعتیبار و متمانەیە لە نێو میللەتی کورد و بزووتنەوەی ڕزگاریخوازی گەلانی دیکەی ناوچەکەدا.

ئەرکی ئێمە تێکۆشەرانی حیزب و بەتایبەتی ئەندامانی کۆنگرەی ١٥ی حیزب ئەوەیە ئەو ئیعتیبارەی حیزب بپارێزین و بە رێگایەکدا هەنگاوهەڵگرین کە حیزبەکەمان هەروا جێگای متمانەو هیواوهومێدی خەڵکی کوردستان بمێنیتەوە.
ئەو ئیعتیبار و جێگای ئومێدبوونە هەروا ئاسان پێکنەهاتووە. نزیکەی حەفتا ساڵ خەبات و قوربانی دان و فیداکاری لە پشتە. دەریایەک خوێن و ئارەق و فرمێسکی لە پشتە. بۆیە زۆر گرنگە ئێمە خۆمان هەڵکێشینە ئاستی ئەو ئیعتیبارە گەورەی حیزبەکەمان و نیشاندەین کە میراتگری بە حەقی ئەو هەموو خوێن و فرمێسکەین.
گەورەترین سەرمایە بۆ هەرهێزێکی سیاسی ئەوەیە کە لە نێو میللەتی خۆیدا جێگای متمانە بێت. هەموو ئەو گیروگرفتە گەورەی ئەمڕۆ ناوچەی ئۆڕۆ بەدەستیەوە دەناڵێنی، ئەو قەیرانەی یۆنان و ئیسپانیاو ئیتالیاو پورتوگاڵی گرتۆتەوە، یا ئەو قەیرانە ئابووریەی کە چەندساڵ لەمەوبەر ڕۆژئاوای گرتەوە، لەوەڕا سەرچاوەدەگرن  کە خەڵک متمانەیان بە  سیستەمەکە کزبوە یا نەماوە.

دووساڵ لەمەوبەر لە کلاسێکدا لە کۆمۆنی ئوسلۆ دەرسی تاریخ و جوگرافیاو سیستەمی سیاسی و ڕەفاهی نۆروێژم بەو پەنابەرە گەورە ساڵانە دەوتەوە کە وەرگیرابوون و دەبوایە بە پێێ قانوون پەنجا سەعات بەزمانی خۆیان زانیاریان لەسەر لایەنەجۆراوجۆرەکانی سیستەمی سیاسی و کۆمەڵایەتی نۆروێژ بدرێتێ. ڕۆژێک دەبوایە هەموو کلاسەکەم بەرمە موزەخانەی دەریایی نۆروێژ  لە بیگدۆی بۆ ئاشنابوونیان لە گەڵ مێژووی نۆروێژ و تواناکانی میللەتی نۆروێژ لە بواری دەریاوانیدا. 

هەموو شاگردەکانم ئەفغانی بوون و ٤٥ کەس بووون. لە مەدرەسە وەدەرکەوتین و دەبوایە سواری بووس بین بۆ گەیشتنە موزەخانەکە. لەو نێوەدا دەبوایە لە هەندێک جادە بپەرینەوە. بۆ پەرینەوە شوێنی تایبەتی هەیەو بە خەتی خۆی دەستنیشانکراوە و لە هەموو دونیاش تاڕادەیەکی زۆر وەک یەکە. کەچی لەکاتی پەڕینەوەکەدا دیتم بەشێکی زۆر لەو شاگردانەی من ناتوانن بپەڕنەوە و بۆیان زەحمەتە بە خەتە سپیەکاندا بپەڕنەوە. یانی نەیان دەوێرا و پێیان وانەبوو ماشینەکانی نێو تڕافیک ڕیگای پەرینەوەیان دەدەنێ.

بە ناچاری وەک پۆلیسی هاتووچۆ دەبوایە ڕاوەستابام تا هەموویان دەپەڕینەوە.  دواتر ئەو مەسەلە بوو بە یەكێک لە بابەتەکانی دەرسی ڕۆژی دوایی. لە ئەفغانستان و بە گشتی لە ڕۆژهەڵاتی نێوەڕا ست و وڵاتانی دونیای سێهەمدا، ئەو خەتە سپیانە کە بۆ پەڕینەوەی ڕێبوار دیاری کراون، خاوەن ماشێنەکان لە کردەوەدا وەبەرچاویان ناگرن و هەربۆیە مانایەکیا نیەو  خەڵک و رێبوارانیش متمانە بەو خەتانە ناکەن. بەڵام لە نۆروێژ ئەو خەتانە مانای قانوونی و ئەخلاقی و  سیاسی و کۆمەڵایەتیان هەیە.

منداڵان لە باخچەی ساوایانەوەو لە مەدرەسەوە فێردەکرێن کە ئەو تابڵۆ و رێوشوێنانە گرنگ و پڕبایەخن و دەبێ وەبەرچاوبگیرێن. هەربۆیە کاتێک وەختی پەڕینەوە و نۆرەی پەڕینەوەیان دێ، لەسەرەخۆو بێ سترێس دەپەڕنەوە و کاریشیان بەوەنیە کە چەندەماشێن لە تڕەفیکدا ڕاوەستاون. ئەوانە حەقی سروشتی خۆیان کەڵک وەردەگرن و متمانەی تەواویشیان  بە سیستەمەکە و بە شۆفیرەکان هەیە کە موڕاعاتیان دەکەن. بەڵام لە ئەفغانستان وانیە. بۆیە خەڵکەکەش متمانە بە سیستەمەکە ناکەن.  کەواتە متمانە زۆر زۆر گرنگە و سەرمایەیەکی زۆر گەورەیە.

بەوجۆرە ئەومتمانە گەورەی خەڵک بە حیزبی ئێمەی دەکەن گەورەترین سەرمایەی حیزبەو دەبێ نەک هەربیپارێزین، بەڵکوو دەبێ پێوەشیەوە  زیاد کەین. لەبیرمان نەچێ کە لەو حەفتاساڵەدا بەدەیان هەزار کەس لە تێکۆشەرانی حیزب گیانی خۆیان کردۆتە هەزینەی پێکەوەنانی ئەو سەرمایە گەورە کە ئەمڕۆ لە شکڵی متمانەی خەڵک بە حیزبەکەماندا خۆی دەنوینێ.

بەو متمانە گەورە کەخەڵک بە حیزبی ئێمەی هەیە، حیزب دەتوانێ ڕێگاو بەرنامەو سیاسەتێک بخاتە پێش پێی بزوتنەوەی میللی دێموکڕاتی کوردستانی ئێران، کە سەرکەوتنی بەدوادابێت. یانی لەو کۆنگرەدا حیزب دەبێ  کۆمەڵە سیاسەتێک بگرێتەبەر کە هەموو هێزو کەسایەتیەکانی  نێو بزووتنەوە وا کاناڵیزەبکا کە نەک هەر هێزی یەکتر بە هەدەر نەدەن، بەڵکو یەکتر مۆبیلیزەش بکەن.

ئەو ئەرک و تەکلیفە کە مێژووی حیزبی دێموکڕات و حەفتاساڵ خەبات و تێکۆشانی بەردەوام و ئەو مەوقعیەتە کە حیزب هەیەتی، خستوویەتیە سەشانی حیزب و تێکۆشەرانی حیزب و ڕێبەرایەتی حیزب، بە هیچ جۆر سادە و ئاسان و سووک نیە. قورسایی و سەنگینی ئەو تاریخە دورودرێژ و پڕ لە شانازی و فیداکاریە و ئەو چاوەڕوانیانانە ی خەڵک لە ڕێبەرایەتی حیزبی ئێمەیان هەیە، ئازادیی ڕەفتار لە حیزب و ڕێبەرایەتی حیزب دەستێنێ.

یانی ئەو بەرپرسایەتیەی لە سەر شانی حیزب و ڕێبەرایەتیەکەیەتی، لە  قورسایی تاریخی ناشادی حیزبیش بەسەر شانی حیزبەوە قورسترە. تێپەرێن بەو رێگایەدا وەک پەرینەوە بە سەرپردی سیڕاتێدایە کە دەڵێن لە ئەڵماسی تیژترو لە موش باریکترە. ڕێگای دێموکڕاتیش ئاوایە. پرە لە شانازی بەڵام پڕخەتەر و کارەساتیشە.

با تێکۆشین کۆنگرەی پازدە بە جۆرێک حیزب بازسازیکاتەوە، بەجۆرێک حیزب سازمانداتەوە، بە جۆرێک حیزب تەییارکاتەوە، بە جۆرێک حیزب ڕێکخاتەوە، کە توانای بەرێوەبردنی ئەو ئەرکانەی هەبێت کە مێژوو خستوونیەتە سەرشانی.   با تێکۆشین کۆنگرەی ١٥ی حیزب بە جۆرێک حیزب تەییاربکات کە بتوانێ هەم توانای ڕەقابەتی لە مەیدانەکەدا هەبێت و هەم توانای هاوکاریش لە گەڵ هێزەسیاسیەکانی دیکەی نێو گۆرەپانەکە .

ئەگەر حیزب بتوانێ بە رێگای خێری گشتیدا توانای موساڵەحەو و هاوڕایی لە خۆیدا پەروەردەبکا، ئەگەر حیزبی ئێمە بتوانێ لەو کارەدا سەرکەوتووبێت، ئەوە ئەو هەموو سەرمایە ئ
 ینسانی و مادی و مەعنەویەی میللەت لەو حەفتاساڵەدا لە حیزبیدا هەزینەکردوە، خێری داوەتەوە.
 بۆیە پێویستە حیزبەکەمان لەگەڵ پێداویستیەکانی سەردەم و زەروورەتەکانی سەررێگای خەبات هاو ئاهەنگ کەین. ئەوانەی ماڵیان ئۆپپوسینگ واتە سپی و رەنگ دەکەنەوە ،دەزانن کە کاتێک ئینسان ژووری نوستن و ئاشپەزخانە ڕەنگدەکاتەوە، زوو تێدەگا کە پێویستە هاڵی دانیشتنەکەش ڕەنگ کاتەوە، دەنا زۆر ناحەز دەنوێنێ. کاتێک هەموو ژوورەکانیشی ڕەنگ کردنەوە تێدەگا کە پێویستە مۆبڵەکانیش بگۆڕی یا شێوەی دانانیان بگۆڕێ.
ئێمە هەروەک ڕابردوو دەبێت حیزبی هەرەگەورە و پڕ قودڕەتی کوردستانی ئێران بین. ئەو گەورەیی و قودرەتەی ئێمە لەوەڕا دێ کە لەو سەردەمە تازەشدا، بتوانین دڵ و بیری خەڵکی کوردستان  فەتح کەینەوە. زۆربەی هەرە زۆری خەڵکی کوردستان ئێستا لاون و  تەوەقوعاتی نوێ یان لە حیزبی ئێمە هەیە و نایانەوێت سیاسەتە دیمۆدەبوەکانی ڕابردویان بۆ بەستەبەندی کەینەوە و پێ یان بفرۆشینەوە. ئەوان شتی تازەیان لە حیزبی خۆیان دەوێت. نوێبوونەوەی هەموو لایەنە.

نوێبوونەوە لە تەشکیلاتدا، لە ڕاگەیاندندا، لەڕیتۆریکدا، لە دیپلۆماسی دا ،لەمیتۆدو شێوەکانی خەباتدا، لە کاری حیزبی و حیزبایەتیدا، لە ڕەقابەت و موخالەفەت و هاوڕایی و موساڵەحەدا، تەنانەت لە شەر و ململانێ و بەربەرکانی و زۆرانبازی سیاسیشدا.  بە کورتی نوێبوونەوە لە فەرهەنگ و کولتوری حیزبایەتیدا.

 ئەگەر بتوانین لەو کۆنگرەیەدا بەوڕیگایەدا هەنگاو هەڵگرین، ئەوە شوێنی حیزبی خۆمانمان لە نێو کۆمەڵگای کوردستانی ئێراندا جارێکی دیکەش لەو سەردەمە تازەدا تەسبیت و قایم کردۆتەوە.   حیزبی  دێموکرات هەم دەبێت میللی و جەماوەری وەمێنی  و هەم دەبێت   حیزبێکی خەباتگێرێش بێت. بۆ خەبات گێڕبوون دیسپلین و سترەکتور و  چوارچێوە   و ئینزبات پێویستە.

نابێت وەحدەتی حیزب و دیسپلینی حیزبی بکەینە قوربانی جەماوەری بوونی حیزب. نابێ  میللی بوونی حیزب و جەماوەری بوونی حیزبیش بکەینە قوربانی ئینزباتی حیزبی. ڕاگرتنی ئەو باڵانسەیە کە حیزبی دێموکڕات، دێموکرات و جەماوەی و میللی وخەباتگێر دێڵێتەوە.  لە خۆڕانیە دەڵێن رێی دێموکرات وەک پردی سیڕاتێ وایە.

٠٦.٠٩.٢٠١٢

{jcomments off}