هەڕەشەی هێزی سەربازی پەکەکە لە خەڵکی رۆژهەڵات چ ئاکامێکی هەیە؟ گولالە کەمانگەر

 

دواهەمین بەیانیەی ئەم لقەی پەکەکە هەڕەشەنامەیەکە کە هێزی سەربازی ئەو لقە (HRK) بەرانبەر بە هێزەکانی رۆژهەڵات و ئەندامان و لایەنگرانیان و چالاکانی مەدەنی و بە گشتی خەڵکی رۆژهەڵاتی کوردستان بڵاوی کردوەتەوە و یەکێک لە ئامانجە کانیشی سەرکوتی رەخنەگران و هەموو موخالیفەکانی خۆی بە تایبەت لە دنیای مەجازیدایە. هەڕەشەی هێزێکی سەربازی لە چالاکانی مەدەنی و سیاسی و خاوەن قەڵەمان لە خۆیدا کردەوەیەکی بەتەواوی دژە مرۆیی و مەحکوم کراوە، کە هیچ پاساوێک هەڵناگرێت و تەنیا مانای لەناوبردنی فیزیکی ئەو کەسانەیە کە بە هەر هۆکارێک نایانهەوێت لە گەڵ پەکەکە بن، یان رەخنەی لێدەگرن. ئەوەی کە بڕیاردەرانی پەکەکە بە چ مەبەستێک ئیزن بە هێزێکی سەربازی دەدەن کە لێدوانی لەم چەشنە بدات خۆی شتێکی دیکەیە و مەجالی دیکەی دەوێت بۆ دەرخستنی ئامانجەکانی ئەم کردەوەیە، بەڵام ئەوەی لێرەدا دەیخەمە بەرباس خودی ئەم هەڕەشەنامەیەیە.
 

پێش لە هەموو شێتک دەرۆمە سەر زمانی یەکجار سەقەتی ئەم هەڕەشەنامە کە بە ئاشکرا دیارە نووسەرەکەی تازە فێری کوردی بووە و بەداخەوە باشیش فێر نەبوە! تەنانەت یەک رستەی ئەم دەقە نیە کە هەڵەی گەورەی زمانی تێدا نەبێت و هەر ئەوەش زۆر ناروون و تەماویی کردووە. هیوادار بووم دوای ئەو هەڵە زۆرانەی کە لە بەیاننامەکەی عاشورایاندا بوو نەختێک بە وردبینی زیاترەوە بنووسن، بەڵام بەداخەوە یان کەسیتر لەم گرووپەدا نیە کە خوێندەواری تەواوی هەبێت یان ئەگەر هەیانە مافی نووسینی پێنادەن کە هەردووکی بۆ پەکەکە کە خۆی بە خاوەنی هەموو کوردستان دەزانێ هیچ جوان نیە.

هەڵەکان هێندێ جار ئەوەندە سەیر و سەمەرن کە خوێنەر دەبێ بیر بکاتەوە بزانێ نووسەر ویستوویە چ وشەیەک دابنێ و نەیتوانیوە، لە سەرەتا تا کۆتایی ئەم هەڕەشەنامەیەدا بەردەوام لە گەڵ دەستەواژەی “هەوڵدان بۆ رەش کردنی پارتییەکەمان” بەرەوڕوو دەبین، لێرەدا بەروونی دیار نیە مەبەست لە رەش کردن چییە؟ ئایا سڕینەوە و لەناوبردنە؟ کە ئەگەر وا بێت لە گەڵ نموونەکانی ئەواندا نایەتەوە چون هیچ رەخنە و چالاکیەکی دنیای مەجازی ئاکامی نابێت بە لەناوبردنی فیزیکی، یان مەبەستی نووسەر ئەو شتەیە کە لە فارسیدا پێی دەڵێن”سیاه نمایی” پێموانیە نووسەر بەرانبەرە فارسیەکەشی باش زانی بێت چون ئەگەر بیزانیبا لانیکەم دەقاودەق وەریدەگێڕایەوە سەر کوردی، شتێکی لەو چەشنەی لە مێشکدا بووە بەڵام نەیزانیوە وشەکە چیە! لە شوێنی دیکەدا دەڵێ “هاوکات دەیانهەوێ ئەم کارانە لە ناو گەلیش پێش بخەن” کە لێرەشدا مانای پێش خستن دیار نیە، دیسان ” ئەم هێرشانە لە کاتێکدا پێش دەکەوێت” لەوانەیە مەبەست لە “پێش خستن” یان “پێش کەوتن” هەمان “درپیش گرفتن” فارسی بێت کە نووسەر نەیتوانیەوە بەرانبەرێکی شیاو لە کوردیدا بدۆزێتەوە بۆ ئەو وشە و لە وشەی پێش کەوتن کەڵکی وەرگرتوە کە لەم شوێنانەدا هەڵگری هیچ مانایەک نیە.

هەر لەو پاراگرافەدا رستەیەکی دەکە هەیە کە دەڵێ ” لە چوارچێوەی ئەم شەڕە تایبەتەدا کە وەک کۆنسێپتێک بە رێوەدەچێت، لە لایەن دەسەڵاتداران و داگیرکەران سەرکێشی دەکرێت. ” کە لێرەشدا “سەرکێشی” هەڵگری هیچ مانایەک نیە و روون نیە مەبەستی نووسەر لە سەر کێشی چییە، لەوانەیە مەبەستی “نظارت کردن”ی فارسی بێت کە لە کوردیدا چاوەدێرییە، جگە لە بێمانا بوونی وشەی سەرکێشی خودی رستەکەش پەیرەوی رێزمانی کوردی ناکات و دیار نییە چ جۆرە رستەیەکە، “لە چوارچێوەی… لە لایەن دەسەڵاتدارانەوە سەرکێشی دەکرێت!” هیچ مانایەکی نیە.
 

دیارە کۆی ئەو هەڵەگەلە ئەوەندە زۆرە کە باسکردنی هەمووی کاتێکی زۆری دەوێت هەربۆیە لە خوێنەر داوادەکەم خۆی دەقی ئەو هەڕەشەنامەیە بخوێنێت و هەوڵێ خۆی بۆ تێگەیشتن لە وشەکانی بدات. 

بەداخەوە ئەمە (واتە نەخوێندەواری نووسەر و بێگانە بوونی لە گەڵ زمانی کوردی) تەنیا کێشەی ئەم هەڕەشەنامە نیەو کێشەکانی ئەوەندە زۆرن کە خوێنەر ناچار دەکات گومانی جیددی لە سەر هەموو سیستەمی پەروەردەی پەکەکە بکات. هێزێکی سیاسی کە نەتوانێت کادرو بەرێوەبەرییەکی توانا بۆ نوسینی بەیانییەیەکی سادە پەروەردە بکات، دەبێ بنەمای پەروەردەی لە سەرچی دانابێت؟! لە بەشێکی ئەم هەڕەشەنامەیەدا خاڵێک هەیە کە سیستەمی کاری تەشکیلاتی ئەم گرووپەش دەباتە ژێر پرسیار کە لە درێژەدا ئاماژەی پێدەکەم.
 

ئەم هەڕەشەنامە ئەگەرچی رووبەڕووی هێزە سیاسییەکانی رۆژهەڵات نووسراوە بەڵام نووسەر نە تەنیا ناوی ئەم هێزانەی باش نەزانیوە و بە نووسینی “کۆمەڵەو دیموکراتی ئێران” دیار نیە مەبەستی چییە، بەڵکوو لە ئەلف و بێی بەیاننامە و ئاخاوتنی سیاسیش هیچ نازانێت! و بە بێ ئەوەی کە بەڵگەیەک بخاتە روو تاوانی سەیر و سەمەر دەخات پاڵ هێز و خەڵکی رۆژهەڵاتەوە. 
 

“ئەندامان و هێندێک بە ناو لایەنگرانی پارتەکانی رۆژهەڵات وەک کۆمەڵەی ”عەبدولڵا موهتەدی” و دیموکراتەکان دەستیان کردووە بە پەیڕەو کردنی ئەم سیاسەتە

کەسانێک کە توانا و هێزی تێکۆشانیان بۆ گەلەکەیان نیە و نەماوە و نیشتەجێی وڵاتە رۆژئاوایەکان یا باشووری کوردستانن، جێگای هەڤاڵانمان لە ناوخۆی رۆژهەڵاتی کوردستان بە هاوکاری هێندێ کەس لە ناوخۆ ئاشکرا دەکەن، ئەم شیوازە جێگا دیار کردنە کە لە سەر تۆڕە کۆمەلایەتیەکانی وەکوو فەیسبووک بەرێوە دەچێت، ئێمە وەکوو شێوازێکی راستەوخۆ یا ناڕاستەوخۆی سیخۆڕی بۆ دوژمنانمان دەزانین”
 

دیارە مەرجی یەکەمی کاری تەشکیلاتی نهێنی پارێزییە، هەرکەسێ کە کەمترین کاری تەشکیلاتی لە هەر حیزبێکدا کردبێت دەزانێ کە تەشکیلاتی حیزبی نابێ تەنانەت بۆ بنەماڵەی خۆیشی ئاشکرا بووبێ، ئەوە چ تەشکیلاتێکە کە خەڵکی تر و ئەندامی حیزبێکی تر دەزانن کێیە و خەریکی چییە؟! بۆ دەبێ بە وتەی ئەم هەڕەشەنامە کەسانێک لە رۆژئاوا ئاگاداری کاری تەشکیلاتی نهێنی گرووپەکەیان بن؟! دیارە ئەگەر شتەکە ئەوەندە بە ئاشکرا دەکرێت پێویستی بە دیارکردنی شوێن لە سەر تۆڕی کۆمەڵایەتی ناکات و کۆماری ئیسلامی بە بێ نیاز بە سیخوڕ لە ئوروپا و ئامریکاوە دەتوانێت بیاندۆزێتەوە و ئەوە کارێکی زۆر ئاسانە، ئەندامێکی تەشکیلاتی هێزێک کە خەڵکانی دانیشتووی رۆژئاوا و باشوری کوردستان بیناسن، دیارە ئەوەندە ئاشکرایە کە کۆماری ئیسلامیش دەیناسێت و ئەوە کێشەی خەڵکانی تر نیە بەڵکوو کێشەی تەشکیلات و پەروەردەی ئەو هێزەیە.
 

لە درێژەدا دەڵێ:” پارتیمان بەو ئەزموونەی کە بە تێکۆشانی چەندین ساڵە لە خەباتی نێو گەلدا دەستی خستووە، باش دەزانێت کە چۆن هەم خۆی و هەم گەلەکی بپارێزێت و دەیپارێزێت. گرنگ ئەوەیە ئێمە بزانین کە هەڵویستی ئەو پارتە کوردیانە کە لایەنگران یا ئەندامانیان وەها دەکەن چیە و پێویستە وڵامدەرەوەبن.” لێرەشدا بە ئەدەبیاتێکی ناڕوون و پڕ لە رق و کینەوە باسی شێوەی تۆڵە سەندنەوەی خۆی دەکات کە ئەڵبەتە روونیشی ناکاتەوە ئەو شێوە تۆڵەکردنە چۆنە و تەنیا دەڵێ ” پارتیەکەمان باش دەزانێت چۆن خۆی بپارێزێت و دەیپارێزێت” ئەم شێوە ئاخاوتنە ناروون و هەڕەشەییەی هێزی سەربازی پەکەکە تەنیا وەبیر هێنەری هەڕەشە تاکەکەسییەکانی پەکەکە و لق و پۆپەکانییەتی کە بەردەوام ئاراستەی نووسەران و رەخنەگرانی دەکەن و ئەڵبەتە هەڵەیەکی گەورەیان لەم نێوانەدا ئەوەیە کە بە هۆی نەناسینی کەشوهەوای ئەو شوێنانەی کە لقیان دامەزراندوە، پەرچەکرداری ئەم شێوە ئەدەبیاتە و بە گشتی هەڕەشە کردن باش لێک نادەنەوە و پێیان وایە ئەگەر لە باکوور و رۆژئاوا ئەو شێوەیە سەرکەوتوو بووە لە رۆژهەڵاتیشدا هەر وا دەبێ. 
 

بێ ئاگا لەوەی کە پەروەردەی رۆژهەڵاتی لە سەر بنەمای رەخنە و خوێندنەوە و بوێری دانراوە و زۆربەی چالاکانی ئەم خەڵکە وێڕای پاراستنی کەرامەتی تاک و گرووپەکان هەرگیز خۆیان لە رەخنە نەپاراستووە و ناشپارێزن. هەر بۆیە کەرستەی سەرکوت و هەڕەشە کەرەستەیەکی شکست خواردووە و تەنیا رواڵەتی هەڕەشەکەر ئالۆزتر و بە وتەی خۆیان رەش تر دەکات. 
 

ئەو ئەندام و لایەنگرانەی دیموکرات، کە لقی رۆژهەڵاتی پەکەکە ئەوەندە لێیان تووڕە و دڵ پڕ لە قینە، لە بنەمادا فێری مل کەچی و ترس نین و پەروەردەیان لە سەر بنەمای رەخنە گرتنی بەردەوام دانراوە و پەیڕەوی رێبازێکن کە لەودا نە هیچ تاکێک پیرۆزی هەیە و نە هیچ سیاسەت و بۆچون و کردەوەیەک هێڵی سوور و بڤەیە، تاکی دیموکرات شێوازی رەخنەگرتن لە ناو حیزبەکەی خۆێدا فێر دەبێت و هەرلەوێش نە تەنیا ئازادە لە رەخنەگرتن بەڵکوو بە پێی وتەکانی رێبەرانی شەهیدیان رەخنە گرتن و بوێری و قسەلەڕوو بوون وەکوو پێناسە و ئەرکی دیموکرات بوون و پێشمەرگە بوونیان دیاری کراوە و بایەخێکی نەگۆڕە و نموونەشمان لە هەڵویستی حیزبی دیموکرات پاش بڵاو بوونەوەی رەخنەکانی خەڵکی رۆژهەڵات و هەروەها ئەندامانی خۆیان لە سەر کۆنفرانسی پراگ بینی، کە لە دەقی دواهەمین پلۆنۆمی حیزبی دیموکراتی کوردستان دەستخۆشیان لە رەخنەگران کردو بە خاڵێکی موسبەتیان زانی. بۆیە رەخنەگرتن لە حیزبی دیموکرات دا بووە بە فەرهەنگ و هەڕەشە کردن لە ئەندامی حیزبی دیموکرات بۆ بێدەنگ بوون بەرانبەر بە راستییەکان و پشت گوێ خستنی رووداوەکانی وڵاتەکەیان، هەڵمەتێکی فەشەل هێناوو بێ ئاکامە کە هیچ دەستکەوتێکی پۆزیتیڤی بۆ پەکەکە و لقەکانی نیە و تەنیا رەخنەگرانیان سوورتر دەکات بۆ دەرخستنی راستییەکان. 
 

ئەو راستییانەی کە بوونی لقی رۆژهەڵاتی پەکەکە بەتەواوی دەخاتە ژێر پرسیار و سەرچاوەکانی پێکهاتنی ئەم هێزە روون دەکاتەوە. 
 

لێرەشدا دیسان ئەو چەمک و دەستەواژەگەلەی کە پەکەکە بۆ پێناسەی خۆی و حیزبەکانی رۆژهەڵات بەکاری دەهێنێت دەچێتە ژێر پرسیاری جیددی، ئەو حیزبە کە ئەوان بە کلاسیکی ناودەبەن دەستخۆشی لە رەخنەگرانی دەکات و حیزبی مۆدێڕنی ئەوان لە وەڵامی رەخنەدا هێزی سەربازی خۆی دێنێتە مەیدان و هەڕەشەی شەڕ و کوشتن دەکات. پێویست بە شرۆڤە ناکات کە ئەم شێوە هەڵسووکەوتە تا چ رادە مۆدێڕن و سەردەمیانەیە. 
 

دیارە شێوەی هەڵسووکەوتی پەکەکە لە چوارچێوەی سنووری خۆیدا شتێکی خۆماڵیەوە و کەس لێپرسینەوە لە سەر چۆنییەتی مامەڵەکردن لە گەڵ خەڵکی باکووریان لێ ناکات. بەڕێوەبردن و بەرپرسیارییەتی خەباتی هەرپارچەیەک، لە سەر خەڵک و هێزی هەمان پارچەیە، بەڵام دەستێوەردانی خەباتی پارچەکانی دیکە بە هیچ شێوە قبووڵ ناکرێت. ئەویش لە کاتێکدا کە تاکە مەبەست و دواهەمین ئامانجێک کە ئەم گرووپە رایگەیاندوە نەک دەوڵەت و دەسەڵاتی کوردی بەڵکوو شتێکی کەمتر لە خودموختارییە، ئوجالان لە نامەیەکدا کە لە رێگای پارێزەرانیەوە لە رێکەوتی ١٥-١-٢٠١٠ بڵاوی کردووەتەوە و ماڵپەڕی پارتی چارەسەری (لقی باشووری پەکەکە) دایناوە دەڵێ : ” لە چوارچێوەی بۆچونی مندا چەمكەكانی نەتەوەی دیموكراتی و وڵاتی دیموكراتی دەكرێ بەكار بەێنرێ، ئەو هەڵوەستەیە، ئامانجی دەستەڵاتداری و دەوڵەت نییە، بەشداری لە دەستەڵاتداری و دەوڵەت دا نابێ” 
 

پەکەکە بۆ خەڵکی روون ناکاتەوە کە ئەگەر لە ژێر دروشمی یەک وڵات و یەک خەباتداو بە ناوی دەوڵەت و وڵاتی کوردی خەڵکی پارچەکانی دیکەی لە دەوری خۆی کۆدەکردەوە، پاش پاشگەزبوونەوەیان لەو درووشمە و هاتنە سەر ئاستی شتێکی کەمتر لە خودموختاری لە چوارچیوەی دەوڵەتی تورکیەدا، مەبەستی لە هێشتنەوەی لق و پۆپەکانی لە پارچەکانی دیکەدا چییە؟ ئەو هێزە لە رووی چ بنەماو ئەسڵێک ئەو مافە بە خۆی دەدات کە لە باتی داوای لێبووردن لە خەڵکی رۆژهەڵات بۆ بەکوشتدانی لاوانی ئەو بەشەی کوردستان بۆ بەرژەوەندی کاتی خۆی، هەڕەشەش لە خەڵکی ئەم پارچەیە لە کوردستان بکات؟! 
 

ئەو داوای لێبوردنە کە لە دایکی سەربازانی تورک کرا دەبێت لە دایکی شەهیدانی رۆژهەڵاتی کوردستان بکرێت کە رۆڵەکانیان بوونەتە قوربانی سیاسەتێک کە هیچ دەسکەوتێکی بۆ ئەوان و وڵاتەکەیان نەبووە و ئەو هێزە کە لەوان کەڵکی وەرگرتووە خوازیاری مانەوە لە ژێر دەسەڵاتی دەوڵەتی توورکیەدایە. 
 

سیاسەتی کەڵک وەرگرتن لە هەستی نەتەوایەتی لاوانی کورد بۆ گەییشتن بە بەرژەوەندی گرووپی و دەستێوەردان لە بارودۆخی پارچەکانی دیکە کە نموونەی لە رۆژئاوادا دەبینین ئەم گرووپەی بەو ئاکامە گەیاندووە کە هەمان مامەڵە لە گەڵ رۆژهەڵاتیشدا بکات و هەر لە ئێستاوە پێش لە رووخانی کۆماری ئیسلامی ئامادەیی خۆیان بۆ شەڕ کردن بە دژی کوردی رۆژهەڵات و تێکدانی رەوشی ئەو وڵاتە بۆ گەییشتن بە مافەکانی دەردەبڕن، بەڵام بەخۆشییەوە رۆژهەڵات جیاوازی یەکجار قووڵی لە گەڵ رۆژئاواو باکووردا هەیەو خەڵکەکەی مەیدان بە هەڵسووکەوتی لەو چەشنە نادەن.
 

هەڕەشەنامەی لقی رۆژهەڵاتی پەکەک لە بەشی کۆتاییدا و بە بێ هیچ شەرمێک روو لە هەموو خەڵکی رۆژهەڵات دەکات و دەڵێ: “گەلەکەمان و ڕای گشتی ئاگادار دەکەینەوە بەرامبەر ئەو چەشنە سیاسەتە خۆیان بپارێزن” بە هەڕەشەی راستەوخۆ و زمانێکی زۆر ناشیاو “گەل” و “رای گشتی” ئاگادار دەکاتەوە کە ئاگایان لە هەڵسووکەوتی خۆیان هەبێت و بە پێچەوانەی خواستی ئەوان نەجووڵێنەوە چون هەر وەک خۆی دەڵێ “بێ‌وڵام نامێنێتەوە” !! 
 

ئەگەرچی سەردەمی هەڕەشەی لەم چەشنە بەراستی بە سەر چووە و روونە کە هیچ کاریگەرییەکی نیە، بەڵام کارەکە لە خۆیدا بێریزی و لە چوارچێوەی خۆ ترازان و ئاخافتنی زیادە لە ئاستی خۆیە کە لە لایەن ئەو کەسانەوە کە ئامانجی ئەم هەڵمەتەن نابێ بێ وەڵام بمێنێتەوە، چونکوو بێ وەڵام هێشتنەوە، ئەو وەهمە لە لایان بتەو دەکاتەوە کە توانای سەرکوتیان هەیە و دەتوانن خەڵکی ئازادیخواز بە هەڕەشە دەستەمۆ بکەن. دیارە نووسراوەکە لە ئاستێکدا نیە کە شیاوی وەڵامدانەوە لە لایەن حیزبەکانەوە بێت، بەڵام ئەندامانی حیزبەکانی رۆژهەڵات و چالاکانی سیاسی و مەدەنی و خاوەن قەڵەمان و رۆشنبیرانی رۆژهەڵات دەبێ هەر وەک هەمیشە لە مەیدان رەخنەدا بن و هەرچۆن لەم ماوەیەدا بە دروستی هەڵەکانی هێزە خۆماڵییەکانیان دەستنیشان کردوە و هەڵویستیان گرتوە، دەبێ بەرانبەر بە ئەم شێوە هەڕەشەگەلەش خاوەن هەڵویست بن و بەرانبەریان دڵنیا بکەنەوە کە رێگای سەرکەوتن و مانەوەی هەر هێزێکی سیاسی لە رۆژهەڵاتدا نە سەرکوت و هەڕەشە، بەڵکوو قەبووڵی رەخنە و بەخۆداچوونەوەیە.