پرۆژە نەزۆكەكەی پژاك بۆ رۆژهەڵاتی كوردستان، قەرەنی قادری

لە (5/5/2014)دا پارتی ژیانی ئازادی كوردستان (پژاك)، لەژێر ناوی “كۆمەڵگەی دیموكراتیك و ئازادی رۆژهەڵاتی كوردستان – كۆدار”، “سیستەمێكی سیاسیی حوكمڕانی بۆ رۆژهەڵاتی كوردستان” راگەیاند.

 

ئەم “بەرنامە”یە لەسەر بنەمای بۆچوونەكانی عەبدوڵڵا ئۆجەلان سەرۆكی PKK و راستەخۆ لەلایەن (پژاك)ەوە ئامادە كراوە. بەرنامەی (كۆدار) لە 11 خاڵ پێكهاتووە و لە بەشێكیدا دەڵێت: “بانگ لەسەرجەم گەلی كورد لە رۆژهەڵاتی كورستان و ئێران دەكەین كە بە بەشداری خۆیان، خاوەنداریەتی لە ناسنامەی دیمۆكراتیكی خۆیان بكەن. هاوكات بانگ لەسەرجەم سازی، رێكخستن، پارت، رووناكبیران و كەسایەتیە ئازادیخوازەكانی كورد دەكەین كە پشتگیری و بەشداری لە سیستەمی KODAR بكەن.”

 

ئەم بەرنامە سیاسییە بۆ “خۆبەڕێوەبەری لە رۆژهەڵاتی كوردستان”، هەر لە سەرەتادا تەواوی كاروبارەكانی لەلایەن (پژاك)ەوە ئامادە كراوە و دوو هاوسەرۆك كە ئەوانیش لەخۆیانن، بۆ “كۆمەڵگەی دیموكراتیك و ئازادی رۆژهەڵات” دیاری كراون. بەوپێیە هەر حیزب یان رێكخراوێك كە بچێتە ژێر باڵی ئەو پرۆژەیەوە، دەبێ لە ژێر سەركردایەتی (پژاك)دا بێت. ئایا حیزب و رێكخراوە سیاسییەكانی رۆژهەڵاتی كوردستان ئامادەن بچنە ژێر “سەركردایەتی”ی پژاكەوە؟

 

هەر لە سەرەتای بەیاننامەكەدا ئاماژە بە “شەڕی جیهانیی سێهەم” كراوە و هاتووە: “دەتوانین بڵێین كە شەڕی جیهانی سێهەم لە ئارادایە. ئەم شەڕە، لە بواری پانتایی و مەودادا، لە هەر دوو شەڕی جیهانی رابردوو، قووڵتر و درێژخایەنترە.” ئاماژەكان هیچ باس لەوە ناكەن كە هەر ئێستا شەڕی سێیەمی جیهانی لە ئارادا بێت، كە بێی باس لە “قووڵتر و درێژخایەنتر”ی شەڕی سێیەمی جیهانی بكەیت. ئەم “هەڵسەنگاندن”ەی دۆخی ئاڵۆزی جیهان لەلایەن پژاكەوە، زۆر ساویلكانەیە و ناشارەزایی ئەوان دەگەیێنێت.

 

لە شوێنێكی دیكەدا بە دروستی ئاماژە بە چەمكی “دەوڵەت – نەتەوە” لە ئێراندا كراوە كە كێشەی بۆ نەتەوەكانی دیكە ناوەتەوە، گەرچی بەر لە پژاكیش باس لە شۆڤێنیستبوونی (دەوڵەت – نەتەوە) كراوە، بەڵام كە دێت باس لە “گەلی كورد” دەكات، دەڵێت: “گەلی كورد و بزووتنەوە شوناسخواز و ئازادیخوازیەكەی بە ساڵانە بۆ پاراستنی هەبوون و ئازادی، تێكۆشان دەكات. بەپێی ئەزموونی مێژوویی خۆی، دەوڵەت- نەتەوەگەرایی تێپەڕاندووە و…”.

 

سەقەتیی ئەم رستەیە لەوەدایە كە چەندان خوێندنەوەی بۆ دەكرێت. یەكەمین خوێندنەوە ئەوەیە كە “گەلی كورد” خاوەنی “دەوڵەت – نەتەوە” نەبووە تا ئەم قۆناغەی تێپەڕاندبێت!

 

هەر لە كۆنفرانسی راگەیاندنی (كۆدار)دا باس لەوە كرا:‌ لەداهاتوویەكی نزیكدا پارتی ژیانی ئازادی كوردستان (پژاك) سەبارەت بە دامەزراندنی سیستەمی كۆمەڵگای دیموكراتیك و ئازادی رۆژهەڵات “كۆدار” هەڵوێستی فەرمی خۆی رادەگەیەنێت”. هەر لە بنكە و بارەگای ئەوان، بە هێز و سەركردایەتیی ئەوانەوە بۆ داهاتووی “رۆژهەڵاتی كوردستان” سیستەمێكی سیاسی دامەزرێندراوە، ئەی ئەم هەرایە چییە دەیگێڕن كە لە داهاتووشدا پژاك “هەڵوێستی خۆی” رادەگەیێنێت؟

 

دامەزرێنەری “سیستەمی كۆمەڵگای دیموكراتیك و ئازادی رۆژهەڵات –كۆدار” خودی (پژاك)ە، ئەوە نییە دوو هاوسەرۆكەكەی (كۆدار)، ئەندامی سەركردایەتی پژاكیشن. دوو هاوسەرۆك كە خاوەنی دوو پۆستیشن! (كۆدار) هەڵوێستی سیاسیی پژاكە، لەبەر ئەوە پێویست ناكات پەنا بۆ هەڵخەڵەتاندنی هاووڵاتیان بەرن. گواستنەوە لە حیزبێكی چەكدارەوە بۆ دانانی سیستەمێكی سیاسی كە گۆیا پژاكیش “بەشێك” بێت لەو سیستەمە سیاسییە، دەبێ باس لەوە بكات، پژاك بە شێوەی پێشوو كە كاری چەكداری دەكرد، ئیتر باوی نامێنێت، چونكە بە تەنیا نەیتوانی هیچ حیزب و رێكخراوێكی سیاسی لە رۆژهەڵاتی كوردستان لە دەوری خۆی كۆبكاتەوە.

 

لەوانەیە (كۆدار) رێگەیەكی دیكە بێت بۆ كۆكردنەوەی هێز لە دەوری “پلاتفۆرمێكی سیاسی” كە بنچ و بنەوانەكەی لە دەست پژاكدایە و ئەمەشیان بەشێكە لە پرۆژەكەی PKK بۆ زاڵبوونی بەسەر پارچەكانی دیكەی كوردستاندا. (پەیەدە)یەكی دیكە، بەڵام لە دۆخێك و قۆناغێكی دیكەدا!

 

پژاك هەر بە نەفەس و كولتووری (PKK)وە كاروباری سیاسی بەسەر ئەوانی دیكەدا دەسەپێنێت. بەرنامەكان دەنووسێت، سەرۆكیان بۆ دیاری دەكات و دوایی داوا دەكات لەبەر “بەرژەوەندیی كورد” یەك بگرن! پژاكیش رێك ئەو كولتوورەی پەكەكەی بۆ رۆژهەڵاتی كوردستان گواستووەتەوە، بەڵام بەبێ لەبەرچاوگرتنی ئەوە كە رۆژهەڵاتی كوردستان بە حیزب و رێكخراوە سیاسییەكانیەوە، بەرپەرچی كولتووری خۆسەپاندن و بەكەمزانینی ئەوانی دی دەداتەوە.

 

“سیستەمە حوكمڕانییەكەی پژاك” تەنانەت خاوەنی ئاڵای تایبەت بە خۆیەتی و “داربەڕوو” لە زەمینەیەكی سەوزدا بۆ رۆژهەڵاتی كوردستان دەستنیشان كراوە، ئەمەش لە حاڵێكدایە كە رۆژهەڵاتی كوردستان لە (كۆماری كوردستان 1946-1947)ەوە تا ئەمڕۆ یەك ئاڵای هەیە و بووەتە سامان و پێناسەی نەتەوەیی لە كوردستاندا. یەكێك لە ئامانجەكانی (كۆدار)یش لە رۆژهەڵاتی كوردستان “سڕینەوە”ی سامان و مێژووی ئەو پارچەیەی كوردستانە.

 

سەرچاوە: روداو

بابەتی پەیوەندی دار

• كەجەكە: وازمان لە دەوڵەتی نەتەوە هێناوە

• پژاك سیستمی “كۆدار” بۆ رۆژهەڵاتی كوردستان رادەگەیەنێت