یەکێتی نیشتمانی کوردستان بەرەوکوێ، جەبار کەریمی

هەرلە سەرەتای دامەزرانی یەکێتی نیشتمانی کوردستانەوە هەتا وەکو ئێستاشی لەگەڵ بێت دروشمی ئەو حیزبە ئەوە بووە کە” بۆ ئازادی و سەربەستی کوردستان

و گەلی  کوردستان لە هیچ فیداکاری یەک درێغی نەکردوە و ناشی کات“

لە دووای ڕوداوەکانی ئەم دووایانەی عراق و کوردستان، هەل و مەرجێکی ئەوتۆ هاتوەتە پێش کە گەلی کوردستانی لە هەر سەردەمێکیتر باشتر و لەبارتر نزیک کردوەتەوە لە خەونی لەمێژینەی خۆی. ئەو نزیک بونەوەیە لە گەیشتن بە ئامانجە لەمێژینەکانی گەلی کورد ئەوەندە جیدین و هەل و مەرجەکەی لەبارە کە هەموولایەک چاوەرووانن کە ئەم گەلە ستەم لێکراوە.بە بڕیارێکی بووێرانە و مێژوویی خۆی لە بندەستی ڕزگار بکات و چارەنووسی خۆی بەدەست بێنێت.گەلی کورد بۆ گەیشتن بەبڕیارێکی ئەوتۆ پێویستی بە ڕابەرییەکی ئاگا و بووێر و نەترس هەیە کە سەربەخۆ بێت لەبڕیاردان لە سەرپرسە چارەنووس سازەکان.

لەم بار و دۆخە هەستیارەدا کە هاتوەتە پێش و یەکدەنگی و یەکڕیزی ڕابەران و حیزب و ڕێکخراوە سیاسیەکانی کوردستان لەهەردەم و کاتێک زەرورترە، بەڵام جم و جۆڵ و هەڵوێستەکانی ڕێبەرانی یەکێتی نیشتمانی لەم هەل و مەرجەدا، شوعارەکانی ئەو حیزبەی هێناوەتە ژێر پرسیار. ئەگەر لە هەڵوێستەکانی نەجمەدین کەریم، عادڵ مراد و ووت و وێژەکانی بەرهەم ساڵح و نامەکەی ئازاد جوندیانی و  ڕاگەیەندراوەکەی حاکم قادر وورد ببینەوە ئەوەمان بۆ دەردەکەوێ کە ئەو حیزبە توشی شڵەژاویەکی سیاسی هاتووە کە حیزبەکەی دابەش کردووە بەسەر چەند گروپ و بۆچوندا. وا دێتە بەرچاو کە ڕێبەرایەتی یەکێتی خەبەریان لە یەکتر نیە و ئاگاییان لە بار و دۆخی کوردستانش بەو جۆرەی کە پێویستە نیە. وا پێدەچێ کە ڕێبەرانی ئەو حیزبە نەتوانن کۆببنەوە و ڕا و بۆچونەکانی خۆیان ئاڵ و گۆڕ بکەن و لانی کەم یەکدەنگ بن، ترسێک هەیە کە حزبەکەی توشی  شڵەژاوی و ئەو هەرکەس هەرکەسە کردوە، ئەو ترسەش لە قسەکانی جوندیانی دا دەردەکەوێ کە دەڵێ “من ئەو نامەیەم بۆ مەکتەبی سیاسی نوسیوە و بۆ ئەوانیشم ناردوە و ئەوە من نەبووم کە نامەکەم ناردووە بۆ تۆڕی میدیاکان، بەڵکو لە لای خۆیانەوە دزەی کردوە “یانی جوندیانی بێتاوان بوونی خۆی ڕادەگەیەنێت کە ئەگەر گەلی کوردستان بەم کێشەی ناو سەرکردایەتی یەکێتی زانیوە خەتای ئەو نەبوە لە مەکتەبی سیاسییەوە دزەی کردوە بۆ رۆژنامەکان.

یەکێتی نیشتمانی چاوەڕوانی ئەوەیە کە لە حکومەتی داهاتوی عراق دا پۆستی سەرۆک کۆماری بۆ ئەو بێت، بەڵام هێشتا نەیتوانیوە لەسەر کاندیدەکەی خۆی کە بۆ پۆستی سەرۆک کۆمارییە خۆی ساغ کاتەوە و لەگەڵ لایەنەکان دا دیالۆگ دەست پێبکات، ئەوەش نیشانەی ئەوەیە کە یەک دەنگی و یەک هەڵوێستی نیە لە ناو ئەم حیزبەدا و بۆ داهاتووی کورد و گەلی کوردستانیش ڕوئیایەکی ڕوونیان نیە.

یەکێتی و ڕابەرانی ئەو حیزبە بەم شێوەیە بەردەوام بن و بەم زووانە چارەیەک بۆ ئەو کێشانەی خۆیان نەدۆزنەوە، دەبێ چاوەڕوانی لە یەکترازانی زیاتر بن و باوەڕی کۆمەڵانی گەلی کوردستانیش لەدەست دەدەن.

لەم بار و دۆخەی کە عراق و کوردستانی پێدا تێدەپەڕێ ئەم شڵەژاوی هەرکەس هەرکەسەی ڕێبەرایەتی یەکێتی نیستمانی نە لە بەرژەوەندی گەلی کوردستانە و نە لە قازانجی یەکێتی دایە وەک حیزب. ڕۆشنبیر و سیاسەتوان و حیزب و ڕێکخراوە سیاسیەکانی کوردستان زۆرجار گلەیی لە مێژوو دەکەن و دەڵێن (ڕێککەوتننامەی سایکس پیکۆ و پەیماننامەی لۆزان و مەلای خەتێ و هتد) …. هۆکاری ڕۆژڕەشی و نەهامەتی گەلی کوردستانن. ئێمەش گلەیی خۆمان دەخەینە سەر ئەو گلەییانە، بەڵام لە بەرانبەر هەڵوێستی ئێستای ئەندامانی ڕێبەرایەتی یەکێتی نیشتمانی کوردستان دا چی بڵێین و چی بکەین؟ و ئایا فەرقی ئەم هەڵوێستەی ئەندامانی سەرکردایەتی ئەم حزبە لەگەڵ ڕێککەوتننامەکانی تردا چیە؟

لە لایەکیترەوە، ئەو پەیماننامانە تەنها بۆ کورد نەنوسراون بەڵکو جەندین ناوچە و گەلی لەیەک جیاکردوەتەوە، بەڵام لە ناو ئەو ناوچە و گەلانەی کە بەو گۆیەوە دابەش کرابوون تەنها کورد و کوردستانەکەیەتی کە بە دابەشکراوی ماوەتەوە. ئەوانیتر ساڵیانێکی دوور و درێژە ووڵاتی سەربەخۆی خۆیانیان هەیە، ڕێککەوتننامەکان لە سەر عەرزی واقیع هیجی نەماوە نازانم بۆ دەبێ شتێک کە ووجودی نەماوە هێشتا بۆ ئەو بەناو سیاسەتوانانە ببێت بە ئایەتی قورعان و نەگۆڕ بێت. دەبوایە ئەو ڕێبەرانەی یەکێتی بە هەموویانەوە ئەوەندەی حنان فتلاوی غیرەتیان هەبایە بەرانبەر کوردستانەکەیان، کە بە قسەی خۆی دەڵێ بۆ ماوەی چەند ساڵ بۆخۆی پێشگیری لە جێبەجێ بونی ماددەی ١٤٠ کردوە.

ڕوون و ئاشکرایە کە گەلی کوردستان تەسلیمی ئەو بۆچوونە چەواشەکاریانە نابن و ئەوکەسانەش کە خاوەنی ئەو جۆرە لە هەڵوێستن، لە مێژووی خەباتی گەلی کورددا شوێنیکی باشتریان لە مەلای خەتی بە نسیب نابێت..

Jabbar.k@hotmail.com

پێشمەرگەکان: بابەتی پەیوەندی دار

• عادل موراد: ئێمه‌ دژی سه‌ربه‌خۆیی كوردستانین

• د. به‌رهه‌م ساڵح: مافی چاره‌ی خۆنووسین بۆ گه‌لی كوردستان مافێكی ره‌وایه‌

05/07/2014

خه‌ندان

 د.به‌رهه‌م ساڵح رایگه‌یاند كه‌ مافی چاره‌ی خۆنووسین بۆ گه‌لی كوردستان مافێكی ره‌وای خه‌ڵكی كوردستانه‌ و ئه‌م دۆخه‌ی بۆ كورد هاتۆته‌ پێش پێشهاتێكی زێڕینه‌.

د.به‌رهه‌م ساڵح له‌دیدارێكی تایبه‌تدا له‌گه‌ڵ كه‌ناڵی ئاسمانیی گه‌لی كوردستان كه‌ به‌هێز حسێن له‌گه‌ڵیدا سازیكردووه‌، رایگه‌یاند: مافی چاره‌ی خۆنووسین بۆ گه‌لی كوردستان مافێكی ره‌وای خه‌ڵكی كوردستانه‌، وتیشی: ئه‌م دۆخه‌ی بۆ كورد هاتۆته‌ پێش پێشهاتێكی زێڕینه‌، له‌هه‌مانكاتیشدا پڕ مه‌ترسییه‌.

د.به‌رهه‌م ساڵح جه‌ختیشی‌ له‌وه‌ كرده‌وه‌ كه‌ “پێویسته‌ سه‌ركردایه‌تیی سیاسیی كوردستان ژیرانه‌ مامه‌مه‌ڵه‌ له‌گه‌ڵ ئه‌م دۆخه‌دا بكات”.

عیراقی نوێ هاتۆتە ئاراوە؟

لەبارەی دۆخی عیراقەوە، د.بەرهەم وتی: ئەو رووداوانە هەژانێكی گەورەبوو، گۆڕانكاریی گەورەی هێناوەتە ئاراوە، بۆیە ئەوە واقیعێكی نوێیە، 10 ساڵ بەسەر راماڵینی دەسەڵاتی سەدام ‌و سیستمی نوێی سیاسی لەعیراقدا تێدەپەڕێت‌و ئەنجام كۆمەڵێك كێشەو گیروگرفتی گەورە بەرۆكی ئەو سیستمە سیاسییەی گرتۆتەوە، ئەو گۆڕانكاریانەو ئەو واقیعە تازەیە رەنگدانەوەی راستەوخۆی بۆ هەرێمی كوردستان بۆ سیستمی سیاسیی عیراق، بگرە بۆ خۆرهەڵاتی ناوەڕاست هەیە، ئێمە وەكو كورد وەكو هەرێمی كوردستان، وەكو گەلی كوردستان دەبێت زۆر بەوردی و زۆر بەژیری تێڕوانینی خۆمان بۆ ئەو رووداوانە هەبێت‌و لەبەر رۆشنایی ئەو  رووداوانە هەڵوێستی خۆمان دیاری بكەین.

 

راشیگەیاند: مافی چارەنووسی گەلی كوردستان مافێكی رەوای خۆمانە، تاكێكی كوردیش نییە چاوی لەسەربەخۆیی‌و ئازادیی كوردستان نەبێت، ئەوە مەسەلەیەكە پێم وانییە كە بهێنێت زۆری پێی لەسەر دابگرین، واقیعەكە وایە كە گەلی كوردستان وەكو هەموو گەلانی تری دنیا مافی خۆیەتی خۆی بەئازادانە بڕیار لەمافی چارەنووسی خۆی بدات.

 

 هەڵبەتە ساڵانی رابردوو ئێمە بۆچوونێكمان هەبووە كە بەشێك بین لەعیراقی فیدراڵی دیموكرات، هەوڵمان داوە ئەو عیراقە فیدرالە دیموكراتە بەئەنجامێكی گونجاو بگات، كارمان كردووە لەبەغدا، سەركردایەتیی كورد، جەنابی مام جەلال، جەنابی كاك مەسعود، سەركردەكانی تری بزووتنەوەی رزگاریخوازی كوردستان لەبەغدا هاوكارو هەماهەنگ بوون بۆ ئەوەی ئەو سیستمە دیموكراتی‌و فیدراڵییە بەرقەراربێت‌و لەناویشیدا گەلی كوردستان بەمافە نەتەوایەتییەكانی خۆی شاد بێت، ئەوەی گرنگە گەلی كورد لەم پێشهاتانەدا هۆكاری ئەو حاڵاتانە نەبووە، ئەگەر بێی بەراوردی هەڵوێستی سیاسیی كوردستان بكەیت.

 سەبارەت بەلایەنەكانی تری پێكهاتەكانی عیراق، دەبینیت گەلی كوردستان و هێزە سیاسییەكانی كوردستان بەشێوەیەكی مەسئولانە تر، ژیرانەتر لەگەڵ ئەم پڕۆژانەدا كاریانكردووە، وتیشی: ململانێی تایفی بۆتە هۆكاری ئەو كێشەو گیروگرفتە گەورانەی كە ئەمڕۆ لەعیراقدا هەیە، راشیگەیاند: ئەم گۆڕانكاریانە كۆمەڵێك ئەگەری نوێی هێناوەتە پێشەوە بۆ كوردستان، ئەم ئەگەرە نوێیانە هەم دەرفەتی باشی تیایە بۆ گەلی كوردستان، هەم مەترسی گەورەشی تیاهەیە.

ئاماژەی بەوەشدا كە(هۆكارەكانی ئەم دۆخەی ئێستای عیراق گەورەن، كێشەكان قوڵترن، بەرجەستەن ئێستا لەبەرچاوی هەمووان، بۆیە دووبارەی دەكەمەوە ئەگەر بێتوو دە ساڵی رابردوو بەراورد بكەین، دەبینین سەركردایەتی سیاسی كورد هەوڵیداوە بەشێوەیەكی بەرپرسانە مامەڵە لەگەڵ ئەو بارودۆخانەدا بكات، وتومانە ئێمە پابەندین بەپڕۆژەیەكی دیموكراتی فیدراڵی بۆ عیراق، وتوشمانە مانەوەمان لەعیراقدا بەندە بەپڕۆژەیەكی فیدراڵی و جدییش بووین لەوەو جدیشین).

مەترسییەكان

د.بەرهەم لەبارەی مەترسییەكانەوە، ئەوەی خستەڕوو كە مەترسییەكان ئەمەی خوارەوەیە: ئێمە ئێستا لەشەوو رۆژێكدا هەزار كیلۆمەتر هاوسنوورین لەگەڵ هێزێكی توندڕەوی دواكەوتووی تاڵیبان ئاسا، ئەمە واتێنەگەین ئەم ئاگرە سوورە لەخۆمان دوورە، نەخێر ئەو ئاگرە سوورە لەبەردەرگای ماڵی خۆمانە ئەگەر وریا نەبین كێشەیەكی گەورە دەبێت بۆ گەلی كوردستان، دەبێت بەوریاییەوە مامەڵە لەگەڵ ئەمە بكەین، بۆچوونێك هەیە لەهەندێك ناوەندی عەرەب كە كورد سوودمەندە لەو قەیرانەی ئێستای عیراق، ئەوە هەڵەیە.

ئێمە خۆشحاڵ نین  بەنەهامەتی گەلانی عیراق،  ئەو هاوپەیمانە مێژووییانەی هەمان بووە لەگەڵ شیعەو سووننەی عیراق لەگەڵ ئەو كەسانەی هاوسێی ئێمە بوون لەوناوچانەی تردا، ئێمە هەمیشە پشت‌و پەنابووین بۆیان، ئێمەو شیعەكان، ئێمەو مەرجەعیەتی نەجەف كۆمەڵێك پەیوەندیی دێرینمان هەبووە، ئەو هاوپەیمانیانەبوون كەبوونە هۆی راماڵینی سەدام و رژێمی بەعس.

 

پرسی راپرسی ‌و كاریگەرییەكانی

لەبارەی پرسی راپرسی لەكوردستان، د.بەرهەم وتی: جەنابی سەرۆكی هەرێم تەئكیدی لەسەر ئەوە كردۆتەوە كە دوا بڕیار دەگەڕێینەوە بۆ بڕیاری گەل، دڵنیام لەوەی سەركردایەتیی سیاسیی كورد بەوردی رەچاوی هەلومەرجە مەوزوعییەكان دەكات، هیچ كاتێك‌و هیچ كەسێك لەسەركردایەتیی سیاسیی كورد نكوڵی لەمافی چارەنووسی خەڵكی كوردستان نەكردووە، خەڵكی كوردستانیش بەشی ئەوە ژیرو وریایەو سەیری رووداوەكان دەكات‌و بەپێی ئەو رووداوانەو بەپێی ئەگەرەكان بڕیار لەداهاتووی خۆی دەدات، ئێستا هەوڵی ئێمە بۆ ئەوەیە كە ئەم مەترسیانەی رووبەڕوومان بوونەتەوە بەشێوەیەكی ژیرانە بەڕاوێژ لەگەڵ لایەنە پەیوەندیدارەكان چی لەسەر ئاستی نێودەوڵەتی بێت، چی لەسەر ئاستی هەرێمایەتی‌و عیراقیش بێت، كاری بۆ بكەین، بەڵام وەكو دەڵێن ئەگەری گەورە بەڕێوەیە دەبێت بەوردی‌و بەژیری لەگەڵی مامەڵە بكەین.

 وتیشی: بەشێوەیەكی بنەڕەتی بڕیاری گەل سەنگی مەحەكە، ئەگەر هاتوو ئەو پڕۆسە دیموكراسییەی كە دە ساڵە پێوەی خەریكین‌و پێوەی ماندووین، ئەگەر نەگەیشتە ئەنجام‌و ئەم شەڕی تایفی‌و خوێناوییەوە بەردەوام بوو، قوڵ بۆوەو عیراق بەئاراستەیەكی تر رۆیشت، ئەوا ئەو كاتە گەلی كوردستان مافی رەوای خۆیەتی، هەر بڕیارێك بدات.

پێشمەرگە ئەركی خۆی ئەنجامداوە

لەبارەی رۆڵی هێزی پێشمەرگەشەوە، وتی: هێزی پێشمەرگەی كوردستان بەئەركی خۆیان هەستاون كەچوونەتە ناوچە دابڕێنراوەكان، ئەوەش لەدوای پاشەكشێی هێزەكانی سوپاوە بووە لەو ناوچانە، پێم وایە پێكهاتەكانی ئەو ناوچانە سوپاسگوزاران لەهێزی پێشمەرگە، ئێمە چاوەڕوانیمان ئەوەیە بەغدا بێت هاوكاری هێزی پێشمەرگە بكات بۆ ئەوەی بتوانێت بەرگری بكات لەو ناوچانە.

راشیگەیاند: ئەگەر تەوافوقی سیاسی لەعیراقدا نەیەتە ئاراوە ئەوا قەیرانەكە زۆر قورسترو ئاڵۆزتر دەبێت.

یەكڕیزیی نێو ماڵی كورد

د. بەرهەم لەبارەی دۆخی ئێستای نێو ماڵی كوردەوە رایگەیاند: كوردیش وەكو هەموو گەلانی تری دنیا دیدوبۆچوون‌و تێڕوانینی جیاوازی تێدایە بەڵام بەخۆشحاڵییەوە دەڵێم سەرباری هەر دیدوتێڕوانینێكی جیاواز هێزە سەرەكییەكانی ئەمڕۆی كوردستان یەك دەنگ‌و هاوكارن، بۆچوونمان دەبێت، لەسەر چەند مەسەلە، بەڵام لەسەر كۆی مەسەلە سەرەكییەكان یەكڕیزین، لەمەشیاندا دەڵێم: ئەم قۆناغەی ئێستای هەرێمی كوردستان قۆناغێكی هەستیارەو ئەزموونێكی تایبەتمەندە لەمێژووی كورددا، فراوانترین پانتایی حوكمی خۆبەخۆی كوردستان‌و بۆ درێژترین ماوە، ئەمڕۆ كورد پێگەیەكی گرنگە لەهاوكێشەكانی سیاسی‌و ئەمنی لەخۆرهەڵاتی ناوەڕاستدا، پێویستە قەدرو پێگەو بەهاوبایەخی بزانین، پاراستنی ئەم ئەزموونەو پەرەپێدانی، بەندە بەیەكڕیزیی خەڵكی كوردستانەوە.

ئایندەی ئێستا بەرەو كوێ؟

وتیشی: ئەوەی ئێستا گۆڕانكاری‌و هەژانی گەورەن، نەبەكەمی وەرگرین‌و نە بێ باك بین لەبەرامبەریان، دوپاتیشی دەكەمەوە دەرفەتیشی تێدایەو مەترسیشی تێدایە، ئەگەر پێمان وابێت ئەو مەسەلانە زوو بەزوو یەكلایی دەبنەوە هەڵەین، بۆیە دەبێت پشوو درێژبین، دەبێت بزانین كە ئەوە درێژە دەكێشێت، ئەولەویاتی خۆمان لاڕوون بێت، یەكەم بەلای منەوە پاراستنی یەكڕیزیی گەلەكەمان زۆر گرنگە، پەیامی بەردەواممان لەگەڵ شیعەو سووننەی عیراقدا هەبێت كە ئێمە هاوپەیمان‌و هاوسەنگەرین لەڕووبەڕووبوونەوەی ئیرهاب، ئەوە پەیامێكی گرنگە بۆ كۆمەڵگەی نێودەوڵەتی‌و دراوسێكانمان، هاوكاری لەگەڵ دراوسێكانمان، چونكە سەرباری هەموو ناكۆكییەكانی ئەم لایەنانە لەبەرامبەر دروستبوونی تالیبانێك لەعیراقداو لەدراوسێی ئێمە، هەموو هاودەنگ دەبن زوو یاخود درەنگ، من هیوادارم كورد ئەم پێگەیەی خۆی هەم پارێزراوبێت، هەم كاریگەریی خۆی هەبێت لەئایندەیەكی گونجاوترو سەقامگیرتر بۆ سەرجەمی ناوچەكە.

دوپواتیشیدەكەمەوە كە چەندینجار دەرفەتی گەورەو مەترسی گەورەش بۆ میللەتەكەمان بەرجەستە بووە، لەبەر ئەوەی لەناوخۆماندا ناكۆك بووین، پاراستنی یەكڕیزیی گەلەكەمان و هێزە سەرەكییەكانمان گرنگە بۆ ئەوەی ئەوانەی هەمانە بپارێزین‌و پەرەشی پێبدەین، ئەم نموونە گەشەسەندووەی حوكمڕانی خۆبەخۆی كورد بەئاسۆی خۆی بگات.

 

………

 

حاكم قادر: ئه‌م قۆناغه‌ نوێیه‌ وا ده‌خوازێت گه‌لی كورد خۆی بڕیار بدات

05/07/2014

خه‌ندان

ئه‌ندامێكی ده‌سته‌ی كارگێڕی مه‌كته‌بی سیاسیی یه‌كێتی نیشتمانی كوردستان رایگه‌یه‌نێت، ئه‌م قۆناغه‌ نوێیه‌، واده‌خوازێت، گه‌لی كوردستان خۆی بڕیار له‌ مافی چاره‌نووسی خۆی بدات و ئێستا و ئاینده‌ی دیاری بكات، هه‌ر بۆیه‌ پێویسته‌ سه‌ركردایه‌تی سیاسی كورد یه‌كهه‌ڵوێست و خاوه‌ن یه‌ك گوتاری سیاسی و ستراتیجی و یه‌كگرتوو بن و هه‌ل و ده‌رفه‌تی زێڕین له‌ده‌ست نه‌ده‌ن.

له‌ لێدوانێكی رۆژنامه‌وانی نووسراودا كه‌ وێنه‌یه‌كی بۆ خه‌ندان نێردراوه‌، حاكم قادر حه‌مه‌جان، ئه‌ندامی ده‌سته‌ی كارگێڕی یه‌كێتی نیشتمانی كوردستان ده‌ڵێت: “ئه‌مڕۆ هه‌لومه‌رج و قۆناغێكی نوێ له‌سه‌ر ئاستی عیراق و خۆرهه‌ڵاتی ناوه‌ڕاست و دونیا، بۆ نه‌ته‌وه‌ی كورد و گه‌لی كوردستان هاتوه‌ته‌ ئاراوه‌. ئه‌م قۆناغه‌ نوێیه‌، واده‌خوازێت، گه‌لی كوردستان خۆی بڕیار له‌ مافی چاره‌نووسی خۆی بدات و ئێستا و ئاینده‌ی دیاری بكات، هه‌ر بۆیه‌ پێویسته‌ سه‌ركردایه‌تی سیاسی كورد یه‌كهه‌ڵوێست و خاوه‌ن یه‌ك گوتاری سیاسی و ستراتیجی و یه‌كگرتوو بن و هه‌ل و ده‌رفه‌تی زێڕین له‌ده‌ست نه‌ده‌ن، مێژووش ره‌حم به‌كه‌س ناكات”.

ده‌شڵێت: “(سه‌ربه‌خۆیی كوردستان) یش مافێكی ره‌وا و یاسایی و سروشتییه‌ چ به‌پێی یاسا ئاسمانی و نێوده‌وڵه‌تییه‌كان، چ به‌پێی ئه‌و فه‌لسه‌ و شه‌ریعانه‌ی ئه‌مڕۆ له‌ دونیادا حوكمڕانیان پێ ده‌كرێت. هه‌ر كه‌س و لایه‌ن و ده‌وڵه‌تێك دژی مافی نه‌ته‌وه‌كان بوه‌ستێته‌وه‌، شتێكی ئاشكرا و به‌ڵگه‌نه‌ویسته‌ كه‌ پێچه‌وانه‌ی بیروباوه‌ڕ و فه‌لسه‌فه‌ی حوكمڕانی خۆی و ده‌سه‌ڵاته‌كه‌شی كارده‌كات”.

له‌ لێدوانه‌ نووسراوه‌كه‌یدا بۆ خه‌ندان حاكم قادر ده‌پرسێت: “كام ده‌وڵه‌ت هه‌یه‌ باسی مافه‌كانی مرۆڤ، ئازادیی بیروڕا، پشتیوانیكردنی نه‌ته‌وه‌ و گه‌لانی چه‌وساوه‌ و ژێرده‌ست نه‌كات؟ به‌ڵام كه‌ دێته‌ سه‌ر مافی چاره‌ی خۆنووسینی نه‌ته‌وه‌ی كورد و سه‌ربه‌خۆیی كوردستان، نه‌ك كوێر و كه‌ڕ ده‌بن، به‌ڵكو دژی ئه‌م مافه‌ ره‌وا و یاسایی و دروست و سروشتییه‌ی ئه‌م نه‌ته‌وه‌یه‌ به‌بیانووی جیاجیا ده‌وه‌ستنه‌وه‌، به‌ئاشكرا و به‌بێ دوودڵی و سڵه‌مینه‌وه‌ رایده‌گه‌یه‌نین: مافی چاره‌نووس و سه‌ربه‌خۆیی نه‌ته‌وه‌ و گه‌لی كوردستان، ته‌نیا (گه‌ل) كه‌ سه‌رچاوه‌ی ده‌سه‌ڵاته‌، بڕیاری لێ ده‌دات. ئه‌و كاته‌ش، له‌پێناو جێبه‌جێكردن و سه‌رخستنی ئه‌و بڕیاره‌ پیرۆزه‌ و به‌ئه‌نجامگه‌یاندنیدا، هه‌موو نرخێك ده‌ده‌ین و پابه‌ند ده‌بین به‌ بڕیار و ویستی گه‌له‌وه‌”.

 

…..

 

ئازاد جندیانی : من نامه‌كه‌م بڵاو نه‌كردۆته‌وه‌ به‌ڵام دزراوه‌

 فشار نیوز

ئازاد جندیانی، ئەندامی مەكتەبی سیاسی یەكێتیی نیشتمانیی كوردستان سەبارەت بەو نامەیەی ئاراستەی مەكتەبی سیاسی و سەركردایەتی حیزبەكەی كردووە، بە رووداوی راگه‌یاندووه‌، “من نامەیەكم نووسی بۆ سەركردایەتی و مەكتەبی سیاسی و ئەو نامەیەش من خۆم بڵاوم نەكردووەتەوە، بەڵكوو لەوێوە دزەی كردووە و بڵاوكراوەتەوە”.

ئەو ئەندامەی مەكتەبی سیاسی یەکێتی جەختی لەوەكردەوە، كە “هەڵویستی من هەمان ئەو هەڵویستەیە، كە لە نامەكەدا نووسیومە و شتێكی زیاترم نییە بۆ ئێستا لەسەر ئەو پرسە”.

ئازاد جندیانی لە نامەیەكدا، كە ئاراستەی مەكتەبی سیاسی و سەركردایەتی یەكێتیی كردووە، باسی لەبوونی ئاراستەیەك لەناو حیزبەكەی کردبوو، “بۆ تێكدانی یەكڕیزی ناو ماڵی كوردی”‌و هۆشداریش دەدات، كە “مەسەلەی یەكڕیزی كوردستانی ناكرێت‌و ناشێت بۆ هێندێك ئامانجە تەكتیكی‌و بگرە بۆ هێندێك ئامانج‌و دەسكەوتی حیزبیش لەمەنگەنە بدرێت”.

ئەو ئەندامەی مەكتەبی سیاسی یەكێتی لەنامەكەیدا هەروەها باسی لەوە كردووە، كە “بارودۆخی كوردستان‌و عێراق‌و ناوچەكە بەخێرایی پەرەسەندنی جیاجیا بەخۆوە دەبینێت، بەداخەوە، ئێمە وەكو یەكێتی (بەتایبەت دەستەبژێری باڵای یەكێتی) روئیایەكی روون‌و یەكگرتووی ئەوتۆمان نییە كە بارتەقای ئەم بارودۆخە بێت‌.”

ئازاد جندیانی بە ئاماژەدان بەوەی ، ئێستا بۆچوونی ئەوتۆ لەناو مەكتەبی سیاسیدا هەیە، كە بەقووڵی ناڕوانێتە ستراتیژی یەكڕیزی هێزەكانی كوردایەتی و رایدەگەیەنێت، “ئەم حاڵەتە نەزعەی ئەم، یان ئەو هەڤاڵی مەكتەبی سیاسی (سەركردایەتی) نییە، بەڵكو خەریكە لەئاراستەیەكدا گەڵاڵەو بەرجەستە دەبێت‌و رایەڵی كۆكەرەوەی ئەو ئاراستەیە ململانێ‌و ركابەری نێوان یەكێتی‌و پارتییە”.

ئەو ئەندامەی مەكتەبی سیاسی یەكێتی پێیوایە، “بەڕاستی گوناهە هێزێكی سیاسی گەورەی وەك یەكێتی، لەم دەرفەتەی ئێستادا یەكڕیزی هێزەكانی كوردایەتی بە ئامرازی ناڕاست‌و بەمیتۆدی ناستراتیژی لێكبداتەوەو هیچ حیسابێك بۆ واقیعی نوێی سیاسی لەناوخۆی كوردستان‌و عێراق‌و ناوچەكە نەكات‌و لۆژیكی سیاسی نوێ لەبەرچاونەگرێت. “

ئازاد جندیانی هۆشداری ئەو جۆرە بیركردنەوەیە بۆ سەر داهاتووی یەكێتی دەدات و دەڵێت، “ئەگەر ئەم جۆرە لەبیركردنەوە‌و ئەم شێوازە لەهەیمەنەكردنیدا بەردەوامبێت‌و رووداوەكانیش لەدەرەوەی ئێمە بەخێرایی پەرەبسێنن، گومانم، نییە لەوەی كە كاریگەری بەسەر یەكێتی‌و ئایندەی یەكێتی‌و بەسەر یەكڕیزی گەلەكەمان‌و دواجار بەسەر یەكڕیزی یەكێتیشەوە دەردەكەوێت، چونكە ئاراستەیەكی مەبەستدار بۆ كەرتكردنی ریزەكانی كوردایەتی كاردانەوەی لەهەموو ئاستەكانی یەكێتیدا دەبێت”.