یادی بە خێری کاک برایم جۆڕابچی, کادری بە توانای حیزبی دێمۆکراتی کوردستانی ئێران لە ولاتانی سکاندیناوی، ئەحمەد کاکەمەمی

ڕۆژی ١٩ مانگی ئاپریل ساڵی ٢٠١١ کاک برایم لە وڵاتی سوێد ماڵاوایی لە ژیان کرد.

لە یادی ساڵوەگەڕی ئەم کۆچە ناوەختەدا  بە ڕێزەوە یادی دەکەمەوە و وەک کەسێکی هەر نزیک لە کاک برایم لەم وڵاتە سڵاو بۆ ڕوحی پاکی دەنێرم، بە خۆ دەنازم کە هاوڕێی کەسێک وەک کاک برایم بووم. یادی هەموو خزمەتەکانی دەکەمەوە و ئەوپەڕی ڕێزیان بۆ دادەنێم و هەرگیز لە بیریان ناکەم و لە دڵ و مێشکم دا ئەسپاردەم کردون.

هاوڕیم!

هەمێشە لە یادمی و یادت دەکەم و بۆ کۆچی تۆ و تەنیایی خۆم  هەر دەم خەم دەخۆم. لانی کەم  شەو و ڕۆژ جارێک و چەند جار بە بیرم دا دێتەوە. ئاخر دڵم نەهاتوە ناو و ژمارەی تەلەیفۆنەکەت( ٠٨٧٧٨١٠٦) لە دەفتەری تەلەیفۆنم بسڕمەوە. هەتا دەفتەری تەلەیفۆن بکەمەوە، یەکەم ناو و یەکەم ژمارە کە دێتە بەچاوم، ناوت تۆ و ژمارەی تەلەیفۆنی تۆیە. گەلێک شەوان زەنگت بۆ لێدەدم. جوابت نیە و دەڵێن ئەم ژمارە نەماوە و دەکار نایە. هەر ئەمشەویش زەنگم دا.

کاکی خۆم! تەمەن درێژی بۆ مەمانان دەردێکی گەورە و زامێکی بێ دەرمانە. ئاخر جگە لە ناکامی و خەبەری مەرگی  ڕێبەران، هاڕێیان، خۆشەویستان و ناکامی گەلەکەمان چیمان  باربوویە؟ هەموو ژیانمان هەر پەکوپەکویە.  خۆسکە بە خۆت سەر بەرزانە  ڕۆیشتی،  داخ بە دڵم بە بێ کسی چووی و لە من بێ کەستر. تۆ منت هەبوو، من کەس. هەر یادت بە خێر، هەر یادت بەخێر!

کاک برایم جۆرابچی لە دەرەوەی وڵات یەکێک لە کادرە دیپلۆماتکارەکانی هەرە دیار و سەرکەوتووی حیزبی دێمۆکراتی کوردستانی ئێران بوو. ئەو مرۆڤێکی بە فەرهەنگ و تەواو ئاشنا بە فەرهەنگی ئوروپایی، نەک هەر هەموو هەڵس و کەوتی  شیاوی کەسێکی دیپڵوماتیک بوو، بەڵکو ڕوواڵەت و سیمای نمایانگەری ئەم لێهاتووییە بوو، هەر دەتکوت خوا بۆ دیپڵۆماتی ئافراندوە. کاک برایم ئەوەندە بە سەر زمانەکانی سوێدی و نۆرویژیدا  زاڵ بوو، هەر وە بزانە زمانی زکماکی بوون. لە بەکار هێنانی واژەی پڕ مانا و بەجێی سیاسی و کۆمەڵایەتی بە کات و ساتی خۆی لێزان و شارەزا و مەجلیس ناس بوو.. ئەدای واژە و نیگا و هەرەکەی کەسایەتی کاک برایم بۆ کەس و کەسانی بەرانبەری جێگای سەرنج و ئافەرین بوو، تەنانەت تۆنی دەنگی لە بیستن گەلێک خۆش دەهات.

کاک برایم ئاشنایی و نزیکایەتی لە گەڵ کار بەدەستانی دەوڵەتی سوێد و سەرانی حیزبەکان، بە تایبەتی حیزبی سوسیال دێمۆکراتەکانی سوێد لەو پەڕی خۆیدا بوو. وا بزانم هەر ئەویش یەکەم کەس بوو کە (بەرنامە و پڕۆگرامی ئەم حیزب)ە هێنایە سەر زمانی فارسی و کوردی. کاک برایم نەک هەر لە نێو کۆمەڵی کوردانی پەنابەر لە سوێد بەڵکۆ دەکرێ بڵێین یەکێک لە کەسە باوەڕ پێکراوەکانی ڕۆژهەڵاتی ناوین بوو.

ئەمەش لە لایەک توانایی و ئیسعداد سیاسی و کەسایەتی خۆی بوو و لە لایەک دیکە وەک نوێنەر و باوەر پێکراوی دوکتور قاسملووی نەمر دەناسرا. هەر ئەوەش بوو لە چاو هەموو نوێنەرایەتی حیزبەکانی کوردستانی و ئێرانی و دەولەتانی ناوچە. ئەو لە دەورانێکی تەنگی سەختگیری پەنابەر پەزیریی، توانی جگە لە دەیان پێشمەرگەی تاک و جووت، چەندین گروپی پێنج ، هەفت ، پازدە… کەسی پێشمەرگەی بڕینداری مەیدانەکانی خەباتی ڕزگاری بە سواری تەیارە لە فرۆکەخانەی ئارلاندا(ستۆکهۆڵم) دابەزێن و لە کورتترین ماوەش دا مافی پەنابەرییان بۆ وەرگرێت و دایان مەزرێنێت. بە کار و باری نەخۆشخانە وپزیشکیان ڕابگا. وەک باوک  و برا ڕێ وشوێنی ژیانیان پێشان دا. بە کار  وئەرکی ڕۆژانەی ژیان و مەکتەب و دەرس خوێندن و فێربوونی زمانیان ڕابگات.

لە بیرمە و لە بیریانە گەلێک جار لە وەخت و بێ وەخت لە ماڵیان وەژوور دەکەوت و پاک و خاوێنی خۆیان و ژووری ژیان و تەنانەت یەخچاکەکانیشیانی بەسەر دەرکردنەوە. بۆ ئەوە بزانی کەم  وکوڕی و پێداویستیان چییە.

کاک برایم لە ژیانی شەخسیدا کەسێک بە تەوازع، میوانگر و میوان دۆست و بە دڵ و دەرون بوو. لە خزمەت بە گەڵ و نێشتمتان و حیزبەکەی چی لە توانا دا با، پێشکێشی دەکرد و دریغی نەبوو. موخلیس و خزمەتگوزارێکی بە ئیمان، کادڕیکی بە ناو و نیشان.

سلاو لە ڕۆحی پاک و گەورەی کاک برایم و هەموو شەهیدانی و ڕێبوارانی ڕێگاری بەختیاری گەلەکەمان.

 

ئەحمەد کاکەمەمی

2016-04-19