کێو ترەکی و مشکی بینی (کوە موش زاید)، هەڵوێستی حدک لە بارەی هەڵبژاردنەکانی 7ی ڕەشەمەی داهاتووی ئێران، محمدشەریف خاکساری

سەرەنجام حدک وەک پاشمەڵا و قڕرەی قڕرانی  یاریکەری  گۆڕەپانی سیاسی لە ناو خۆ و لە دەرەوەی وڵاتی ئێرانی بەڵا لێدراو “هەڵوێستی یەکجارەکیی ئەم حیزبە لە سەر ئەم هەڵبژاردنانە…”

بۆ گەلانی ئێران و بە تایبەتی دانیشتوانی ڕۆژهەڵاتی کوردستان ئاشکرا کرد.

بەیانییەکی بێگانە لە ئەدەبیاتی حیزبی دێمۆکرات، لاواز لە باری ڕێزمانی و داڕشتن، فەقر و هەژاری لە باری واژەی سیاسی و کۆمەڵاتی… سەفسەتە و ڕاڕایی و ناڕوونی لە باری هەڵوێستەوە، لاواز و بێ ناوەرۆک هەتا ڕادەی  ئینشای قوتابییەکی مامناوەندی پۆلەکانی ناوەندی …  هەر وەبزانە  کەسێکی کوردی نەزان لە مەتنێکی لاوازی فارسییەوە وەرگێڕاوەتەوە سەر لاوێژەیەکی زمانی کوردی!

بەیانییەک کە هیچ ڕەنگ و بۆ و باس و  مافێکی بەسەر مەسەلەی کوردەوە نیە و هەر وەبزانەوە ئەنجومەنێکی سێنفی لە شارەکانی وەک کاشان و دامغان… بۆ  خەڵکی شارەکەی بڵاو کردۆتەوە.

بەیانییەکی ٧ پاراگراف و  ٦٩ دێری بێ ناوەرۆکی  خوێنەر شەکەتکەر کە لە ئاکام دا تەنیا دوو گۆتەی پێیە. (دەنگدان بە قازانجی کاندیدا باشەکە و دەنگ نەدان بە کاندیدە خەراپەکە)یە.

ئێمە بۆ ئەوە خوێنەری ماندوو نەکەین زۆر بە کورتی چەند دێری بەیانییەکە هەڵدەبژیرین و بە هۆی ژێرخەت دیاریان دەکەین و کورتە روونکردنەوەیەک پێشکێش دەکەین.

 (…کۆماری ئیسلامیی ئێران …. ملی بۆ هاتنەسەرکاری سەرکۆمارێک بە گوتارێکی تا ڕادەیەک جیاوازلەوانی پێشووو پاشەکشە لە سیاسەت‌و هەڵوێستە دەرەکییەکانی ڕابردووی خۆی ڕاکێشا…).

(...چاوەڕوان دەکرا تا ڕادەیەکی بەرچاو ڕێگا بۆ بەشداریی ڕیفۆرمخوازان‌و دەنگی جیاوازی دیکە لە دەسەڵاتی سیاسی‌دا‌ بکاتەوە)…

 

(…دیتمان لە ئاستی ئێران‌دا، شانسێکی ئەوتۆی بۆ چوونی ڕیفۆرمخوازان‌و کەسانی سەربەخۆ لە قۆڵەکانی نێودەسەڵات بۆ نێو هەر دوو مەجلیس نەهێشتووەتەوە، لەپارێزگەکانی ڕۆژهەڵاتی کوردستانیش، سەلاحیەتی زۆربەی نزیک بە تەواوی ئەو کاندیدایانەی ڕەت کردووەتەوە…).

 

خوێنەری بەڕێز دەبینی جگە لە پاڕانەوە و  لالایی بۆ بە قەولی  خۆیان ” ڕیفۆرمخوازان‌”  چی دیکەت بەرچاو دەکەوێ. ئەو ” ڕیفۆرمخوازان‌”ەی بۆ هەموو تاکێکی گەلانی ئێران ناسراون و  لانی کەمی لە ٢٠ و چەند ساڵ کارنامەی سەرۆک کۆماربوونی خۆیاندا ئیمتیحانی خۆیان داوە. سەردەستەی ” ڕیفۆرمخوازان‌” ئاخوند ڕەفسەنجانی،  شیخ مەحەمەدی خاتەمی و شێخ  حەسەنی روحانی و موهەندیس محسن موسوی(سەرۆک وەزیرانی دەورانی ڕەشی شەڕ و قەڵاچۆی کوردستان و کۆمەڵکوژییەکانی و شەڕی ئێران و ئێڕاق) .

رەفسەنجانی: شەهید کردنی ڕێبەرانی کورد دوکتور قاسملو و دوکتور شەرەفکەندی، دوکتور بەختیار، کازم رەجەوی… لە دەرەوەی وڵات  و دەیان و سەدان ڕیبەری سیاسی کورد و  ئێرانی لە ژوورەوە و دەروەی وڵات. سەرکوتی خەباتی سیاسی و مەدەنی لە کوردستان و ئێران، ئەمنییەتی کردنی کوردستان… تاوانباری یەکەمی دادگای میکونوس، تەقاندنەوەی بارەگای یەهودیان لە ئاڕژانتین…

خاتەمی: کوشتاری زەنجیرەی خەباتکارانی کورد و ئێرانی، کوشتنی داریوش فروهێر و پەروانەی ئەسکەندەری، زیندانی کردنی بە کۆمەڵی ڕەخنەگرانی نیزام، هێڕشی نیزامی بۆ سەر ئەحزابی کوردی و ئێرانی لە وڵاتی دراوسیە، نائەمنی نانەوە لە ولاتانی درواسیە و جیهان، ، گرانی و نائەمنی… بەستنی ڕادیۆ دەنگی کوردستان، بەلاڕێ دا بردنی ئەفکاری جیهانی لە سەر ناوەرۆک و فەلسەفەی نیزامی کۆماری ئیسلامی…

روحانی: قایم کردنی فەزای ئەمنییەتی کوردستان، دەخالەت ڕاستەوخۆی لەشکریی  و وێران کردنی وڵاتی سوریا و کوشتاری بە سەدان هەزار هاووڵاتی و بریندای کردن و ئاوارە کردنی بە میلیۆنان خەڵک لە ماڵ و زیدی خۆی…

دەخالەت و  سازکردنی شەڕی نێوخۆیی لە یەمەن و وێرانی و برسییەتی… کوشتاری بە کۆمەڵی “موجاهیدینی خەڵکی ئێران” لە سنووری پێتەختی عێراق، پێکهێنان و پشتیوانی لە داعش  و کوشتاری بە کۆمەڵی خەڵکی شنگار، شەڕ هێنانە نێو ماڵ و خاکی کورد. دامەزراندنی “حشدی شەعبی” وەک شاخەی سپای پاسدران لە ئێراق و باشووری کوردستان و سەدان و هەزاران گروپی نەیار و بنکە و بنیاتی جاسووسی هەر لە باشووری کوردستان… نانەوە فیتنە و چەند بەرەکایەتی لە دەستەڵاتی سیاسی و ئایینی باشووری کوردستان و خستنە مەترسی دەسکەوتەکان.

 سازان لە سەر مافی گەلانی ئێرانی دەگەڵ هارترین دەستەڵاتی داپڵۆسێنەری سەرەڕۆ و سەرمایەداری نێو دەوڵەتی بۆ ئەوە بتوانی هەرچی زۆرتر سەرکوتی گەلانی ئێران و بە تایبەتی گەڵی کوردستان بکات و لە ناوچەدا ئاژاوە بنێتەوە.. بوون بە هۆی داخستنی ڕادیۆ و تەلەڤیزیۆنەکانی کوردی … کارنامەی ئەم حەزرەتانە بۆ هەموو تاکێکی کورد و ئێرانی وەک مانگە شەو ڕوونە و نە گەلێک، سەت جار لە کارنامەی “مەحمودی ئەحمەدی نەژاد“ی ئوسولگەرا تاریکتر، وەحشیانەتر،  نائینسانی تر و درۆزنانەترە…

بە پێچەوانەی ئەم  حەزرەتانەی کە ڕێبەری حدک بە “ڕیفۆرمخوازان‌” ناویان دەبات و بە نیشانی ڕەنگی سەوز لە کۆنگرەکەیدا پشتیوانیان لێ دەکات و بە ڕووی زەردەوە بۆیان دەپاڕێتەوە،  لە دەورانی “ئەحمەدی نەژاد” لە چاو دەورانی ئەم حەزرەتانەی حدک کەمترین کوشتاری کورد  و دەخالەت لە کاری ئەحزابی کوردی و خەڵک کوردستاندا کراوە تا توانی خزمەتی بە گوندنشینان کرد، یارانەی  بەرهەم هێنا، تا توانی بۆ بەربەرەکانی دەستەڵاتی سپای پاسدارن و شەخسی خامەنەیی تێکۆشا… لانی کەمی ئەو  پێێ وا بوو سەرۆک کۆماری ئێرانە نەک سەرۆکی چایخانەی ڕێبەر… ئەمەیە کارنامەی سەرۆک کۆمارانی ” ڕیفۆرمخوازان‌” و سەر کۆماری ئوسولگەرا…  وەک  فارس گوتەنی”بەد لە بەدتەر باشترە”

حدک بە قەولی خۆی حیزبی میراتگری ٧٠ ساڵ خەبات! تۆ پشتیوانی لە کام ئوسول و بەندی کۆماری ئیسلامی ئێران دەکەی؟ بۆ هەموو تاکێکی کورد لە م جیهانە و بە تایبەتی لە ڕۆژهەڵاتی کوردستان ئاشکرایە کە لە ڕاست مافی کورد و ئازادی و دێمۆکراسی لە ئێراندا وەک ئوسول هیچ جیاوازیەکی لە نێوان” ڕیفۆرمخوازان‌“ی ئێوە و ئوسولگەرایانی خامەنەیی دا نیە.

جاران حیزبی دێمۆکرات خۆ بە ڕێکخەری و رێ نیشاندەری خەبات و ویست  و داخوازییەکانی گەلی کورد دەزانی و خەتی پێدەدان و ڕێنمایی دەکردن، پێشەنگ و پێشڕەو بوو… ئێستا هەڵویستی  حدک تەنانەتی لە هەڵوێستی گەلێک کەسایەتی تاکی کورد و ئێرانی هەر لە ناوخۆی وڵات و لە “بەرەی یەکگرتووی کورد ” لە  ناوخۆی وڵات کە ملی لە ژێری گیوتینی دەزگای ئەمنیەتی سیاسی و  مەزهەبی ئێراندایە دە جار و سەت جار لە دواتر و سازشکارانەترە. تەنانەت لە پلەی تەسلیم بوون نزمترە و کەوتۆتە ئیفلاس.

حدک باس لە هەڵبژاردنی “دەیەمین خولی هەڵبژاردنی مەجلیسی شووڕای ئیسلامی‌و پێنجەمین خولی هەڵبژاردنی مەجلیسی خوبرەگانی ڕەهبەری…” دەکات.

ئەوەڵەن” هەڵبژاردنی مەجلیسی خوبرەگانی ڕەهبەری” چە پێوەندیەکی بە کوردەوە هەیە کە حدک بۆی دەپاڕێتەوە. بە پێی یاسای بنەڕەتی کۆماری ئیسلامی ئێران و یاسا تایبەتییەکانی ئەم مەجلیسە نەک هێج کوردێک(شیعە، یا سوننە) هێجکام لە گەلانی ئێڕان(بەلوچ، تورکمەن، عەرەب…) مافی چوونە ناو ئەو مەجلیسەیان نیە. ئەم باسە جگە لە پشتیوانی و پاڕانەوە بۆ ئاخوند”رەفسەنجانی” قاتڵی ڕێبەرانی کورد و نەوەی خومەینی فیتوادەری قەڵاچۆی کوردستان چی دیکەی تێدایە!!!؟؟؟

دووهەمەن کە دەزانێ لە ئێران”…سەرەڕای ئازادنەبوونی هەڵبژاردن‌وهەموو ئەو بەربەست‌و کەموکووڕییانەی  لە وڵاتی ئێران لە سەر ڕێی هەڵبژاردنی ئازاد هەن…).

  و ” سەلاحیەتی زۆربەی نزیک بە تەواوی ئەو کاندیدایانەی ڕەت کردووەتەوە…).

“… کەسانی سەربەخۆ لە قۆڵەکانی نێودەسەڵات بۆ نێو هەر دوو مەجلیس…”.

ئاخر حیزبی سیاسی  بە ناو ئۆپۆزیسیۆنی نیزامی کۆماری ئیسلامی و مافخوازی گەلی کوردستان… لەم ٣٧ ساڵی دەسەڵاتی کۆماری ئیسلامی دا کەی  “کەسانی سەربەخۆ” ڕێگایان پێدراوە  نەک هەر بچنە ناو ئەو دوو بە ناو مەجلیسە و تەنانەت دەزگایەکی  بەڕێوەبەری کەم بایخیش  جگە لە ژوورەکانی زێندانی تاکەکەسی!!!

یانی شناخت و بی ئاگاهی لە سە ر نیزام و فەلسەفەی وڵایەتی فەقیهی بۆ ڕێبەری حیزبێکی  خاوەن ٧٠ ساڵ خەبات ئەوەندە لاوازە و ئارشیو و حافیزەی مێژووی ئەوەندە بەتاڵ و هەژارە!!!

ئادەی دەفتەری سیاسی حدک ئەم باشانەی کە خەڵک و بە تایبەتی لایەنگرانی خۆتانی بۆ هان دەدەی دەنگیان پێ بدەن کامانەن؟؟؟

دەرکەوتوە کە ڕێبەری حدک و بە تایبەتی سکرتێری ئەم ڕێکخراوە هیچ بڕاویەکی بە ئوسولەکانی هەلبژاردنی دێمۆکراتیک نیە. ئەوەتا یەک دوو هەفتە بەر لە ئێستا کۆنگرەی سێهەمی خۆی بەست. سەرەڕای ئەم حەمکە چەپڵەڕێزانەی بەرچاوی تەلەڤیزیۆنەکان و هەزینەیەکی    نادیاری بە خەسار چوو بۆ کۆکردنەوەی ئەندامان لە دەرەوە و لە باشووری کوردستان ئاکام و بڕیارەکانی ئەم کۆنگرەیە جگە لە لابردنی خاڵی بە تاڵی دوو دەورەیی سکرتێر خێری چ بوو؟ ئایا ئەم حیزبە لە ماوەی ٤ ساڵی نێوان دوو کۆنگرە نەی توانیوە  ٤ کادری لێهاتوو پەروەردە بکات، یا چوار کادری لێهاتوو لە نێو خۆی ولات بێنێتەدەر کە بتوانن بێنە ناو ڕێبەری؟ ئایا هەموو ئەندامانی ڕێبەری ئەم حیزبە لە ئەرکەکانیاندا ئەوەندە سەرکەوتوو بوون کە نەدەکرا پلەیەک بێنە خوارتر… ئەوەندەی لە ڕۆژهەڵات باس دەکرێت لە نێوان ئەم دوو کۆنگرەیەدا  لانی کەمی چوار پێنج کادری ڕێبەری بە هۆی جۆراجۆر یا پەڕیوەی هەندەران بوون، یان وازیان لەم ڕیکخراوە هێناوە. ئەی بۆ جێگای ئەو لێهاتوانە  پڕ نەکراوە؟  لە کۆنگرەی ١ و٢ دا بۆ ڕازی کردنی ئەندامان بە کەیفی خۆیان ڕادەی ئەندامانی ڕێبەریتان بە موزایەدە دادەنا… پێچەوانە ئێشتاش بۆ رازی کردنی مەیلی سکرتێر  تا دەستی دەڕاوت ڕادەی ئەندامان ڕێبەری نەک هەر بە موناقسەش دانان بەڵکو پاشگوێ دەخرێت  وهەر باسیشی ناکرێ. وەک لەم سەت ساڵی دواییدا رەسم باو بووە و یەکێک لە ئەرکەکانی کۆنگرەی حیزبەکانی چەپی چەپی و ڕاستی ڕاستی ئەم جیهانە هەڵبژاردنی ڕیبەری حیزبەکە بووە. کۆنگرەی حدک بۆ هەر نەوێرا باسیشی لێ بکات!!!

ئەلحەق ناحەقیشی نیە لە قەڵای پۆڵایینی کۆیە دا نە مێشێکی میوانە و نە مشکێکی لە دیوەخانە!!!

 ئەم هەڵوێستەی حیزبێک کە خۆی بە میراتگری حیزبێکی ٧٠ ساڵە خەباتگێر دادەنێ، چ جیاوازی و ڕێ نیشاندەرییەکی لەگەڵ هەڵوێستی لالۆ شامرادی هەورامی و  خاڵۆ  بارامی ئیلامی و مامە حەمەی بۆکانی و  حەسۆی شکاک… هەیە. مناڵێکی  دوو سێ ساڵانەش فامی ئەوەی هەیە شتی تاڵ نەخوا و شتی شیرین بخوات. بە باشی و بە فامەوە جیاوازی نێوان دایک و باوک و کەسانی نەناس و ناسراو دەبنێ.  

بە گشتی ئەم هەڵوێستە ڕاڕایەی حدک  دوو ئامانج دەپێکی. یەکەم پشتیوانی لە کولییەتی نیزامی ولایەتی فەقیهی. دوو شکاندی کۆ دەنگی ئۆپۆزیسیۆنی کورد  و کوردستانی.

داد لە بێ دەنگی و هاوار لە پڕ ڕەنگی!

محمدشەریف خاکساری

نێوخۆی وڵات   ١ی ئەسفەندی ١٣٩٤

 

بابەتی پەیوەندی دار:

هاوڕێیانی پێشوو هەڵبژاردن تەحریم ناکەن.

 

شانۆی هەڵبژاردنەكان لە دەلاقەی وتەكانی خامنەییەوە، مستەفا هیجری

هەڵبژاردنی پەرلەمان و هەڵوێستە جیاوازەكان لە ئێران و كوردستانی رۆژهەڵات، شەریف فەلاح

ڕاگەیاندراوی پارتی سەربەستیی کوردستان، لە پێوەندی بە هەڵبژاردنەکانی کۆماری ئیسلامی ئێران.

دەنگدان یان بایکۆت ؟!، مەلا برایمی مەجید پور

کڵاوێکی شەرعیی بۆ هەڵبژاردن!، د. کامران ئەمین ئاوە

گاڵتەجارێک بە ناوی هەڵبژاردن لە کۆماری ئیسلامی دا. رەحیم رەشیدی

فس فس پاڵەوان و گۆڕەپانی چۆڵ. عومەر غولامعەلی

گاڵتەجاڕی بە ناو هە ڵبژاردن، فەرزاد جلوەزان

هەڵبژاردن یا هەڵاواردن . م. ئەمین بایەزیدی(خەراپە)

بڕیاری سیاسی و هەڵوێستەکانی “حدکا” بەرئەنجامی ڕاوێژ و تێڕوانینی وردن!، محمد سلێمانی

دیسان بەزمی هەڵبژاردن لە ئێران! ناسر باباخانی

هەڵبژاردنەکانی “پەرلەمانی لە ئێران” لە نێوان بەشداری کردن و نەکردندا

خەمۆکیی سیاسیی، “بە‌ بۆنەی دەهەمین دەوری هەڵبژاردنی “مەجلیسی شواری ئیسلامیی ئێران”، د. کامران ئەمین ئاوە

هیوادارم بە ئەنقەست نەبێ، تەیموور مستەفایی

کوردستان و ئۆینی هەڵبژاردن لە سیستمی ویلایەتی فەقیهیی “کۆماری ئیسلامی” دا عومەر غولامعەلی

شرکت در انتخابات با افتخار بە حفظ کدامین دستاورد ؟، صدیق بابایی

وتووێژی کاک خالید عەزیزی و کاک عەبدوڵا موعتەدی سەبارەت بە هەڵبژاردن، بەڵام کۆمەڵە هەڵبژاردنی تەحریم کرد.  

ڤیدیۆ

…

دەفتەری سیاسیی حیزبی دێموکراتی کوردستانی ئێران، لە بەیاننامەیەکدا هەڵبژاردنەکانی داهاتووی مەجلیسی لە ئێراندا تەحریم کرد.

دەقی بەیاننامەکە:

ڕێژیمی کۆماری ئیسلامی لە ٧ی ڕەشەمەی ١٣٩٤ی هەتاویدا، دەیەوێ هەڵبژاردنی خولی دەیەمی مەجلیسی بەناو شوورای ئیسلامی و هەروەها خولی پێنجەمی مەجلیسی خوبرەگان بەڕێوە ببا و لەو پێناوەدا، لە کۆتاییەکانی مانگی سەرماوەزەوە دەستی کردووە بە ناونووسینی بەربژێرەکانی ئەندامەتیی ئەو مەجلیسانە. ڕێژیم وەکوو هەمیشە لە پرۆسەیەکی چەند مانگەدا، هەم پێش لە دەسپێکی ناونووسین و هەم لە دوای ناونووسین و باسی لەفیلتێردانی بەربژێرەکانی هەڵبژاردن و تا دوایی، کە پەردەی کۆتایی شانۆکە بە کۆتایی‏هاتنی دەنگدان و دەستێوەردانی سندووقەکان بەئاکام دەگا، کایەیەکی چەندپات کراوە بەڕێوە دەبا و بۆ هاندانی خەڵک بۆ ئامادە بوون لەو شانۆیەدا و بۆ گەرمکردنی تەندووری هەڵبژاردن، باس و بابەتی جۆربەجۆر دەورووژێنن و بە دروستکردنی کەشی ئێحساسی لە نێو کۆڕ و کۆبوونەوە و گرووپە هەمەڕەنگەکان لە ئێراندا، دەیانەوێ خەڵک وا تووشی وەهم ببن کە ڕەنگە هەڵبژاردنی ئەم جارە هەندێک شت بگۆڕێ.

هەرچەند بۆ کەسانی شارەزا هەر لە سەرەتای هاتنە سەرکاری ڕێژیمەوە دیاربوو، بەڵام ئەزموونی چەند دەیە دەسەڵاتی سەرەڕۆی کۆماری ئیسلامی، هیچ ناڕوونییەکی نەهێشتۆتەوە و بەڕوونی سەلماندوویە کە ئەم ڕێژیمە لە ئامرازی هەڵبژاردن بۆ دووبارە بەرهەمهێنانەوەی مەشرووعیەتی چەواشەکراوی خۆی کەڵک وەردەگرێ و هەڵبژاردنی ڕاستەقینە و دێموکراتیک لە ئێرانی ژێر دەسەڵاتی کۆماری ئیسلامیدا، بوونی نیە.

 

ئەوەی لە دەسەڵاتی کۆماری ئیسلامی تێگەیشتبێ، دەزانێ کە ئەم ڕێژیمە لە سەر بنەمای ویلایەتی فەقیه، کە نوێنەری خەڵک نیە، بەڵکوو خۆی بە خاوەنی خەڵک دەزانێ دامەزراوە و ئەم دەسەڵاتی وەلیی فەقیهە، لە ڕێگەی زەبر و زەنگی سپای پاسداران و دەزگا ئیتلاعاتییەکانی و لە ڕێگەی دەستگرتن بە سەر سەروەت و سامانی وڵات و دابەشکردنەوەی بەپێی پێویستییەکانی ڕێژیم و هەروەها لە ڕێگەی دەزگای ڕاگەیاندنی بەربڵاو لە تلویزیۆنەوە بگرە تاکوو مینبەری مزگەوتەکان، خۆی دەسەپێنێ و درێژە بە مانی دەدا و لە ڕاستیدا ئەوەی کە سەرچاوەی بنەڕەتیی دەسەڵات و حکوومەت بێ، لە ئۆرگانە ئینتسابییەکاندا کۆ کراونەتەوە و هەموویان لە ژێر دەستی وەلیی فەقیهدا بەڕێوە دەبرێن و بەپێی یاسای نامەشرووعی کۆماری ئیسلامی، ڕێبەری ڕێژیم خاوەنی خەڵک و خاوەنی هێز و خاوەنی بڕیاری ئەساسی لە نێو سیستمدایە.

بەو پێیە باسی هەڵبژاردنێکی ڕاستەقینە لە ئێراندا، هەر لە بناخەوە لەجێی خۆیدا نیە، چوونکە ناوەندەکانی دەسەڵات ناخرێنە هەڵبژاردنەوە و تەنیا پۆستە لاوەکیە بێدەسەڵاتەکانن کە لە سیناریۆیەکی چەواشەکراودا، شانۆگەریی هەڵبژاردنیان بۆ بەڕیوە دەچێ.

 

لەم پێناوەدایە کە شایەتی ئەوەین، هەڵبژاردن بۆ سەرۆک کۆماری لە ئێرانی ژێردەدسەڵاتی ئیسلامیدا بەڕێوە دەچێ، بەڵام هەموو سەرۆک کۆمارەکان لە کۆتاییدا بەو ئاکامگیرییە دەگەن کە بە وتەی خاتەمی، جگە لە تەداروکاتچییەکی ویستەکانی ڕێبەر، کاریگەرییەکی ئەوتۆیان نەبووە.

 

هەر وەها هەڵبژاردنی مەجلیسی خوبرەگان بەڕێوە دەچێ، کە بەپێی یاساکانی ڕێژیمیش بێ، دەبێ چاوەدێری بە سەر کارەکانی ڕێبەردا بکەن و ئەوان ڕێبەر دیاری بکەن، بەڵام گەر بە ئەسپاییش باس لە نەک ڕێبەر، بەڵکوو تەنیا ئەو ئورگانانەی کە فەرمان لە ڕێبەر وەردەگرن بکەن، هەڕەشەیان لێ دەکەن و بێدەنگ دەکرێن، کە نابێ ڕۆژێک لە ڕۆژان بیر لەوە بکەنەوە کە پێ لە بەڕەی خۆیان زیاتر ڕاکێشن!

 

لە نێو دامەزراوەکانی ڕێژیمدا، مەجلیسی ڕێژیم لە هەموویان کارتۆنیترە. بە هەموو شێوازێک پڕوپاگەندەی بۆ دەکەن کە جیناح و دەستە و تاقمی جیاواز لە ڕێژیمدا هەیە و لە سەر کورسیی مەجلیس گوایە ڕەقابەت دەکەن، بەڵام مەجلیس تەنیا دەبێ بە شوێنی کۆبوونەوەی تاقم و دەستە جیاوازەکان و وەرگرتنی ئیمتیازاتی مادی بۆ کەسەکان و ئەوەی یاسا و بڕیاری چارەنووسساز بێ، ڕێگەیان نیە کە باسیشی بکەن و گەر خودای نەکردە ڕۆژێک لە ڕۆژان، یاسایەکی بە تۆزقاڵێک لەگەڵ ویستی ڕێبەری ڕێژیم جیاواز بێ و ئەو مەجلیسە بیەوی ئەو بڕیارە پەسند بکا، وەک دەورانی مەجلیسی شەشەمی ڕێژیم، بە فەرمانێک بێدەنگیان دەکەن و سەرۆکی مەجلیسیش دەڵی؛ “حوکمی حکوومەتی” هاتووە و نابێ چیدی باس لەو شتە بکرێ!

 ئەوانە هەموو سنووری ئیختیاراتی نیهادە بەناو ئینتخابییەکانی نێو ڕێژیمی ویلایەتی فەقیهین، کە بەپێی یاسای ڕێژیم و بەپێی عورفی حکوومەتی و بەپێی ڕەوتی دەسەڵاتداریی، هیچ دەرەتان و دەرفەتێک بۆ هیچ ئیرادەیەکی جیاواز لە ئیرادەی وەلیی فەقیهی تێدا ناهێڵنەوە و هەرکاتیش بەپێویستیان زانی، سوپای پاسداران هەڕەشەیەک دەکا تاکوو دەنگە لارەکان ڕاست بکەنەوە و “بەسیرەتیان” بۆ بگێڕنەوە.

 جیا لە بێ‏دەسەڵاتیی ئەو نیهادانە، بوونی شوورای نیگەهبان کە لە باتی هەموو نەتەوەکانی ئێران بیر دەکاتەوە و بڕیار دەدا، بازنەیەکی دیکەی بێ‏دەسەڵات کردن و بێ‏نێوەڕۆک کردنی نیهادە بەناو ئینتیخابییەکانی ئێرانی ژێر دەسەڵاتی ویلایەتی فەقیهیە. شوورای نیگەهبان بەپێی یاسای ناڕەوای کۆماری ئیسلامی، دەسەڵاتی “نەزارەتی ئیستیسوابی” پێ‏دراوە کە دەتوانێ هەم بەسەر ڕەوتی هەڵبژاردندا چاوەدێری بکا و هەم بەربژێرەکان دیاری بکا و هەم براوەی بەناو هەڵبژاردن دیاری بکا و لە ڕاستیدا هەڵبژاردن لە ئێراندا هەڵبژاردنی نوێنەرانی خەڵک نیە، بەڵکوو دیاریکردنی مۆرەکانی جێگاپەسندی ڕێژیمە بۆ نێو ئۆرگانە فۆرمالیتە و ڕواڵەتییەکان.

 

لە ڕەوتی هەڵبژاردن و پڕوپاگەندەی بەربژێرە جێی پەسندەکانی شوورای نیگابانیشدا، دووبارە دامودەزگا نیزامی، ئەمنیەتی، ئابووری، ڕاگەیاندنی و مینبەری مزگەوتەکانی ژێردەستی ڕێژیم، وەگەڕ دەکەون تاکوو لە نێو بەربژێرەکانیشدا ئەوەیان کە زۆرتر بەدڵی ڕێبەری ڕێژیم و دارودەستە و تاقمەکانی نێو ڕێژیمە، خەڵکیان بۆ کۆبکرێتەوە و دەنگی چەواشەکراوی خەڵک بۆ لای ئەوان بێ. لە کۆتایی دەنگدانیشدا، دووبارە ئەوە شوورای نیگابانە کە دەنگەکان دەژمێرێ و هیچ چاوەدێرییەکی بێلایەن بوونی نیە، تاکوو لانیکەم دەنگەکان بە دروستی بژمێردرێن و ئەوەی بەدڵیان بێ و بە پێویستی بزانن، وەک براوەی شانۆگەرییەکە ڕایدەگەیەنن.

 

بەم هۆکارانەوە کە پرسی هەڵبژاردن لە ئێراندا هیچ پێوەر و پێوانەیەکی ئازاد و ڕاستەقینە و دێموکراتیک بەخۆیەوە ناگرێ و خەڵکیش باوەڕیان پێی نیە و ڕێژیم لە هەموو بەناو هەڵبژاردنەکانیدا، لەگەڵ قەیرانێک بە ناوی قەیرانی ڕوو وەرگەڕانی خەڵک لە سندووقەکان بەرەوڕوو دەبێ، بۆیە لە هەموو قۆناغەکانی هەڵبژاردندا کە تاکوو ئێستا ٣١ هەڵبژاردنی جۆربەجۆری بەڕێوە بردووە، بەردەوام پیلانی گێڕاوە و پەلەقاژەی کردووە، تاکوو خەڵک لە بەناو هەڵبژاردنەکاندا بەشداری بکەن. پیلانەکانی ڕێژیم بۆ ئەو مەبەستە هەر لە دروستکردنی دەنگۆی جۆربەجۆرەوە کە وا نیشان بدا لەم هەڵبژاردنەدا شتێکی جیاواز دێتە ئاراوە دەست پی دەکا و تا دەگاتە دروستکردنی جۆرە کێبەرکێیەکی ناواقیعی لە نێو خەڵکدا کە بە گرووپ و چین و توێژ و سەلیقەی جیاوازەوە، وا بزانن نوێنەری ڕاستەقینەی خۆیان دیاری دەکەن و گەر ئەوان نەیکەن، گرووپی ڕەقیب بەشەکەی ئەوان داگیر دەکەن. ئەمە جیا لەوەیە کە بە هەموو شێوەیەک کە بۆیان بکرێ، بە هاندان و تەماح وەبەرنان و بە هەڕەشە، خەڵک بۆ چوونە سەر سندووق پاڵ پێوەدەنێن.

 لەم دەورەیەی بەناو هەڵبژاردنی مەجلیس و مەجلیسی خوبرەگانیشدا، دوای شکستی گەورەیان لە بواری پەروەندەی ناوکیدا، کە لە بەرانبەر ڕۆژئاوادا تەسلیم بوون و چۆکیان دادا، هەم بۆ شاردنەوەی شکستەکەیان و هەم بۆ بازارگەرمیی هەڵبژاردن، هەندێ دەنگۆیان لەنێو خەڵکدا بڵاو کردەوە کە هیچ نیشانێک لە ڕاستیی تێدا نیە، چوونکە لە ئەساسدا هیچ شتێک لە ئێرانی ژێر دەسەڵاتی کۆماری ئیسلامیدا، لە ڕێگەی هەڵبژاردنەوە گۆڕانی بەسەردا نایەت وهیچ دەرەتانێک بۆ بەشداریی ڕاستەقینە و دێموکراتیکی خەڵک لە دیاریکردنی چارنووسی خۆیان و وڵاتدا نیە. بڕیاری چارەنووسساز لە شوێنی دیکە دەدرێ کە گاڵتەی بە نیهادە بەناو ئینتیخابییەکان دێ.

 

لە کوردستانیشدا، چەندین بەرابەری هەموو ئەو چەواشەکارییانەی ڕێژیم لە شوێنەکانی دیکە دەیکا، بە ئەنجامی دەگەیەنێ و بۆ ڕاکێشانی خەڵک بۆ سەر سندووقەکان لە هیچ پیلانێک درێغی ناکا و لە شارە جۆربەجۆرەکانی کوردستاندا بەربژێری ڕەنگاوڕەنگ دادەنێ تاکوو ڕەقابەتێکی ناواقیعی لە نێو فەزای بیروڕای گشتی لە کوردستاندا دروست بکا و بەداخەوە هەندێ جاریش تێیدا سەردەکەوێ و لە هەموو ئیمکاناتی سپای پاسداران و دەزگای ئیتلاعاتی و کومیتەی ئیمداد و حەراسەتی زانکۆ و ئیدارەکان و هەڕەشەی نانبڕین و … کەڵک وەردەگرێ، تاکوو خەڵکی کورد لە سەر سندووقەکانی دەنگدان ئامادە بن.

بەڵام ئەوەی جێگای تێڕامانە ئەوەیە کە بە هەموو ئەو باسانەی لە سەر دۆخی نیهادە بەناو ئینتیخابییەکان لە ئێراندا کردمان و بە هەموو ئەزموونی ڕابردووی ڕێژیمەوە، ئایا تاکوو ئێستا هیچ گۆڕانێکی موسبەت بە قازانجی خەڵک کراوە و لە دەستی ئەو بەناو نوێنەرانە لە مەجلیس شتێک هاتۆتە دی، تاکوو خەڵک دڵیان بە بەناو هەڵبژاردنی ئەم جارە خۆش بێ؟.

ڕوون و ئاشکرایە کە شتێک بە ناوی پارلەمان و مەجلیسێک کە نوێنگەی ئیرادەی خەڵک بێ، بوونی نیە وتەنیا شوێنی کۆبوونەوەی ئەندامانی ئورگانێکە کە شوورای نیگابان ڕێگەی پێداون تێیدا بەشدار بن و هیچ دەسەڵاتێکیان نیە جگە لە شەرعیەتدان بە دیکتاتۆریی کۆماری ئیسلامی.

 لە وەها دۆخێکدا گەر تەنانەت موعجیزەیەک ڕوو بدا و تەواوی مەجلیس ببێ بە کەسانی شۆڕشگێر و نیشتمانپەروەر و لە خەمی مافی گەلدا بن، تازە هیچیان پی ناکرێ و هەموو هەوڵ و تەقەلایان بە حوکمێکی حکوومەتی بەفیڕۆ دەدرێ.

بەو باس و بابەتانە و بەو ڕابردوو و ئەزموونانەی کە باس کران، پێمان وایە کە شانۆگەریی ئەم جارەی ڕێژیمیش وەک هەموو شانۆگەرییەکانی، هیچ پێوەر و ڕەنگێکی هەڵبژاردنی دێموکراتیک و ئازادی پێوە دیار نیە و ئاکامەکەشی هەرچی بێ، بەقازانجی خەڵک تەواو نابێ و هیچ دەرفەت و دەرەتانێک بۆ گۆڕانکارییەک بە قازانجی گەلی تێدا نابێ و نایەتە دی. بۆیە هەڵبژاردنەکانی ئەمجارەش بە ناڕەوا و نادروست دەزانین و بایکۆتی دەکەین.

داوا لە خەڵکی وشیار و مافخوازی ئێران و بەتایبەت نەتەوەی ئازادیخوازی کورد دەکەین کە لە پرۆسەی هەڵبژاردنی نائازاد و نادێموکراتیکی کۆماری ئیسلامی‏دا بەشدار نەبن و لە ڕۆژی دەنگداندا لە سەرسندووقەکان ئامادە نەبن و لە باتی دەنگدان لە وەها پرۆسەیەکدا، لە ماڵەکانی خۆیان بمێننەوە.

داوا لە هەموو تێکۆشەرانی گەلەکەمان و هەموو ئازادیخوازان و هەموو تێکۆشەرانی دێموکرات دەکەین کە بە هەر شێوەیەک کە بۆیان دەکرێ و بە هەموو تواناوە بۆ ئیفشا کردنی پیلانەکانی ڕێژیم و بۆ پاشگەزکردنەوەی ئەوانەی خۆیان کاندید کردووە و هەروەها بۆ هاندانی خەڵک بۆ نەچوونە سەر سندووقەکان کار بکەن و هەوڵ بدەن، تاکوو بۆ جارێکی دیکەش بەم ڕێژیمە بڵێینەوە کە پیلان و شانۆگەرییەکانیان بۆ خەڵک بەتاڵ و بێ‏مانا بوونەتەوە.

برووخێ ڕێژیمی دژی ئازادیی کۆماری ئیسلام

سەرکەوتن بۆ گەلانی ئازادیخوازی ئێران

حیزبی دێموکراتی کوردستانی ئێران

دەفتەری سیاسی

٢٠ی بەفرانباری ١٣٩٤

١٠ی ژانویەی ٢٠١٦