ئەو وێنەیە گەشترین ئاوێنەی تەمەنی منە، مامۆستا سەنگەر شنۆیی

هاوڕێیەكم دەیگوت خۆزگە ژیان وەك دەفتەرێكی بیرەوەری بایە، ئەوكات زۆر شتم لە ژیاندا رەش دەكردەوە، منیش هەر بۆچوونەكەی ئەو بەبارێكی دیكەدا دەسەلمێنم و دەڵێم

ئەگەر ژیان دەفتەری بیرەوەری سەردەمی دیجیتالی و تەكنەلۆژیای نوێ با زۆر خاڵم لە ژیاندا (بۆڵد) واتە تۆخ دەكردن بۆ ئەوەی كە لەناو لاپەڕەكانی دیكەدا زۆر گەشتر بێنە بەرچاو.. یەكێك لە خۆشترین و (بۆڵد)ترین ساتەكانی ژیانیشم ئەو وێنەیەیە.. ئەمە وێنەی پۆلێك لە قوتابیانی گوندێكی بن سێبەری بناری قەندیلە.. ئەمە وێنەی ئەو منداڵانەیە كە چارەنووس وای كردبوو كە لە زێد و واری خۆیاندا لەدایك نەبن و لە ئەشكەوت و دەواران لە سەخترین و ناخۆشترین هەلومەرجی ژیاندا بێنە جیهانەوە ، ئەوانە منداڵانی شۆڕشن، منیش ئەو سەردەم مامۆستای شۆڕش بووم…ئەوە وێنەی منداڵانی قوتابخانەی شۆڕشی مەڵبەندەی سپی سەنگە كە لە گوندی لێوژی بناری قەندیل گیراوە.

كاریگەری مامۆستایەكی گەورەی و مەزنی ژیان و قوتابخانەم مامۆستا (رەحمان سۆفی زادە) وای لێكردم، لە حوجرەی فەقێیانەوە بەرەو مەكۆ و مەڵبەندی شۆڕش بڕۆم… ساڵی 1359ی هەتاوی كە پۆلی دووەمی سەرەتایی بووم لە گوندەكەم قەڵاتەڕەش، مامۆستایەك هاتە قوتابخانەكەمان كە بە روخسار و بێچم و بە كردەوەش هیچ وەك مامۆستا نەدەچوو، چونكە ئەو مامۆستایانەی پێش ئەو سەردەم و دوای ئەو سەردەمیش دیتمن هەڵسوكەوت و كرداریان وەك هەموو ئەو مامۆستایانە دەچوون كە ئێستا وانە دەڵێنەوە.. بەڵام رەحمانی سۆفی زادە لە هەموو كەس جیاتر بوو، كە دەهاتە پۆل بە جۆرێك سەیری قوتابیەكانی دەكرد كە وەك ئەوەی قەت نەیدیبتن، ماوەیەك تێیان رادەما، ئەو تێڕامانە لەسەرەتادا بۆ ئیمەی قوتابی مانای ترسی دەدا، بەڵام بزە و قسە خۆشەكانی مامۆستا  هەرزوو تەمی ئەو هزرەی لە خەیاڵماندا دەڕواندەوە.. مامۆستا بە هەر چەند رۆژ جارێك كامێراكەی دەردەهێنا و وێنەی قوتابیەكانی دەگرتن، دوای ماوەیەكیش وێنەكەی دەداینەوە.. مامۆستا وای لە قوتابیە بزۆزەكانیش گرتبوو ئارام بن و واز بزۆزی بێنن…مامۆستا فێری دەكردین كە جگە لە خوێندنەوەی كتێبە دەرسییەكان كتێبی دیكەش بخوێینەوە، خۆشی كتێبی بۆ دەهێناین و فێری دەكردین بە كۆمەڵ بیخوێینەوە، بۆ یەكەمجار ئەو بوو سەمەدی بیهرەنگی پێناساندم.

 ئەم چەند ساڵە كە هێشتا خاوەنی خانووی خۆم نەبووم، هاوڕێیەكم لێی پرسیم ئەگەر رۆژێك ببی بە خاوەنی خانووی خۆت وێنەی كێ لە خانووەكەت هەڵدەواسی، گوتم (رەحمانی سۆفی زادە) چونكە كاریگەری ئەو لەهەموو كەس زیاتر بووە لە ژیانمدا… مامۆستای مەزنی ژیانم وای لێكردم هەمیشە خولیای مامۆستایەتیم هەبێ لە خەیاڵی رۆژانەمدا سەدان جار دەبووم بە مامۆستا سۆفی زادە وەك ئەو ئارام و لەسەرخۆ وانەبێژیم دەكرد….

 ساڵی 1367 هەتاوی كە بەداخەوە چەند ساڵێك بوو مامۆستا رەحمانی سۆفی زادە شەهید ببوو ئەو ئاواتەم هاتە دی و لە مەڵبەندی سپی سەنگی حزبی دیموكراتی كوردستانی ئێران بووم بە مامۆستای قوتابخانە.. قوتابخانەش بریتی بوو لە چادرێك كە لە ژێر سێبەری داران هەڵدرابوو.. قوتابیەكانیش منداڵی ئەو پێشمەرگانە بوون كە زۆر لەمێژنەبوو لەوێ گیرسابوونەوە… قوتابیەكانم ئەوانەی ناوم لەبیر مابن، ئەسعەد و مەسعود مەناف، محیدین و قومری عەلیپوور.. گوڵشاد و هەژار رەسولنەژاد، ئەوانە هەموویان ئەوكات باوك و پاڵپشتی ژیانیان بەرەو كاروانی نەمران نەرۆیشتبوون و لە ژیاندا مابوون، بەداخەوە ئەوانە و رەنگی هی دیكەش كە من بیرم نەماون زۆر بە زوویی لە هەست و سۆزی باوكانە بێبەشكران و باوكیان بەرەو هەواری ئامانجە پیرۆزەكان رۆیشتن ، شادی و رەشە بیهروز منداڵانی كاك رەحیم بیهروز.. دوو قوتابی دیكە بوون. ئەوانی دیكەشم زۆر بەباش لەبیر نەماون…

كە ئەو وێنەیەم لە سەر دیواری هاوڕێیەكی فەیسبووكی دی، كۆمێنێتكم لە ژێریدا خوێندەوە، “hoger alipour” نووسیبووی یەكێك لەوانەی لە وێنەكەدان منم.. یەكسەر محێدینم بیرهاتەوە كوڕی نەمر شەهید حەسۆ، بۆم نووسی تۆ فڵانەكەسی زۆر بەگەرمی وەڵامی دامەوە، وەك قوتابییەكەی جاران، پێشووتریش “Agri manaf” ئەسعەد مەنافم لە جیهانی فەیسبووكدا دۆزیبۆوە، لەگەڵ ئەوەی ئەوانە دوور لە سێبەری باوك گەورە ببوون، بەڵام خۆیان پێگەیاندبوو و هەركام لە هەندەران گیرسابوونەوەو بەخۆشییەوە هیچیشیان تووشی نەخۆشی (ئالزایمەری رۆژئاوایی) نەببوون، ئالزایمەری رۆژئاواییە نەخۆشییەكی رۆحییە پەتایەكە  ئەوكاتەی كەسێك لە هەندەران دەگیرسێتەوەو پشت لە هەموو رابردووی خۆی دەكات و هەمووشتێكی لەبیردەچێتەوە.. بەڵام ئەوان هەر قوتابییەكەی جارانی من بوون و تووشی هیچ بەدگۆڕانێك نەببوون..  چەندە سەربەرز و شادمانم قوتابیەكانم گەیشتوونە بە لوتكەی سەركەوتن، باوك هەمیشە بە ئاواتە منداڵەكانی لەخۆی سەركەوتووتربن، بۆ مامۆستایەكیش هەر ئەو ئاواتە هەیە…بۆیە شادمانم كە ئاواتەكەم هاتۆتە دی…