به‌ڕیوه‌ چوونی یاده‌کانی نه‌ورۆز له‌ ڕۆژهه‌ڵاتی کوردستان . ئازاد شێخی

بەرێوەچوونی یادەکانی نەورۆز لە شارو ناوچە جیا جیاکانی کوردستان وەرچەرخانێک لە قوستنەوەی دەرفەتەکانی خەباتی مەدەنییدا نیشان دەدا.

ئەوەی لە ماوەی چەند ساڵی رابردوودا بە تایبەت لە ٢ ساڵی رابردوو لە رۆژهەڵاتی کوردستان دەیبینین یەکێکە لەو هەنگاوە بوێرانانەی خەڵکی رۆژهەڵاتی کوردستان کە بە دڵنیاییەوە دەتوانین بڵێن زۆرترین گاریگەری هەبووە لەسەر بەرز راگرتنی هەستی نەتەوەیی ئەم بەشە لە نیشتمانی کوردان.
 لە ماوەی زیاتر لە سەد ساڵی رابردوودا کە خەباتی خەڵکی کورد قوناغی جۆراوجۆری بەخۆیەوە دیتوە،بە تایبەت دوای ئەو سەردەمەی کە کورد توانی لە رۆژهەڵاتی کوردستان خۆبەریوەبەریەکی نەتەوەیی دامەزرێنێ و کۆماری راگەیاند، بە جورئەتەوە دەتوانین بڵێن کە پاش زیاتر لە ٦٠ ساڵ دوای ئەو سەردەمە، کۆمەڵگای کوردی ئەوەندە وشیاری نەتەوەیی و تێگەیشتوویی سیاسیان گەشەی کردوە کە. لە رێگای خەباتی مەدەنی و کولتووریەوە زیندوویی نەتەوەیەکی بێ دەوڵەتی گەمارۆدراو لەلایەن چەند دەوڵەتی شیونیست و سەرەرۆوە بەرز رابگرن و بە قوستنەوەی دەرفەتەکان ئەو راستییە بسەلمێنن کە، خەباتی ئازادیخوازی و مافخوازی کورد ئەگەر لەلایەک تووشی نوشوستی بێ و دەرفەتی قۆناغە کلاسیکییەکانی خەباتی رزگاری نەتەوەیی و نیشتمانی نەرەخسابێ، دەکرێ لە دەرفەتە باوەکانی جیهانی ئەورۆ کەڵک وەربگیردرێ.
 تاوەکوو ٥ ساڵ لەوەپێشیش کەم کەس بیری لەوە دەکردەوە کە خەڵکی کورد لە رۆژهەڵاتی کوردستان ئاوا یەکگرتوانە بۆنەیەکی کولتووری بکەنە دەلاقەیەک بۆ دەربرین و نیشاندانی کەسیەتی نەتەوەیی خۆیان، ساڵانێک بوو کورد لە باکووری کوردستان ئەم دەرفەتەی بە باشی قۆستۆتەوە و ئێستا دەبینین رێورەسمی دەیان هەزار کەسی بۆ بۆنە نەتەوەیی و نیشتمانییەکان دەکرێ، راستە حاشا لەوە ناکرێ کە هێزێکی وەک پارتی کرێکارانی کوردستان بزوێنەرو پاڵپشتی سەرەکی ئەم خورۆشانە جەماوەریانەیە.
 بەڵام ئەگەر ئاور لە چۆنیەتی نەشونما کردنی پەرەسەندنی ئەم بونە کولتووریانە بدەینەوە دەبینین ئەوە واقیع بینی تاک بە تاکی خەلکی کوردە لە رۆژهەڵاتی کوردستان کە دەبینن هێزە سیاسیەکان بەو شێوەی پێویست بێ نەیانتوانیوە بۆشاییەکان لە کۆمەڵگادا پڕ بکەنەوە جا دەرفەتیان بۆ نەرەخساوە یا نەیانتوانیوە ئەوە باسێکی دیکەیە.
 ئامانج لەم نوسینە ئەوەیە کە ئەم بۆنە کولتووریانەی کە بەو شێوەیە لە رۆژهەڵاتی کوردستان بەرێوەچوون هەڵگری چ پەیامێکن، ئایا دەکرێ وەک تەنها وەک شایی و هەڵپەرکێی کۆمەڵێ خەڵك چاوی لێ بکەین یا نە بەراستی ئەوان رێگایەکی پڕ کاریگەر کەم قوربانیمان پێ نیشان دەدەن.
 شایەت پرسیارەکە لە نەوعی خۆییدا ساکار بێ بەڵام با بێن و لە دۆخی کارو فکری سیاسی کە وشکایی و ساردی زیاتری پێوە دیارە دوور بکەوینەوە و رۆبچینە ناو کۆمەڵگای کوردی لە رۆژهەڵاتی کوردستان.
هەموو تاکێکی سیاسی و تەنانەت هێزو لایەنە سیاسیەکانی رۆژهەڵاتی کوردستان بەردەوام بە شان و باڵی خەڵکدا هەڵدەڵێن و بە پێگەیشتوو تێگەیشتویان باس دەکەن ئەمە راستە، ئەمنیش دەڵێم حاشا لەو واقعیەتە ناکرێ، بۆیە بە پێویستی دەزانم و هیوادارم کە لەلایەک خەلکی وشیاری کوردستان لەلایەک ە لەلایەکی دیکە روناکبیران و نوخبەی کوردی ئەم دەرفەتە لە خەباتی مەدەنی کە لە فۆرمی خەباتی کولتووریدا پێناسەی بوکراوە، خەباتەکەیان تێکەڵ بە کاری سیاسی نەکەن و رێچکەی خەباتەکەیان لەبەر دورووشمی تاکتیکی هێزو لایەنێکی سیاسی نەکەنە قوربانی، شاراوە نییە کە ئێستا خەڵک هەنگاوێک لە پێشترەو توانیویەتی بە هەموو هێزە سیاسیەکانی ئەو بەشە لە نیشتمانەکەی بڵێن، کە لەگەڵ رێزمان بۆ خەباتی بێ وچانتان کە کۆمەڵگای کوردستان لە رێگەی ئێوەوە بە هەزاران رۆڵەی پێشکەشی رێگای ئازادی گەل و خاکەکەی کردوە، بەڵام کۆمەڵگای کوردستان ئێستا پێویستی بە پشتیوانی زیاتری ئێوەو یەکگرتوویی زیاتری ئێوەیە.
 دیارە بێ ئینسافییە کە ئەو راستییە نەبینین کە پەرە سەندنی هەر شێوازێک لە خەبات پێویستی بە ئامرازی سەردەمیانەو پێشکەوتووی ئەورۆیی هەیە یەک لەوان ئامرازەکانی راگەیاندنە کە بەحەق راگەیاندنی کوردی لە تاراوگە یەکێک لە دەرفەتەکانی پەرەپێدان بەو خەباتە کولتووریە بوە و جێگای دەستخۆشییە، نابێ لە خۆمان رازی بین دەکرێ زیاتر کاری بۆ بکەین بۆ ئەوەی بەیداخی ئەم جۆرە لە خەبات هەمیشە بەرزو شەکاوە رابگرین.
 هیوادارم دەلاقەیەکی بچوکم کردبێتەوە بۆ ئەوەی زیاتر لەسەر پەیامەکانی ئەم خورۆشانە کولتووری-نەتەوەییە زیاتر هەڵوێستەی لەسەر بکرێ.{jcomments off}