ڕۆژی پێشمەرگە؟ شاناز ئیبراهیم ئەحمەد

لە میدیاکانەوە : زۆرم پێ خۆش بوو كه‌ پاش تێپه‌ربوونی بیست ساڵ به‌سه‌ر

ئه‌و ئازادییه‌ی كه‌ به‌خوێن و سه‌رو ماڵ و گیان و ژیانی پێشمه‌رگه‌ به‌ده‌ستمان هێناوه‌ بیر له‌ڕۆژێكی تایبه‌ت به‌و سومبولانه‌ی ئازادی و ئازایه‌تی و له‌خۆبوردن و گیانفیداییانه‌ كرایه‌وه‌ كه‌ له‌ناو دڵ و مێشكی زۆربه‌مانا قودسیه‌ت و پیرۆزی و رێزێكی بێئه‌ندازه‌یان هه‌یه‌و به‌تاجی سه‌رمانیان دائه‌نێین به‌ڵام كاتێ  كه‌ له‌میدیاكانا بیستم كه‌وا رۆژی ١١ی ئه‌یلول ئه‌كرێته‌ رۆژی پێشمه‌رگه‌ وتم كاشكی هه‌ر باس له‌ڕۆژی پێشمه‌رگه‌ نه‌كرایی!

جێی سه‌رسورمانه‌ كه‌ ئێمه‌ی كورد كه‌ هه‌میشه‌ له‌ووتار و دوروشم و نووسینه‌كانمانا ئیدیعای ئه‌وه‌ ئه‌كه‌ین كه‌ به‌ڵێ ئێمه‌ هاوخه‌م و هاوده‌ردو هاوسۆزی گه‌لانی ترین كه‌چی بیر له‌وه‌ نه‌كه‌ینه‌وه‌ كه‌ رۆژی ١١ی ئه‌یلۆل رۆژێكی ماته‌مینیه‌ له‌زۆربه‌ی ووڵاتانی جیهانا، ئه‌ی ١١ی ئه‌یلول ناكاته‌ ١١ی سپته‌مبه‌ر، ئه‌ی یانزه‌ی سپته‌مبه‌ر به‌ڕۆژی شین و رۆژی گه‌وره‌ترین تاوانی القاعیده‌ به‌رامبه‌ر به‌مرۆڤایه‌تی نه‌ناسێنراوه‌؟ ئه‌ی نه‌كراوه‌ته‌ رۆژێكی دژ به‌تیرۆریست و پیاوكوژان؟ باشه‌ بۆ ئه‌بێ رۆژێك بۆ ئه‌و سومبوله‌ مه‌زنه‌ی گه‌له‌كه‌مان هه‌ڵبژێرین كه‌ له‌سه‌رتاسه‌ری جیهاندا به‌ڕۆژێكی ره‌ش له‌قه‌ڵه‌م درابێت؟ هه‌ڵبژاردنی ئه‌و رۆژه‌ وه‌ك هه‌ڵبژاردنی رۆژی عاشورایه‌ كه‌ بیكه‌ینه‌ رۆژی نه‌ورۆزی خۆمان!!

لێتان ناشارمه‌وه‌ هه‌ر كه‌ گوێم له‌ ١١ی ئه‌یلول بوو یه‌كسه‌ر مێشكم بۆ ١١ی سپته‌مبه‌ر رۆیشت نه‌ك بۆ ١١ی ئه‌یلولی ١٩٦١چونكه‌ ئه‌و شۆڕشه‌ مۆری حزبی پێوه‌یه‌، كه‌چی گوێم لێ بوو كه‌ وترا گوایه‌ ئه‌و رۆژه‌ بۆیه‌ هه‌ڵبژێردراوه‌ چونكه‌(مۆری حزبی پێوه‌ دیار نیه‌)  له‌ڕاستیا پێم سه‌یره‌ كه‌ له‌ناو میلله‌تی كوردا كه‌سانێك هه‌بن كه‌ مۆره‌ حزبیه‌كه‌ی ئه‌و رۆژه‌ نه‌بینن.

له‌كاتێكا كه‌ حزبێك له‌یادی دامه‌زراندنیا پێمان ئه‌ڵێت كه‌ فڵان شۆڕش له‌فڵان رۆژا به‌سه‌رۆكایه‌تی من ده‌ستی پێكرد، ئه‌ی گه‌ر ئه‌وه‌ مۆری حزبی نه‌بێت مۆری حزبی چیه‌؟ خۆ ئه‌و كه‌ باس له‌و كات و سات و ساڵانه‌ ئه‌كات باس له‌كه‌سیتر جگه‌ له‌خۆی ناكات كوا باسی كێ ئه‌بیستین؟ كوا ناوی كێ ئه‌هێنرێ؟ كه‌ی هه‌ر باس له‌پێشمه‌رگه‌ی ئه‌وكات ئه‌كرێ؟ راسته‌ كه‌ ئێمه‌ خۆمان راستیه‌كان ئه‌زانین به‌ڵام به‌داخه‌وه‌ ئه‌مڕۆكه‌ به‌شێوازێكی تر باس له‌و فلیمه‌ كۆنه‌ مێژووییه‌ ئه‌كرێ و سیناریۆكه‌ی به‌جۆرێك ده‌ستكاری كراوه‌ كه‌ ته‌نانه‌ت كاراكته‌ره‌ سه‌ره‌كیه‌كانیشی لێ ده‌رهێنراون و مۆره‌كه‌ی له‌مۆری حزبیش تێپه‌ریوه‌و بوه‌ته‌ مۆرێكی تایبه‌ت.

ئێمه‌ی كورد هێنده‌ ئازارمان به‌ده‌ست یه‌كه‌وه‌ چێشتوه‌ كه‌ ئه‌بێ به‌حه‌زه‌ره‌وه‌ رۆژ هه‌ڵبژێرین چونكه‌ رۆژه‌كانمان رۆژانێكی ئاسایی نین و هه‌ندێك جار به‌خۆشی ده‌ستی پێ كردووه‌و به‌ناخۆشی كۆتایی پێهاتووه‌و به‌پێچه‌وانه‌شه‌وه‌، رۆژێك ده‌ستمان له‌ناو ده‌ستی یه‌كا بووه‌و رۆژه‌كه‌ی تر ده‌ستمان داوه‌ته‌ تفه‌نگه‌كانمان و ناومانه‌ به‌دڵی یه‌كه‌وه‌، بۆیه‌ ناكرێ و ناشێ كه‌ خۆپه‌رستانه‌و یه‌ك لایه‌نه‌ رۆژ هه‌ڵبژێرین به‌بێ گوێدانه‌ هه‌ستی به‌رامبه‌رو گه‌له‌كه‌مان، گه‌ر رۆژی ١١ی ئه‌یلول بكرێته‌ رۆژی پێشمه‌رگه‌ ئه‌وا بێگومان پێشمه‌رگه‌ ئه‌بێته‌ خاوه‌نی چه‌ندین رۆژو هه‌ر لایه‌نێك رۆژێك لای خۆیه‌وه‌ بۆ پێشمه‌رگه‌ ده‌ستنیشان ئه‌كات و یه‌كیه‌تیش ده‌یان رۆژی پیرۆزی خۆی هه‌یه‌ كه‌ ببێته‌ رۆژی پێشمه‌رگه‌ چونكه‌ كورد ووته‌نی نه‌ ده‌رنگ هاتووین و نه‌ كه‌ممان هێناوه‌. جا بۆ ئه‌وه‌ی كه‌ ئه‌و رۆژه‌ له‌لایه‌ن هه‌مووانه‌وه‌ په‌سند بكرێت ئه‌بێ رۆژێكی وه‌ك رۆژی هه‌ڵكردنی ئاڵای سه‌ربه‌خۆیی كۆماری مه‌هاباد بێت كه‌ كه‌س لاری لێ نه‌بێت. پێم وایه‌ كه‌ ئه‌بێ مه‌سه‌له‌ی ده‌ستنیشان كردنی رۆژی پێشمه‌رگه‌ زۆر قوڵترو هه‌مه‌لایه‌نه‌تر بیری لێ بكرێته‌وه‌و بایه‌خ و گرنگی زیاتری پێ بدرێ وه‌ك له‌وه‌ی كه‌ به‌په‌له‌ پڕوزه‌ رۆژێكمان به‌سه‌را بسه‌پێندرێت.

ره‌نگه‌ له‌نێوان هه‌ندێك له‌لایه‌نه‌كانا ئیتیفاقات هه‌بێت به‌ڵام خۆ ئه‌مه‌ به‌مانای ئه‌وه‌ نیه‌ كه‌ ده‌بێ هه‌موو لایه‌نه‌كان ملكه‌چی بڕیاری یه‌ك لایه‌ن بن و ئه‌و لایه‌نه‌ش به‌هه‌وه‌سی خۆی ئارم بۆ هه‌رێمه‌كه‌مان دابنێت و رۆژ بۆ پێشمه‌رگه‌كانمان ده‌ستنیشان بكات و هتدو كه‌سیش ورته‌ی لێوه‌ نه‌یێت وه‌ڵا چیه‌ ئیتیفاقات له‌نێوان لایه‌نه‌كاندا هه‌یه‌! 

پاشان خۆ پێشمه‌رگه‌ ته‌نیا له‌به‌شی كوردستانه‌كه‌ی ئێمه‌یا بوونی نیه‌ ئه‌ی نابێ رۆژێك هه‌ڵبژێردرێ كه‌ له‌پارچه‌كانی تری كوردستانیشا ببێته‌ رۆژی پێشمه‌رگه‌؟ نابێ رۆژێك بێت كه‌ هه‌مووان له‌سه‌ری رێكه‌ون؟ نابێت رۆژێك بێت كه‌ هه‌موو پێشمه‌رگه‌یه‌ك به‌ڕۆژی خۆی بزانێ؟ نابێت رۆژێك بێت كه‌ هه‌موومان شانازی پێوه‌ بكه‌ن و نه‌ ته‌نیا پێشمه‌رگه‌ی یه‌ك لایه‌ن و یه‌ك حزب؟{jcomments off}