ئەرێ دەوڵەتی كوردیتان ئەوێت یان بەغداد؟، ئاسۆ عەبدولەتیف

 دوو ئاراستەی زۆر جیاوازە، دوو حەزی زۆر نالۆژیكی و دژە نەتەوەییە، رێگای بەغداد یان سەربەخۆیی؟ ئەی ئەوانەی دوێنێ شەهید بوون چی؟ ئەمە زاده ی نەبوونی گوتاری نەتەوەیی و ستراتیجی نیشتیمانی و ئیرادەیە بۆ ئاستی خۆبەرێوەبەری

و دامەزراندنی سیستم و بنەماكانی دەوڵەتداری،دەوڵەتی كوردی بەراستی بە شەقامەكانی بەغداد دا تێپەر نابێت،تەنانەت بە ناو بۆریە نەوتیەكانیشدا تێپەڕنابێت، بەڵكو بە دەماری خوێن و جەرگی سووتاوو كەلاوەی روخاوو هەستی نیشتیمانپەروەیی تاكی كوردیدا تێپەردەبێت، بەو شوێنەدا تێپەڕدەبێت كە مانایەك ماوەتەوە بۆ كوردبون و شكۆی نەتەوەیی، بێگومان ئەوەش بەغداد نیە، ئەوە دڵی ئەم میللەتەیە كە 100 ساڵە ئەو بەغدایە تاڵاو ئەكات بە گەرویدا.

لە عێراقدا نە دیموكراسیەت هەیەو نە فیدراڵیەت ئەوەی هەیە پۆلیسێكی عەرەبیە بە بیری ئایدۆلۆژی و مەزهەبی و خێڵەكیانەوە چەند ساڵ جارێك دێت وكورد ئەگەوجێنێت و مەست و سەرخۆشی ئەكات،جارێ باسی نەتەوە و جارێ باسی ئیشتیراكیەت و وەحدەی عەرەبی و جارێكیش  باسی دیموكراسیەت و ئازادیمان بۆ ئەكات، گرنگە كورد واز لە پۆست بهێنێت و بەشوێن ئەو بەندو یاسایانەوە بروات كە هەرێمەكەی ئەپارێزێت لە هەرەشەو ترس و چیتر ئەوەندە عاشقی بەغداد نەبێت.

ئەوە چەندین جارە ئێوە بەغاتان وەك رێگای كانی لێ كردوەو نەتانتوانیوە تینوێتی ئەم میللەتەی پێ بشكێنن، دەشزانن ئەم میللەتە تینوێتی تەنها بە ئاوی گۆزەی خۆی ئەشكێت، كەچی هەر كوردان دڵشكاو ئەكەن و گوێ بەم هه موو دڵشكانە نادەن لە پێناو چەند ئیمتیازێك بۆ چەند پیاوێكی نەخۆش و  سازشكەرو موجامیلچی، دڵنیام لەم چونەوەیەتان بۆ بەغداد گەل نارازیە و فەرموون راپرسی بكەن و بزانن گەل چی دەڵێت، پێشمەرگەش لەگەڵ ئێوە نین دڵنیام عاجزن لە ئەداو رەفتارتان، لە گیرفانی پڕو نادادگەریتان، چەند مانگە سنگیان ناوە بە فیشەكی داعش و شۆڤێنیزمی عەرەبەوە لە پێناو گەلی كورددا كەچی ئێوە ئەیگۆرنەوە بە پۆستەكانی بەغدادو دواتریش هەر ئەو بەغدادە شكۆمەندیتان ئەخاتە ژێر پێ و ئەگەرێنەوە باوەشی نیشتیمان،سەیركەن ئێوە بێ پرسی پێشمەرگە، بێ پرسی گەل، وردە وردە بە نەرمی و لە پەنای قژی ژاكاوو لول و تفەنگە ئامادەكانی پێشمەرگەدا شەرعیەت ئەدەنەوە بە عێراق و بە بەغداد و هیچ شەرمیش ناكەن، ئەمە ناو ئەنێن چی، حیكمەت، سیاسەت، دیبلۆماسیەت، یان جەهل و پەرتەوازەیی، یان چیرۆكی كڵۆڵی و نەفامی.

 چیتر یاری بە عەقڵی تاكی كوردی مەكەن، دەوڵەتی كوردیتان دەوێت فەرموون ئەوە قۆناغێكی لەبارەو چیتر ترسی ناوێت، بەغداشتان ئەوێت ئیتر باسی دەوڵەتی كوردی و هەرەشەی مالیكی و شۆڤێنیەتی عەرەبی مەكەن تا خەڵك چیتر نائومێد نەبن و دوچاری زیان نەبنەوەو بێ موچە نەبن، بەو هەموو پۆستەی لە رابردوو كورد هەیبوو تا سەردەمی داعش،دەركەوت نەیتوانی هیچ دەستكەوتێك بۆ كورد بچنێتەوە كەچی هەر ئەتانەوێ یارمەتی عەرەب بدەن و ئەمجارەش عێراق و سوپاكەی دروست بكەنەوە، نازانم ئەم شانازیانە بۆچی بەكاردێنن و بۆچیتانە لەكاتێكدا كە نەبنە شانازی میللەتی خۆتان.

 هێشتا بەغا ناهێڵێت كوردستانێكی ئارام لە زیهنیەتی تاكی عێراقیدا وێنا بكات و لە نائارامیدا ئەیهێڵێتەوە كەچی ئێمەش خەریكی ناردنی كاندیدی ئەم پۆست و ئەو پۆستین بۆ بەغداد،تەنانەت ئەوەندە حەزمان لە بەغدادە چەند كاندیدێكی كوردمان پاڵاوتوە بۆ سەرۆك كۆماریەكەی و كەسێك نیە بڵێت منیش كاندیدی سەرۆكی دەوڵەتی كوردیم و ئاوا نەترسانە خۆی نمایش بكات!!

 “بەغا” ئەو پایتەختەیە كە رۆحی دروستكردن و وێرانكردن و هەمانكات خوشویستن و رقیشمان تێدا دروست ئەكات، زۆر یادەوەری دانوستان و كوشتن و شەڕو ئاشتبونەوەمان هەیە لەم بەغایەدا، بەغا شارێكی سیحری كۆنە و سەرچاوەی عەزاب و تەقینەوەو ترس و زیندانی ئەبو غرێب و تیرۆر بووە بۆ كورد، هەمیشە سەنتەری ململانێكانی كۆن و نوێ بووە، سەنتەری دابەشكردنی داهات و نەوت بووە، پایتەختی مافخورانی رەگەزو تیرەو رەنگ و زمان و ئاین و ئاینزاكان بووە، كورد لە مێژووی نزیك و بەیاننامەی 11 ئازاری 1970 وە  تاڵاوی ئەو پایتەختە نۆش ئەكات و تەنانەت پرۆسەی ئازادی لە 9 نیسانی 2003 نەیتوانی ئەو پایتەختەمان بۆ بكاتە پایتەختی خۆمان و  دەزوە شۆڤێنیەكەی بپسێنێ و كورد پشتوێنی لێ بكاتەوەو بڵێ منیش بەغاییم و لە بەغا دا ئەنیشم و موڵك و دوكان ئەكڕم و سەرمایە كۆ ئەكەمەوەو وەك هاووڵاتی ده ژیم، وەك چۆن بەغایی و عەرەبەكانی خواروی عیراق، كوردستان بە موڵكی خۆیان ئەزانن و لە شاری هەولێر و سلێمانی توانیویانە دەیان مۆڵ و موڵك بكڕن و بیزنسی خۆیان بكەن.

 

سەرچاوە: سپی مێدیا